ចង់ក្មេងជាងវ័យ និងសុខភាពរឹងមាំ គួរញុំាបន្លែបង្ការទាំងនេះ! ក៏ប៉ុន្តែ «សូមប្រយ័ត្នបន្លែផ្លែឈើគីមី»
១៖ ត្រប់ពុតលំញង ជួយឲ្យឈាមដើរបានល្អ៖
សារធាតុដែលមានរសជាតិល្វីងតិចៗរបស់ត្រប់ពុតលំញង និងប្រេងក្រអូបរបស់វា ជួយជំរុញដល់ការរំលាយអាហារ ជួយឲ្យឈាមដើរបានល្អ និងមានជាតិប៉ូតាស្យូម ជួយបន្ធូរអការៈតឹងតែងអារម្មណ៍ និងកាត់បន្ថយសម្ពាធឈាមដែលឡើងខ្ពស់។ សារធាតុដ៏មានប្រយោជន៍របស់វា គឺនៅសម្បក ដូចនេះគួរបរិភោគត្រប់ពុតលំញង ទាំងសម្បក។
២៖ ល្ពៅ ប្រឆាំងរ៉ាឌីកាល់សេរី៖
ល្ពៅមានកាល់ឡូរីទាបផ្តល់ទឹក កាកសរសៃអាហារ ម៉ាញ៉េស្យូម និងប៉ូតាស្យូម។ ល្ពៅជួយដល់ការរំលាយអាហារ ជួយបំពេញជាតិទឹក និងសម្អាតបំពង់បង្ហូរនោម។ វីតាមីន A និង វីតាមីន E នៅក្នុងផ្លែល្ពៅ ជួយឲ្យប្រព័ន្ធការពាររាងកាយរឹងមាំ ការពារមិនឲ្យកើតជំងឺមហារីក និងប្រឆាំងរ៉ាឌីកាល់សេរី។
៣៖ ម្ទេសប្លោក ការពារស្ទះឈាម៖
ការទទួលទានម្ទេសប្លោកមានគុណប្រយោជន៍ជួយឲ្យឈាមដើរស្រួល និងការពារជម្ងឺស្ទះឈាម ព្រមទាំងជួយការពារមិនឲ្យងាយឆ្លងជំងឺ ថែមទាំងជំនួយភ្នែកទៀតផង។
៤៖ ការ៉ុត ជួយអ្នកខ្វះវីតាមីន៖
មេតាខារ៉ូទីន នៅក្នុងការ៉ុតជួយឲ្យប្រព័ន្ធការពាររាងកាយ មានភាពរឹងមាំ។ ឯវីតាមីន A នៅក្នុងការ៉ុត ជួយឲ្យភ្នែកភ្លឺថ្លាល្អ ស្បែកតឹងណែន ជួយប្រឆាំងទល់នឹងអការៈខ្វះវីតាមីន ការពារពីជំងឺមហារីក និងជួយឲ្យមានអារម្មណ៍ស្ងប់ស្ងៀមក្នុងការរៀនសូត្រ។
៥៖ ប៉េងប៉ោះ ជួយបំពេញជាតិទឹក៖
វីតាមីន A,C,និង E នៅក្នុងប៉េងប៉ោះជួយការពារស្បែក និងជួយប្រឆាំងទប់ទល់នឹងរ៉ាឌីកាល់សេរីដែលបំផ្លាញកោសិកា។ ក្រៅពីនេះប៉េងប៉ោះជួយបំពេញជាតិទឹក ជំរុញដល់ការរំលាយអាហារ។ ប៉ូតាស្យូមនៅក្នុងប៉េងប៉ោះ ជួយកាត់បន្ថយជំងឺលើសឈាម។
៦៖ ឃិនឆាយជួយបំបាត់ក្លិនមាត់៖
ឃិនឆាយ ជួយឲ្យបំពង់អាហារ និងថង់ទឹកប្រមាត់ ដំណើរការបានល្អ ជួយរំលាយអាហារ និងបន្ទោរបង់នោមបានស្រួល។ ឃិនឆាយមានកាល់ស្យូមច្រើនជួយទ្រទ្រង់ឆ្អឹង និងធ្មេញឲ្យរឹងមាំ ព្រមទាំងជួយបំបាត់ក្លិនមាត់បានទៀតផង។
៧៖ ផ្សិតខ្មៅ ជួយដល់កោសិកានានា៖
ផ្សិតខ្មៅ (ផ្សិតចិន) មានអាស៊ីដអាមីណូជួយផលិតកោសិកាថ្មីៗ មានសារធាតុសេលេនៀម វីតាមីន E ជួយការពារកោសិកាផ្សេងៗនៃរាងកាយ។
៨៖ ផ្ទី ជួយផលិតឈាម៖
ផ្ទីមានអាស៊ីដហ្វូលិកច្រើន ដែលសំខាន់សម្រាប់ការផលិតឈាម និងមានកាល់ស្យូម ផូស្វ័រជួយឲ្យឆ្អឹងរឹងមាំ៕
