ក្រុមអ្នកវិទ្យាសាស្ត្រ NASA «កំពុងបង្កើតរ៉ូបូតអវកាស ដែលអាចចាក់ឥន្ធនៈឲ្យផ្កាយរណប» ចំនួនរាប់ពាន់គ្រឿងដែលកំពុងចល័តនៅនៅទីអវកាស!
(អាមេរិក)៖ ផ្កាយរណបជាច្រើនដែលកំពុងស្ថិតនៅគន្លងតារាវិថីរបស់ភពផែនដី ព្រមទាំងភពដទៃផ្សេងទៀត ក្នុងប្រព័ន្ធព្រះអាទិត្យ ធ្វើដំណើរក្នុងល្បឿនរាប់ពាន់គីឡូម៉ែត្រក្នុងមួយម៉ោង ហើយបេសកកម្មរបស់ពួកវាមានរយៈពេលរាប់ឆ្នាំ និងខ្លះទៀតដល់ទៅរាប់ទសវត្សរ៍ថែមទៀតផង។ ផ្កាយរណបទាំងអស់នោះ ត្រូវបានរចនា និងកសាងឡើង ក្នុងគោលបំណងឲ្យពួកវាអាចបំពេញបេសកកម្ម បានដោយខ្លួនឯងនៅទីអវកាស ក៏ប៉ុន្តែមានសំណួរចោទសួរថា តើទីភ្នាក់ងារអវកាសនានា ធ្វើការថែទាំ ផ្គត់ផ្គង់ និងជួលជុលពួកវាដោយរបៀបណាខ្លះនោះ ប្រសិនបើផ្នែករបស់ផ្កាយរណបទាំងនោះរងការខូចខាត ឬមួយក៏ពួកវាជិតអស់ប្រេងឥន្ទនៈជាដើម។ នេះបើតាមការដកស្រង់ការផ្សាយចេញពីវែបសាយវិទ្យាសាស្រ្ត Live Science នៅល្ងាចថ្ងៃអង្គារ ទី២៧ ខែមិថុនា ឆ្នាំ២០១៧។
សម្រាប់ករណីទាំងនោះគឺគ្រឿងយន្តអវកាស ឬរ៉ូបូតមានតួនាទីជាអ្នកដោះស្រាយ។ នៅក្នុងវេទិកាពិភាក្សាអវកាស «Robots in Space» ដែលបានប្រព្រឹត្តទៅកាលពីពេលថ្មីៗនេះ ក្រុមអ្នកវិទ្យាសាស្រ្តមកពីទីភ្នាក់ងារអវកាសអាមេរិក NASA បានធ្វើការពន្យល់បកស្រាយអំពីរបៀបដែលក្រុមវិស្វករជំនាញកំពុងររចនារ៉ូបូត ឲ្យអនុវត្តន៍ និងបំពេញនូវកិច្ចការដ៏ជាក់លាក់ និងហាក់បីដូចជាមិនអាចទៅរួច នៅក្នុងទីអវកាស។ តួយ៉ាងការបញ្ចូលប្រេងទៅឲ្យផ្កាយរណប ដែលកំពុងធ្វើដំណើរក្នុងល្បឿនរាប់ពាន់គីឡូម៉ែត្រជាដើម។
ជាមួយគ្នានេះអង្គការ NASA ក៏បានបង្ហាញឲ្យឃើញពីគំរូនៃរ៉ូបូតអវកាសមានឈ្មោះថា Raven ជាផ្នែកនៃបេសកកម្មមួយ ដែលនឹងមានសមត្ថភាពក្នុងការតាមរក កំណត់ទីតាំង និងបញ្ចូលប្រេងទៅឲ្យយានអវកាសស្វ័យប្រវត្តិ ដោយរួមបញ្ចូលទាំងបណ្តាផ្កាយរណប ដែលពុំត្រូវបានរចនាឡើងឲ្យបំពេញប្រតិបត្តិការនៅក្នុងទីអវកាសផងដែរ។ បេសកកម្មនោះមានឈ្មោះថា Restore-L ត្រូវបានគេរំពឹងថា នឹងចាប់ផ្តើមនៅក្នុងឆ្នាំ២០២០។
រ៉ូបូត Raven នាពេលថ្មីៗនេះ ត្រូវបានគេបញ្ជូនទៅកាន់ស្ថានីយ៍អវកាសអន្តរជាតិ (ISS) ដើម្បីប្រមូលទិន្នន័យ។ តាមរយៈការត្រួតពិនិត្យទៅលើស្ថានីយ ISS ជាមួយ Sensor ចំនួនបីរបស់វា នៅពេល Raven ឆ្ពោះទៅកាន់ ចូលចត និងចាកចេញមកវិញពីស្ថានីយ៍អវកាសនោះ រ៉ូបូតមួយនេះប្រមូលបានព័ត៌មានល្អៗ និងពោរពេញដោយសារៈប្រយោជន៍ជាច្រើន ទាក់ទងនឹងការធ្វើចលនារបស់ស្ថានីយ៍ ISS ដែលនឹងជួយដល់ក្រុមវិស្វកររបស់ NASA ក្នុងការរៀបចំវាដើម្បីកំណត់ទីតាំង និងតាមរកផ្កាយរណបដែលធ្វើដំណើរក្នុងល្បឿនដ៏សែនលឿន។
ចាប់តាំងពីការចាប់ផ្តើមនៃកម្មវិធីអវកាសរបស់សហរដ្ឋអាមេរិកមក ផ្កាយរណបសរុបប្រហែល ៥,០០០គ្រឿង ត្រូវបានរចនា និងកសាងឡើង ដោយក្នុងចំណោមនោះប្រមាណ ១,៤០០ កំពុងស្ថិតក្នុងគន្លងគោរចរបស់ផែនដី រួមទាំងភពដទៃផ្សេងទៀត នៃប្រព័ន្ធព្រះអាទិត្យរបស់យើងនាពេលបច្ចុប្បន្ននេះ។ ក្នុងចំណោមនោះទៀតសោត មានផ្កាយរណបតែមួយប៉ុណ្ណោះ ដែលត្រូវបានរចនាឡើង ដើម្បីអាចឲ្យបញ្ចូលឥន្ធនៈបានគឺស្ថានីយ៍អវកាសអន្តរជាតិ ISS។
គួរបញ្ជាក់ថា យោងតាមអង្គការ NASA ការរចនាផ្កាយរណបនាពេលបច្ចុប្បន្ន និងអនាគត នឹងមានភាពប្រសើរឡើង ហើយផ្តល់ភាពងាយស្រួលក្នុងការទទួលការថែទាំនានានៅទីអវកាស ក៏ប៉ុន្តែបេសកកម្ម ឬយានអវកាស Restore-L នឹងធ្វើការសាកល្បងពិសេសៗមួយចំនួន ទាក់ទិននឹងបញ្ហារបស់បណ្តាផ្កាយរណបជំនាន់មុនៗ៕
