តោះ! មកស្គាល់ត្រួសៗពី «ផ្កាយកូនមាន់» ឬ «បងប្អូនស្រី Aka ទាំង៧ដួង» ដែលស្ថិតនៅរាប់រយឆ្នាំពន្លឺពីផែនដី! (ភាគទី១)
(ភ្នំពេញ)៖ បងប្អូនជាច្រើនបានសួរមកកាន់ Cambo Space អំពីផ្កាយកូនមាន់ ឬកញ្ចុំដែលយើងមើលទៅ ឃើញមានផ្កាយតូចៗប្រមូលផ្តុំគ្នាយ៉ាងចម្លែក និងអាចមើលឃើញច្បាស់ចាប់ពីវេលាម៉ោង ៩៖០០នាទីយប់តទៅនៅពេលមេឃស្រឡះ។ វាត្រូវបានខ្មែរពីបុរាណដាក់ឈ្មោះឲ្យថា «ផ្កាយកូនមាន់» និងលោកខាងលិចឲ្យឈ្មោះថា Aka 7 sisters (បងប្អូនស្រី Aka ទាំង៧ដួង) ឬជាឈ្មោះផ្លូវការរបស់តារាវិទូហៅថា Pleiades Star Cluster ស្ថិតនៅចម្ងាយជាង ៤៤០ឆ្នាំពន្លឺពីភពផែនដី។
បងប្អូនស្រីទាំង ៧ ខាងលើនេះមានឈ្មោះថា Maia, Electra, Alcyone, Taygete, Asterope, Celaeno និង Merope។ ទោះបីជាខ្មែរពីបុរាណហៅកញ្ចុំផ្កាយនេះថា ផ្កាយកូនមាន់ដោយយោងលើទិដ្ឋភាព ដែលវាបង្ហាញចេញលើផ្ទៃមេឃក៏ដោយ តែជាតិសាសន៍មួយចំនួនដូចជាលោកខាងលិច បានមើលឃើញវាចេញជារាងសត្វដាយណូស័រតូចមួយដែលមានកវែង និងជើងចំនួន ៤ រួមទាំងខ្លួនទៅវិញ។
ដោយឡែកការដាក់ឈ្មោះកញ្ចុំផ្កាយ Pleiades ថាជាបងប្អូនស្រីទាំង ៧ នោះគឺយោងទៅលើទេវកថាក្រិចពីបុរាណ ស្តីអំពីកូនស្រីទាំង ៧នាក់របស់ Atlas ជាសមាជិកនៃគ្រួសារ Titan ដ៏ធំមហិមាដែលគ្រប់គ្រងមេឃ និងមហាសមុទ្រ ព្រមទាំងមានការពាក់ព័ន្ធទៅនឹងប្រព័ន្ធផ្កាយក្បែរខាងផ្សេងទៀតយ៉ាងស្មុគស្មាញ តែយកទៅតាមដំណើររឿងទេវកថាក្រិចទាំងអស់។
ចូលមកដល់ចំណុចសំខាន់វិញ ដែលនេះមិនមែនជារឿងព្រេងនិទានទៀតឡើយ។ កញ្ចុំផ្កាយកូនមាន់ ឬ Pleiades Star Cluster មិនមែនមានផ្កាយចំនួន ៧ ដួងដូចរឿងព្រេងនិទានឡើយ។ ក្រុមតារាវិទូអន្តរជាតិដែលបានសិក្សាកន្លងមកនេះ បានប៉ាន់ប្រមាណថា ផ្កាយតូចធំយ៉ាងហោចណាស់ជាង ៨០០ដួង និងប្រភពខ្លះទៀតថា មានរហូតដល់ ៣,០០០ដួងឯណោះកំពុងស្ថិតនៅក្នុង Pleiades Star Cluster ដែលពោពេញដោយពពកធូលីអវកាស មានអាយុកាលជាង ១០០លានឆ្នាំមកហើយ។
ដោយសារតែវាស្ថិតនៅចម្ងាយជាង ៤៤០ឆ្នាំពន្លឺពីយើង ដូច្នេះពន្លឺរបស់វាក៏ថមថយទៅតាមហ្នឹងដែរ ប៉ុន្តែភាពពិតជាន់ស្តែង Pleiades Star Cluster អាចបញ្ចេញពន្លឺរួមគ្នាខ្លាំងជាងព្រះអាទិត្យយើង រហូតដល់ទៅរាប់រយរាប់ពាន់ដងឯណោះ។ ភាពពិតជាក់ស្តែងមួយទៀត ទោះបីត្រូវរឿងព្រេងបុរាណហៅថា បងប្អូនស្រីទាំង ៧ ដួងក៏ដោយ តែភ្នែកមនុស្សអាចមើលឃើញផ្កាយតែ ៦ ដួងប៉ុណ្ណោះដែលបញ្ចេញពន្លឺភ្លឺច្បាស់ជាងគេ ក្នុងចំណោមផ្កាយរាប់រយដួងផ្សេងទៀត។
សូមរង់ចាំតាមដានភាគទី ២ ដែលជាភាគបញ្ចប់ក្នុងពេលឆាប់ៗខាងមុខ៕
ប្រភព៖ earthsky.org និង nineplanets.org (ថ្ងៃអង្គារ ទី២៤ ខែធ្នូ ឆ្នាំ២០១៩)
ប្រែសម្រួល៖ Cambo Space
