នៅចុងឆ្នាំ២០១៨ «អង្គការ NASA នឹងបាញ់បង្ហោះ James Webb» ដែលមានសមត្ថភាពគណនា សមាសធាតុផ្សំនៃបរិយាកាសរបស់ភពអេលៀន!
(វ៉ាស៊ីនតោន)៖ កែវយឺតអវកាស James Webb របស់ទីភ្នាក់ងារអវកាស NASA បានឆ្លងផុតការធ្វើតេស្តលើកទីមួយ នៃប្រព័ន្ធទាក់ទងរបស់វាយ៉ាងងាយស្រួល មុនពេលវាត្រូវបាញ់បង្ហោះ ទៅកាន់ទីអវកាសនាឆ្នាំ២០១៨ ខាងមុខ។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅរសៀលថ្ងៃពុធ ទី០២ ខែសីហា ឆ្នាំ២០១៧។
យោងតាមអង្គការ NASA ការធ្វើតេស្តមានឈ្មោះជាផ្លូវការថា Ground Segment Test Number 1 ឬ GSEG-1 បានបញ្ចប់ទៅដោយជោគជ័យកាលពីថ្ងៃទី២០ ខែមិថុនាកន្លងទៅ ហើយប្រព័ន្ធទាក់ទងរវាងកែវយឺតប្រភេទថ្មីនេះ និងមជ្ឈមណ្ឌលប្រតិបត្តិការបេសកកម្មរបស់វា បានប្រព្រឹត្តទៅតាមការគ្រោងទុកទាំងអស់។
គ្រោងនឹងត្រូវបាញ់បង្ហោះចេញពីក្រុង Kourou នៃតំបន់ French Guiana ដែនដីរបស់បារាំង ដែលស្ថិតនៅភាគខាងជើង នៃតំបន់អាមេរិកខាងត្បូងនោះ កែវយឺតអវកាស James Webb នឹងធ្វើដំណើរផ្សងព្រេងដ៏អស្ចារ្យមួយ ដើម្បីបកស្រាយអាថ៌កំបាំងនៃចក្រវាឡ។ យ៉ាងណាមិញ James Webb ដែលត្រូវគេចាត់ទុកជាអ្នកស្នងតំណែងបន្ត ពីកែវយឺតអវកាស Hubble នោះ គឺជាឧបករណ៍អង្កេតមើលទីអវកាសដ៏ទំនើបជាងគេបំផុតលើលោក ហើយវានឹងត្រូវឆ្លងកាត់ការធ្វើតេស្តប្រព័ន្ធទាក់ទងលើកទីពីរ នៅរយៈពេលមួយខែ មុនកាលបរិច្ឆេទនៃការបាញ់បង្ហោះរបស់វានៅចុងឆ្នាំ២០១៨។
គួរបញ្ជាក់ថា James Webb បានគ្រោងបាញ់បង្ហោះតាំងពីឆ្នាំ២០១៥មកម្ល៉េះ ប៉ុន្តែវាត្រូវបានពន្យាពេលជារឿយៗ ដោយសារតែ NASA ព្យាយាមបំពេញចន្លោះប្រហោងជាច្រើន។ កែវយឺតអវកាស ដែលមានទំហំប៉ុនកូនទីលានវាយថេនីសមួយនេះ នឹងមានសមត្ថភាពក្នុងការគណនា សមាសធាតុផ្សំ នៃបរិយាកាសរបស់ភព ដែលស្ថិតនៅក្នុងប្រព័ន្ធផ្កាយផ្សេង ដែល Kepler ជាអ្នករកឃើញកន្លងមក៕
