មនុស្សបន្សល់ទុកសំរាម ៥សែនបំណែកនៅទីអវកាស! ពេលនេះ «អង្គការ NASA គ្រោងបញ្ជូនរ៉ូបូត ទៅបោសសម្អាតចេញពីគន្លងផែនដី!»
បរទេស៖ អង្គការ NASA សហការជាមួយសាកលវិទ្យាល័យអាមេរិក Stanford បានធ្វើការអភិវឌ្ឍប្រភេទរ៉ូបូតថ្មីមួយ ដើម្បីជួយបោសសម្អាតសំរាមអវកាសដ៏ច្រើនសន្ធឹកសន្ធាប់ ចេញពីគន្លងជុំវិញភពផែនដី។ នេះបើតាមការដកស្រង់ការផ្សាយចេញពីសារព័ត៌មាន Telegraph នៅរសៀលថ្ងៃព្រហស្បតិ៍ ទី២៩ ខែមិថុនា ឆ្នាំ២០១៧។
បច្ចុប្បន្ននេះមានម្ទេចកម្ទីរនៃវត្ថុ ដែលផលិតឡើងដោយមនុស្សប្រមាណ ៥០០,០០០បំណែក កំពុលតែលតោលជុំវិញភពរបស់យើង នៅក្នុងល្បឿនមិនសូវជាយឺតប៉ុន្មាននោះឡើយ ពោលគឺជិត ៣០,០០០គីឡូម៉ែត្រក្នុងមួយឯណោះ ហើយអ្នកជំនាញជាច្រើនបានព្យាការណ៍ថា ប្រសិនបើបញ្ហាដ៏សំខាន់នេះ នៅតែមិនត្រូវបានដោះស្រាយឲ្យបានឆាប់ទេនោះ វាអាចបង្កការរះរាំងស្ទះដល់បេសកកម្មទៅកាន់ទីអវកាសនាពេលអនាគតខាងមុខបាន។ កាកសំណល់ទាំងនោះ រួមមានផ្កាយរណបខូចៗ កម្ទេចកម្ទីរនៃយានអវកាស, និងបំណែកគ្រាប់រ៉ុក្កែតដែលប្រើប្រាស់រួចជាដើម បានបង្កការគំរាមកំហែងរួចជាស្រេចដល់ ប្រព័ន្ធទូរគមនាគន៍ យានអវកាស និងក្រុមអវកាសយានិករួចបាត់ទៅហើយ។
ដោយឡែកការចាប់ប្រមូលយកសំរាមទាំងនោះ គឺពុំមែនជាកិច្ចការងាយស្រួលនៅក្នុងលំហអាកាសឡើយ ដោយសារតែសារធាតុចាំបាច់មួយចំនួន មិនដំណើរការ ឬមានប្រសិទ្ធភាពនៅក្នុងទីអវកាសនោះទេ។ ក៏ប៉ុន្តែ NASA និងសាកលវិទ្យាល័យ អំឡុងពេលជាច្រើនឆ្នាំកន្លងមកនេះ បានសម្ងំអភិវឌ្ឍន៍ម៉ាស៊ីនរ៉ូបូតស៊េរីថ្មីមួយប្រភេទ ដើម្បីជួយសម្រួល ក៏ដូចជាដោះស្រាយបញ្ហាបោសសម្អាតសំរាមអវកាសនេះ។ រ៉ូបូតនោះត្រូវបានរចនាឡើង ដោយយកតាមលំនាំជើងរបស់សត្វតុកកែ ដែលអាចនៅជាប់នឹងជញ្ជាំងបាន។
រ៉ូបូតដែលប្រភេទចាប់យកនោះ ត្រូវបានចាប់ផ្តើមអភិវឌ្ឍន៍ឡើងចាប់តាំងពីប្រមាណជា ១០ឆ្នាំមុនមកម្ល៉េះ ហើយក្រុមការងារនៃគម្រោងនេះ ក៏បានបញ្ជូនម៉ាស៊ីនរ៉ូបូតនោះឡើងទៅកាន់ស្ថានីយ៍អវកាសអន្តរជាតិ (ISS) ផងដែរ ហើយពួកមានការពេញចិត្ត និងត្រេកអរជាខ្លាំងជាមួយនិងលទ្ធផលដែលទទួលបាន។ ចំណែកជំហានបន្ទាប់ទៀតវិញ គឺសាកល្បងឧបករណ៍បោសសម្អាតសំរាមអវកាសនេះ នៅក្នុងលំហអាកាសផ្ទាល់តែម្តង។
គួរបញ្ជាក់ថា អង្គការ NASA និងសាកលវិទ្យាល័យ Standford ក៏កំពុងតែធ្វើការទៅលើជំនាន់ថ្មីមួយផ្សេងទៀត នៃឧបករណ៍រ៉ូបូតនេះ ដែលមានសមត្ថភាពអាចធន់នឹងកម្រិតវិទ្យុសកម្មដ៏ខ្ពស់ៗ នៅទីអវកាសបានផងដែរ៕
