NASA ទើបបង្ហោះផ្កាយរណបថ្មី, វាមានប្រយោជន៍តាមដាន បម្រែបម្រួលអាកាសធាតុភពផែនដី

(បរទេស)៖ នាថ្ងៃចន្ទដើមសប្តាហ៍នេះ ទីភ្នាក់ងារអវកាសអាមេរិក NASA ទើបតែបានបញ្ជូនផ្កាយរណប Landsat 9 ដែលជាផ្កាយរណបអង្កេតផែនដីថ្មី ចុងក្រោយបំផុតរបស់ខ្លួន ឡើងទៅកាន់ទីអវកាស។

ផ្កាយរណប Landsat 9 ត្រូវបានបាញ់បង្ហោះឡើងទីអវកាសដោយជោគជ័យ តាមរយៈគ្រាប់រ៉ុក្កែត Atlas V ចេញពីមូលដ្ឋានទ័ពយោធា Vandenberg នៃរដ្ឋ California។ ផ្កាយរណបថ្មីនេះ នឹងជួយបន្តការងារកត់ត្រារូបភាពពិភពលោក របស់ត្រកូលផ្កាយរណប Landsat ដែលមានរយៈពេលប្រមាណ ៥០ឆ្នាំមកហើយ។

ផ្កាយរណបខាងលើ នឹងជំនួសផ្កាយរណបចំណាស់ Landsat 7 ដែលបានធ្វើប្រតិបត្តិការនៅទីអវកាស តាំងពីឆ្នាំ១៩៩៩មក ហើយវានឹងធ្វើការរួមគ្នា ជាមួយផ្កាយរណប Landsat 8 ដែលត្រូវបានបង្ហោះ កាលពីឆ្នាំ២០១៣។ ពួកវានឹងផ្តិតយករូបភាព ផ្ទៃផែនដីទាំងមូលរៀងរាល់ ៨ថ្ងៃម្តង។

គួរបញ្ជាក់ថា ក្រុមផ្កាយរណប Landsat បានធ្វើការតាមដានផែនដី តាំងតែពីឆ្នាំ១៩៧២មកម៉្លេះ ហើយពួកវាបានផ្តល់ឲ្យអ្នកស្រាវជ្រាវជុំវិញពិភពលោក នូវកំណត់ត្រាទិន្នន័យនៃប្រព័ន្ធអេកូឡូស៊ី នៃភពរបស់យើងជាប់រហូត។ ទិន្នន័យបានមកពីត្រកូលផ្កាយរណប Landsat នេះ គឺជាធនធានដ៏សំខាន់បំផុតមួយ សម្រាប់ការងារឃ្លាំមើលបាតុភូតបម្រែបម្រួលអាកាសធាតុ៕

ប្រែសម្រួល៖ Cambo Space
ប្រភព៖ Space.com (ថ្ងៃអង្គារ ទី២៨ ខែកញ្ញា ឆ្នាំ២០២១)