អ្នកវិទ្យាសាស្ត្ររកឃើញ «ភពថ្មី» មួយទៀតហើយ ដែលក្នុងបរិយាកាសរបស់វា អាចសំបូរទៅដោយទឹក

(បរទេស)៖ ក្រុមអ្នកវិទ្យាសាស្រ្តទើបតែបានរកឃើញ ភពប្លែកមួយគួរឲ្យចាប់អារម្មណ៍ ដែលស្ថិតនៅចម្ងាយ ៩០ឆ្នាំពន្លឺពីយើង ក្រោយការពិនិត្យទិន្នន័យ ដែលទទួលបានពីកែវយឺតអវកាស NASA របស់អង្គការ NASA។ ភពនេះថែមទាំងអាចធ្វើជាគន្លឹះ ឲ្យក្រុមអ្នកវិទ្យាសាស្ត្រឈានទៅសិក្សា អំពីភពផ្សេងៗទៀតដែលមានលាក់ ជីវិតអេលៀន (Alien) ក្នុងទម្រង់ណាមួយផងដែរ។

ក្រុមអ្នកស្រាវជ្រាវមកពីមន្ទីរពិសោធន៍ JPL នៃទីភ្នាក់ងារអវកាសអាមេរិក NASA និងសាកលវិទ្យាល័យរដ្ឋ New Mexico បានរកឃើញភពមួយ មានឈ្មោះសម្គាល់ថា TOI-1231 b ដែលវិលជុំវិញផ្កាយក្រហមមួយប្រភេទ red dwarf ហើយពួកគេថែមទាំងអាចប្រមូលបាន ទិន្នន័យចាំបាច់អំពីពួកវា ដែលជួយក្នុងការកំណត់លក្ខណៈរបស់ផ្កាយ រួមជាមួយអង្កត់ផ្ចិត និងម៉ាសរបស់ភពនោះ ហើយធ្វើសកម្មតិកម្មអំពីកម្រាស់ និងសមាសធាតុផ្សំនៃស្រទាប់បរិយាកាសរបស់ភព TOI-1231 b ផងដែរ។

ទំហំរបស់ភព TOI-1231 b ត្រូវបានចាត់ថ្នាក់ជា sub-Neptune គឺជាលំដាប់ភពដែលមានអង្កត់ផ្ចិតតូចជាង តែអាចមានម៉ាសធំជាងភពណិបទូន ឬជាភពដែលមានអង្កត់ផ្ចិតធំជាង តែអាចមានម៉ាសតូចជាងណិបទូន។ ភព TOI-1231 b ប្រើពេល ២៤ថ្ងៃ ដើម្បីគោចរជុំវិញផ្កាយរបស់វាបានមួយជុំ គម្លាតនៃដំណើរនោះ គឺកៀកជាងគម្លាតរវាងផែនដី និងព្រះអាទិត្យ ៨ដង ប៉ុន្តែសីតុណ្ហភាពរបស់វា មានលក្ខណៈស្រដៀងនឹងភពយើងដែរ ដោយសម្អាងថាផ្កាយ red dwarf បញ្ចេញថាមពលកម្តៅចាញ់ផ្កាយដូចជាព្រះអាទិត្យយើង។

យោងតាមការគណនា បរិយាកាសរបស់ភព TOI-1231 b មានកម្រិតសីតុណ្ហភាពប្រហែល ៥០-៦០អង្សាសេប៉ុណ្ណោះ។ ក្រុមអ្នកវិទ្យាសាស្រ្តសង្ស័យថា នៅលើផ្ទៃមេឃនៃភពនោះ អាចមានពពកដែលកកើតឡើងពីទឹកថែមទៀតផង។ នៅថ្ងៃអនាគតក្រុមអ្នកវិទ្យាសាស្ត្ររំពឹងថា នឹងអាចឈានទៅសិក្សាដឹង អំពីរបៀបដែលទឹកអាចប្រមូលផ្តុំ នៅក្នុងបរិយាកាសភព TOI-1231 b នោះ៕

ប្រែសម្រួល៖ Cambo Space
ប្រភព៖ Independent (ថ្ងៃសុក្រ ទី១១ ខែមិថុនា ឆ្នាំ២០២១)