(អាមេរិក)៖ ក្រុមអ្នកវិទ្យាសាស្ត្រអន្តរជាតិមានការងឿងឆ្ងល់ជាខ្លាំង ក្រោយប្រហោងខ្មៅ (Black Hole) ដែលមានម៉ាសធំជាងព្រះអាទិត្យយើងប្រហែល ៦៨ដងនោះ ត្រូវបានរកឃើញនៅក្នុងកាឡាក់ស៊ីមាលគីវេយ៍ ដោយតេឡេស្កូបមានមូលដ្ឋានក្នុងប្រទេសចិន ខណៈប្រភពនៃការចាប់កំណើតរបស់វា គឺកំពុងក្លាយជាក្តីចម្ងល់ដែលត្រូវការការបកស្រាយ។ នេះបើតាមការចេញផ្សាយដោយ Space នាថ្ងៃចន្ទ ទី០២ ខែធ្នូ ឆ្នាំ២០១៩។
ជាធម្មតាប្រហោងខ្មៅនានានៅក្នុងកាឡាក់ស៊ី Milky Way ត្រូវបានគេអះអាងថា មានម៉ាសធំជាងព្រះអាទិត្យចាប់ពី ៣ដង ទៅដល់ ២៥ដងប៉ុណ្ណោះ ហើយមានតែប្រហោងខ្មៅមហាយក្ស (Supermassive Black Hole) ដែលស្ថិតនៅកណ្តាលកាឡាក់ស៊ីយើងឈ្មោះ Sagittarius A* ប៉ុណ្ណោះ ទើបមានម៉ាសធំជាងព្រះអាទិត្យរាប់លានដង ឬពាន់លានដងក៏ថាបាន ព្រោះវាកម្លាំងចលករដែលដឹកនាំកាឡាក់ស៊ីនេះ។
ប៉ុន្តែសម្រាប់ប្រហោងខ្មៅយក្ស LB1 ដែលត្រូវបានរកឃើញដោយក្រុមអ្នកវិទ្យាសាស្ត្រ ដឹកនាំដោយចិនវិញនោះ វាហាក់ស្ថិតនៅក្នុងទំហំធំលើសពីអ្វីដែលអាចកើតឡើង ឬក៏មិនដឹងថា តើតារាធំប្រភេទណាមួយ ដែលបានបង្កើតវាឡើងបែបនេះ។ អ្នកវិទ្យាសាស្ត្រដែលដឹកនាំក្រុមការងារ នៃមជ្ឈមណ្ឌលអង្កេតតារាសាស្ត្រ និងវិទ្យាសាស្ត្រជាតិចិនលោក Jifeng Liu បានលើកឡើងយ៉ាងដូច្នេះថា «ប្រហោងខ្មៅក្នុងទំហំធំបែបនេះ មិនគួរណាមានវត្តមានក្នុងកាឡាក់ស៊ីយើងទេ នេះបើយោងតាមទ្រឹស្តីនៃការកកើតប្រហោងខ្មៅ ដែលត្រូវបានគ្រប់គ្នាសិក្សាកន្លងមក…»។
គួរបញ្ជាក់ថា បើតាមក្រុមអ្នកវិទ្យាសាស្ត្រ និងតារាវិទូកន្លងមក ប្រហោងខ្មៅដែលកកើតឡើង នៅក្នុងកាឡាក់ស៊ីរបស់យើង ឧទាហរណ៍ប្រហោងខ្មៅដែលមានម៉ាសធំជាងព្រះអាទិត្យ ២៥ដង គឺវាត្រូវបានបង្កើតឡើងដោយការផ្ទុះនៃតារាយក្សមួយ ដែលមានទំហំធំខ្លាំងជាងព្រះអាទិត្យយើងដែរ។ តើហេតុអ្វី? មូលហេតុនោះគឺនៅពេលតារាយក្សទាំងនោះផ្ទុះវានឹងបង្កទៅចលនាកញ្ជ្រោលនៃភាគល្អិត និងសារធាតុគីមីនានា ហើយវិវឌ្ឍទៅជាខ្យល់កួចពណ៌ខ្មៅក្នុងកាឡាក់ស៊ី (Black Hole) នោះតែម្តង។ ប៉ុន្តែសម្រាប់LB1 ដែលមានទំហំធំជិត ៣ នៃប្រហោងខ្មៅដែលគួរមានវត្តមាន នៅក្នុងកាឡាក់ស៊ីយើងនេះវិញ គឺត្រូវការពារពេលវេលាបន្ថែមទៀតហើយ ដើម្បីសិក្សា និងបកស្រាយ៕
