(វ៉ាស៊ីនតោន)៖ អ្នកវិទ្យាសាស្រ្តនៃអង្គការ NASA កំពុងមានក្តីសង្ឃឹមខ្ពស់ចំពោះកម្មវិធីត្រឡប់ទៅឋានព្រះច័ន្ទ Artemis ដែលនឹង អាចជួយពួកគេបកស្រាយចម្ងល់សំខាន់ៗជាច្រើន។ នេះបើតាមការដកស្រង់ការផ្សាយចេញពីវែបសាយ Space នៅថ្ងៃពុធ ទី២៣ ខែតុលា ឆ្នាំ២០១៩។
ក្នុងវេទិកា International Astronautical Congress (IAC) កាលពីដើមសប្តាហ៍នេះ ប្រធានក្រុមអ្នកវិទ្យាសាស្រ្តរបស់អង្គការ NASA លោក Jim Green បានលើកឡើងនូវសំណួរសំខាន់ៗខ្លះៗ ដែលអ្នកវិទ្យាសាស្រ្តរំពឹងថា នឹងអាចស្វែងរកចម្លើយឲ្យឃើញ ខណៈដែល NASA បានផ្តោតកិច្ចប្រឹងប្រែងសាជាថ្មីទៅលើព្រះច័ន្ទ ក្រោមទម្រង់ជាកម្មវិធី Artemis។
បើតាមលោក Green ការបកស្រាយចម្ងល់ទាំងនោះអំពីព្រះច័ន្ទ គឺមិនត្រឹមតែជួយមនុស្សលោកយើងត្រៀមខ្លួន សម្រាប់ការរុករកបន្តទៅកាន់ភពអង្គារ (Mars) ប៉ុណ្ណោះទេ តែពួកវានឹងលាតត្រដាងបន្ថែមនូវប្រវត្តិសាស្រ្តនៃភពផែនដី និងប្រព័ន្ធព្រះអាទិត្យយើងទាំងមូល។
គួរជម្រាបថា អាថ៌កំបាំងដ៏សំខាន់បំផុតមួយរបស់ព្រះច័ន្ទ គឺទីតាំងនៃប្រភពទឹកដែលមានវត្តមាននៅទីនោះ។ បើតាមគម្រោងដែលបានកំណត់ទុក អង្គការ NASA នឹងចាប់ដៃគូជាមួយក្រុមហ៊ុនឯកជន និងបណ្តាប្រទេសដទៃទៀត ដើម្បីសាងសង់ស្ថានីយអវកាសមួយនៅក្បែរគន្លងព្រះច័ន្ទ ខណៈការបញ្ជូនក្រុមអវកាសយានិកឲ្យទៅជាន់លើដីព្រះច័ន្ទជាថ្មីម្តងទៀត នឹងកើតមានឡើងនៅក្នុងឆ្នាំ២០២៤៕
