តោះបញ្ជូនឈ្មោះអ្នកទៅភពអង្គារនៅឆ្នាំ២០២០! ជនជាតិខ្មែរយើងជាង២ពាន់ហើយបានចុះឈ្មោះ…

(បរទេស)៖ នៅសល់ពេលតែមួយសប្តាហ៍ទៀតប៉ុណ្ណោះសម្រាប់ការចុះឈ្មោះ ដើម្បីបញ្ជូនទៅកាន់ភពអង្គារ តាមរយៈយានរុករកជំនាន់ថ្មីរបស់ទីភ្នាក់ងារអវកាសអាមេរិក NASA ដូច្នេះហើយអ្នកដែលចង់តែកន្លងមកមិនទាន់មានពេល គឺអាចធ្វើបែបនោះបាន តាមរយៈការចូលទៅកាន់តំណភ្ជាប់នេះ https://mars.nasa.gov/participate/send-your-name/mars2020 ហើយបំពេញព័ត៌មានមួយចំនួនទៅតាមតំណាក់កាល។ នេះបើតាមការដកស្រង់ការផ្សាយចេញពីវែបសាយ Space នៅថ្ងៃអង្គារ ទី២៤ ខែកញ្ញា ឆ្នាំ២០១៩។

ខណៈយានរុករក Mars 2020 Rover កំពុងត្រៀមលក្ខណៈដើម្បីឆ្ពោះទៅកាន់ភពអង្គារ (Mars) នៅឆ្នាំ២០២០ ពួកយើងនៅមានពេលរហូតដល់ថ្ងៃទី៣០ ខែកញ្ញានេះ ដើម្បីចូលរួមការផ្ញើឈ្មោះទៅភពក្រហមនោះជាមួយវា។ សម្រាប់ការចុះឈ្មោះ គឺគ្រាន់តែចូលទៅក្នុងតំណភ្ជាប់ខាងលើ ហើយបំពេញនាមត្រកូល ប្រទេស លេខកូដប៉ូស្តាល់ និងអ៊ីម៉ែល។

គិតត្រឹមពេលនេះមានឈ្មោះដល់ជិត ១០លានហើយ ដែលត្រូវបានចុះដោយក្នុងចំណោមនោះ តួកគីមានចំនួនច្រើនជាងគេគឺ ២.៥លានឈ្មោះ ហើយបន្ទាប់មកគឺឥណ្ឌាដែលមាន ១.៥លានឈ្មោះ និងសហរដ្ឋអាមេរិកដែលមាន ១.១៧លានឈ្មោះ។ រីឯកម្ពុជាយើងវិញក៏មានប្រមាណ ២,១៦៥ឈ្មោះនឹងគេដែរ។

គួរជម្រាបថា បេសកកម្មរបស់ Mars Rover 2020 នឹងចាប់ផ្តើមនៅខែកក្កដា ឆ្នាំ២០២០ ហើយត្រូវគេរំពឹងថានឹងចុះទៅភពអង្គារនៅខែកុម្ភៈ ឆ្នាំ២០២១។ សម្រាប់ការដាក់ឈ្មោះរបស់យានរុករកថ្មីនេះ អង្គការ NASA កំពុងសុំយោបល់តែពីសិស្សសាលានៅក្នុងសហរដ្ឋអាមេរិកផ្ទាល់ប៉ុណ្ណោះ៕

(បញ្ជាក់ថា៖ ដោយគ្រាន់តែចុចលើ Link ដូចបានបញ្ជាក់ខាងលើ ឬ Copy Link នោះ Pass លើ Browser ឬ Chrome លោកអ្នកអាចចាប់ផ្តើមដំណើរការចុះឈ្មោះបានហើយ)