យានជប៉ុន-អឺរ៉ុបឈ្មោះ BepiColombo ទើបហោះឆ្វែលភពពុធ និងផ្តិតបានទិដ្ឋភាពពិសេសៗ… (មានរូបភាព)
(អឺរ៉ុប)៖ យានអវកាស BepiColombo ដែលត្រូវបានអភិវឌ្ឍឡើងរួមគ្នាដោយ អង្គការអវកាសអឺរ៉ុប ESA និងជប៉ុន JAXA ទើបបានហោះឆ្វែលភពពុធ (Mercury) កាលពីថ្ងៃសៅរ៍ ទី០៩ ខែតុលា ឆ្នាំ២០២១ (ពេលវេលាលើផែនដី) និងបានផ្តិតយករូបភាពសំខាន់ៗមួយចំនួន អំពីភពស្ថិតដើមគេនៃប្រព័ន្ធព្រះអាទិត្យយើងនេះ នៅក្នុងរយៈចម្ងាយតែ ២០០គីឡូម៉ែត្រប៉ុណ្ណោះពីផ្ទៃរបស់វា។
យានអវកាស BepiColombo ត្រូវបានបាញ់បង្ហោះចេញពីមូលដ្ឋានរបស់អឺរ៉ុប ស្ថិតនៅតំបន់រដ្ឋបាលបារាំង ហ្គីយ៉ាណា (French Guiana) នៃទ្វីបអាមេរិកខាងត្បូង កាលពីអំលុងខែតុលា ឆ្នាំ២០១៨។ បេសកកម្មនេះមានផ្ទុកផ្កាយរណបចំនួន ០២គ្រឿង ដែលនឹងជួយគ្នាធ្វើការវាស់វែង ទៅលើបរិស្ថានរបស់ភពពុធក្នុងពេលព្រមគ្នាតែម្តង។ ក្នុងចំណោមផ្កាយរណបទាំងពីរគ្រឿងនោះ មួយជារបស់អឺរ៉ុបមានឈ្មោះថា MPO (Mercury Planetary Orbiter) និងមួយទៀតជារបស់ជប៉ុនមានឈ្មោះថា Mio (Mercury Magnetospheric Orbiter)។
ខាងលើនេះត្រឹមតែជាការហោះឆ្លងកាត់ (Fly By) ភពពុធប៉ុណ្ណោះ ហើយវានឹងធ្វើបែបនេះសរុប ៦លើក រហូតដល់ចុងឆ្នាំ២០២៥ ទើបវាហោះជ្រៀតចូលក្នុង គន្លងគោចរជុំវិញភពពុធតែម្តង។
អំលុងការហោះឆ្វែលកាលពីចុងសប្តាហ៍មុននេះ យានអវកាស BepiColombo បានផ្តិតយករូបភាពផ្ទៃភពពុធ ដែលមើលទៅមិនសូវខុសពី ផ្ទៃព្រះចន្ទរបស់ផែនដីយើងប៉ុន្មាននោះឡើយ។ កាមេរ៉ារបស់ BepiColombo បានផ្តិតយកទិដ្ឋភាពអឌ្ឍគោលខាងត្បូងភពពុធ នៅពេលព្រះអាទិត្យទើបរះលើតំបន់មួយឈ្មោះ Astrolabe Rupes ដែលយកឈ្មោះតាមនាវាស្រាវជ្រាវទ្វីបអង់តាកទិចរបស់បារាំង។
គួររំលឹកថា ក្រុមអ្នកវិទ្យាសាស្ត្រធ្លាប់បានបញ្ជូនយានស្រាវជ្រាវចំនួន ០២គ្រឿង ទៅកាន់ភពពុធ (Mercury)។ មួយគ្រឿងដំបូងឈ្មោះ Mariner 10 បានធ្វើការហោះឆ្វែលជាដដែលៗចំនួនប៉ុន្មានលើក កាលពីទសវត្សរ៍ទី៧០។ យានបន្ទាប់ទី០២ កាលពីប៉ុន្មានឆ្នាំមុន បានឈានដល់ទីបញ្ចប់នៃការបំពេញបេសកកម្មរបស់វា ហើយទម្លាក់ខ្លួនកម្ទេចចោល នៅលើផ្ទៃរបស់ភពពុធដូចទៅនឹងអ្វីដែលយាន Cassini នៅភពសៅរ៍ (Saturn) បានធ្វើដែរ ដោយវាមានឈ្មោះថា បេសកកម្ម MESSENGER។
យាន MESSENGER បានរកឃើញរឿងចម្លែកៗសឹងតែគ្រប់បែបយ៉ាង ស្តីអំពីភពពុធ ដោយក្នុងនោះមានតាំងពីផ្ទាំងទឹកក ដែលអាចរក្សាវត្តមាននៅលើភពនេះបាន ជាមួយនិងស៊ីតុណ្ហភាពដ៏ក្តៅបំផុត នៃផ្ទៃរបស់វា។ MESSENGER ក៏បានរកឃើញសមាសធាតុកាបូនដ៏ចម្លែក, សារធាតុកាល់ស្យូមដ៏ក្រាស់ខុសពីធម្មតា នៅផ្នែកយប់នៃភពនេះ, ព្រមទាំងដែនម៉ាញេទិចដ៏ខុសប្លែកមួយ និងរឿងជាច្រើនផ្សេងទៀតផងដែរ។
ភពពុធពុំមែនជាទីកន្លែង ដែលងាយស្រួលនឹងទៅដល់ឡើយ ដោយយាន MESSENGER ត្រូវចំណាយពេលធ្វើការហោះឆាប Flyby ដល់ទៅ ០៣លើក ដើម្បីអាចបង្អង់ល្បឿនរបស់វាបានគ្រប់គ្រាន់ ក្នុងការចូលទៅធ្វើគោចរនៅក្បែរ Mercury ហើយម៉្យាងវិញទៀត វាគឺជាបរិស្ថានក៏ដូចជាបរិយាកាសដ៏លំបាកមួយ ដោយសារតែវាហាក់ដូចជាអ្នកដុតនិងបង្កកយានអវកាសរបស់អ្នកចុះឡើងៗអីចឹង នៅទីនោះ ដែលជារឿងមិនល្អប៉ុន្មានឡើយ សម្រាប់គ្រឿងអេឡិចត្រូនិច។
ស្វែងយល់បន្ថែម៖ ភពពុធជាភពទី ១ ក្នុងប្រព័ន្ធព្រះអាទិត្យ និងមានចម្ងាយពីព្រះអាទិត្យ ៥៨លានគីឡូម៉ែត្រ ដោយប្រើពេលគោចរមួយជុំវិញតែ ៨៨ថ្ងៃប៉ុណ្ណោះ (ផែនដី ៣៦៥ថ្ងៃ)។ ភពនេះមានលក្ខណៈស្ទើរតែទាំងស្រុង ស្រដៀងនឹងព្រះច័ន្ទរបស់យើង (គ្មានបរិយាកាស គ្មានកម្លាំងទំនាញ និងផ្ទៃពណ៌សៗដូចផេះ)។ ទោះបីស្ថិតនៅជិតព្រះអាទិត្យជាងគេក្តី តែវាក៏មិនក្តៅជាងគេនោះដែរ (ភពសុក្រក្តៅជាង) ដោយកម្តៅលើផ្ទៃចំពោះមុខព្រះអាទិត្យជាង ៤០០អង្សាសេ ខណៈផ្ទៃមួយផ្នែកដែលងងឹត មានសីតុណ្ហភាពដករាប់រយអង្សាសេឯណោះ៕
ប្រែសម្រួល៖ Cambo Space
ប្រភព៖ Space.com (ថ្ងៃចន្ទ ទី១១ ខែតុលា ឆ្នាំ២០២១)
