ធ្លាប់ទស្សនាទេ? ខ្សែភាពយន្តអវកាសមួយនេះ «ធ្វើឲ្យបងប្អូនច្រឡំថាជាការពិត» តែវាជាគ្រាន់តែការប្រឌិត បែបវិទ្យាសាស្ត្រប៉ុណ្ណោះ!
ភ្នំពេញ៖ ភាពយន្តបែបវិទ្យាសាស្ត្រ និងអវកាសពិតជាមានច្រើនណាស់ ប៉ុន្តែភាគច្រើនគឺបានបង្ហាញពីភាពប្រឌិតជ្រុល និងគ្រាន់តែជាការធ្វើឲ្យអ្នកទស្សនាភិតភ័យ ឬរំភើបរីករាយចំពោះទិដ្ឋភាពប្រឌិតទាំងនោះប៉ុណ្ណោះ ប៉ុន្តែសម្រាប់ខ្សែភាពយន្ត ដែលជាការស្រមៃបែបវិទ្យាសាស្ត្រ ដោយយោងទៅលើភាពប្រាកដនិយម និងទស្សនវិស័យទៅថ្ងៃអនាគត ដែលនឹងអាចធ្វើវាកើតមានឡើងនោះ គឺកម្រមានឲ្យទស្សនាឲ្យបានជក់ចិត្តណាស់។
ថ្ងៃនេះ Cambo Space សូមនាំបងប្អូន ទៅទស្សនាខ្សែភាពយន្តឯកសារ ដែលត្រូវបានផលិតដោយទូរទស្សន៍ BBC កាលពី ១៣ឆ្នាំមុន នោះគឺ «Space Odyssey Man Voyage to the Planets» ដែលរៀបរាប់អំពីអវកាសយានិកប្រុសស្រីចំនួន ០៥រូប ដែលសុខចិត្តប្រថុយជីវិតដើម្បីស្រាវជ្រាវនៅក្នុងប្រព័ន្ធព្រះអាទិត្យទាំងមូល ដោយស្ទើរតែមិនជឿថា ពួកគេអាចសម្រេចបានជោគជ័យ ប៉ុន្តែម្នាក់ក្នុងចំណោមនោះ បានបាត់បង់ជីវិតនៅភពសៅរ៍ ក្រោយពីបានទទួលរងការវាយប្រហារ ពីរលកវិទ្យុសកម្មព្រះអាទីត្យនៅលើភពអង្គារ។
ខាងក្រោមនេះជាចំណុចសំខាន់ៗទាំង ០៥ ដែលគួរឲ្យស្វែងយល់ពីសាច់រឿងទាំងមូល៖
១៖ តួអង្គទាំង ០៥រូប (ជាអវកាសយានិក អ្នកវិទ្យាសាស្ត្រ វេជ្ជបណ្ឌិត និង ជីវសាស្ត្រ) ត្រូវជិះនៅលើយានមួយដែលមានឈ្មោះថា Pegasus មានប្រវែងជាង ១គីឡូម៉ែត្រ ដែលផ្ទុកអ្វីៗគ្រប់យ៉ាងនៅលើនោះ ប្រៀបបាននឹងកូនភពមួយ ដែលពួកគេត្រូវរៀនរស់ ដាំដុះ ធ្វើបន្សុទ្ធកម្ម និងស្រាវជ្រាវ នៅរយៈពេល ០៦ ឆ្នាំនៅទីអវកាស។
២៖ ដំណើរចាប់ផ្តើមគឺ ពីផែនដីទៅ ភពសុក្រ, ភពអង្គារ, ព្រះអាទិត្យ, ភពព្រហស្បតិ៍, ព្រះច័ន្ទអាយអូ, ព្រះច័ន្ទយូរ៉ូប៉ា, ភពសៅរ៍, ព្រះច័ន្ទទីតាន, ខ្សែក្រវាត់ភពសោរ៍, ភពភ្លុយតូ, និងផ្កាយដុះកន្ទុយមួយផងដែរ។
៣៖ សម្រាប់ការចុះចតរបស់អ្នកទាំង ០៥នាក់ មានដូចជា ចុះចតលើ ភពសុក្រ, ភពអង្គារ, ព្រះច័ន្ទអាយអូរបស់ភពព្រហស្បតិ៍, ដុំថ្មនៃខ្សែក្រវាត់ភពសៅរ៍, ភពភ្លុយតូ, និងផ្កាយដុះកន្ទុយ។ សម្រាប់ការបញ្ជូនយានវិញ គឺចុះទៅលើ យូរ៉ប៉ា និងទីតាន បូកថែមនឹងការបំពាក់កែវយឺត និងផ្កាយរណបលើភពភ្លុយតូ ដើម្បីសិក្សាពីកាឡាក់ស៊ីឲ្យកាន់តែច្បាស់ជាងមុន។
៤៖ ភពដែលពិបាកចុះចតជាងគេ គឺភពអង្គារ និងសុក្រ។ សម្រាប់បេសកកម្មដែលបរាជ័យគឺនៅព្រះច័ន្ទអាយអូ ព្រោះរលកវិទ្យុសកម្មវាខ្លាំង ពិបាកក្នុងការស៊ូទ្រាំសម្រាប់អ្នកចុះទៅ។
៥៖ ដំណើររយៈពេល ០៦ ឆ្នាំនេះ គឺជាគោលដៅធំសម្រាប់ក្រុមអ្នកវិទ្យាសាស្ត្រ ដើម្បីស្វែងយល់ពីអ្វីៗគ្រប់យ៉ាង ក្នុងប្រព័ន្ធព្រះអាទិត្យ ជាពិសេសទីឋានដែលមនុស្សនឹងអាចតាំងទីលំនៅនៅរយៈពេល រាប់រយ រាប់ពាន់ រាប់ម៉ឺន ឬរាប់លានឆ្នាំទៅមុខ ដោយសារតែផែនដីនឹងមិនស្ថិតស្ថេរ យូរអង្វែងតទៀតឡើយ។
ដូច្នេះសូមបងប្អូនទស្សនាវីដអូក្នុងយូធូប ទាំងពីរ Links ភាគខាងក្រោមនេះ៖
https://www.youtube.com/watch?v=te4zBQG54fg
