ប្រជាជននៅប្រទេសខ្លះអាចមើលឃើញ «បាតុភូតភពពុធបរកាត់ព្រះអាទិត្យ» នៅសប្តាហ៍ក្រោយនេះ តែគួរឲ្យស្តាយ…

(បរទេស)៖ នៅថ្ងៃចន្ទ ទី១១ ខែវិច្ឆិកា ព្រឹត្តិការណ៍កម្រមួយនឹងកើតឡើងនៅលើផ្ទៃមេឃ នោះគឺភពពុធ (Mercury) នឹងឆ្លងកាត់ពីខាងមុខផ្ទៃព្រះអាទិត្យ ហើយលោកអ្នកអាចតាមដានរឿងនេះបាន។ នេះបើតាមការដកស្រង់ការផ្សាយចេញពី​វែបសាយព័ត៌មាន Space នៅថ្ងៃសៅរ៍ ទី០៩ ខែវិច្ឆិកា ឆ្នាំ២០១៩។

វានឹងជាព្រឹត្តិការណ៍លើកទី៤ហើយ ក្នុងចំណោមព្រឹត្តការណ៍សរុបទាំង ១៤លើក ដែលមនុស្សនៅលើផែនដីនឹងមើលឃើញភពពុធ ឆ្លងកាត់ពីមុខព្រះអាទិត្យក្នុងអំឡុងសតវត្សរ៍ទី ២១ នេះ។ ក្រៅពីភពពុធ ភពសុក្រ (Venus) ក៏ធ្លាប់មានព្រឹត្តិការណ៍បែបនេះដែរ។ លើកចុងក្រោយគេដែលយើងបានមើលឃើញភពពុធធ្វើដំណើរឆ្លងកាត់ពីខាង មុខព្រះអាទិត្យ គឺកាលពីថ្ងៃទី០៩ ខែឧសភា ឆ្នាំ២០១៦។ នៅពេលព្រឹត្តិការណ៍នោះកើតឡើង ភពពុធនឹងបង្ហាញខ្លួនក្នុងទម្រង់ជាចំណុចខ្មៅដ៏តូចឆ្មាមួយ ដែលស្មើនឹង ០.៥ ភាគរយនៃអង្កត់ផ្ចិតរបស់ព្រះអាទិត្យប៉ុណ្ណោះ ដូច្នេះហើយគេត្រូវការកែវយឺត ដែលមានកម្លាំងពង្រីកយ៉ាងហោចណាស់ 50x ទើបអាចមើលឃើញវាច្បាស់។

គួរជម្រាបថា នៅថ្ងៃចន្ទសប្តាហ៍ក្រោយ ភពពុធនឹងចំណាយពេលជិត ៥ម៉ោងកន្លះ ដើម្បីឆ្លងកាត់ផ្ទៃរបស់ព្រះអាទិត្យ ខណៈព្រឹត្តិការណ៍នេះអាចមើលឃើញពីតំបន់ ទ្វីបអាមេរិក អឺរ៉ុប អាហ្រ្វិក អាស៊ីខាងលិច និងនូវែលសេឡង់ ខណៈអូស្រ្តាលី និងអាស៊ីខាងកើត ដែលរួមមានទាំងកម្ពុជាយើង គឺមិនអាចមើលឃើញឡើយ៕