បើអ្នកកំពុងស្នាក់នៅប៉ូលខាងត្បូងព្រះចន្ទ តើនឹងមើលឃើញផែនដីដូចម្តេច? NASA ទើបបង្កើតវីដេអូមួយ…

(បរទេស)៖ ទីភ្នាក់ងារអវកាសអាមេរិក NASA បានបញ្ចេញឃ្លីបវីដេអូខ្លីមួយ ដែលបង្ហាញពីទិដ្ឋភាពនៃភពផែនដី ហើយនិងព្រះអាទិត្យ នៅពេលយើងសំឡឹងមើលពួកវា ពីតំបន់ប៉ូលខាងត្បូងរបស់ព្រះចន្ទ។ ទស្សនាវីដេអូខាងក្រោមនេះ៖

កាមេរ៉ាសិប្បនិម្មិតក្នុងឃ្លីបវីដេអូខាងលើ ស្ថិតនៅក្បែរតំបន់រណ្តៅ ហ្សេកឡេថុន (Shackleton) នៃប៉ូលខាងត្បូងព្រះចន្ទ ហើយបែរសំដៅមករកផែនដី។ តំបន់នោះគឺប្រហាក់ប្រហែលគ្នា ជាមួយកន្លែងដែលទីភ្នាក់ងារ NASA មានគោលដៅបញ្ជូនមនុស្សឲ្យទៅស្រាវជ្រាវ តាមរយៈបេសកកម្ម Artemis។ NASA សង្ឃឹមថា នៅក្នុងទសវត្សរ៍ឆ្នាំ២០២០នេះ ក្រុមអវកាសយានិក នឹងអាចមើលទិដ្ឋភាពដូចក្នុងឃ្លីបវីដេអូ ដោយផ្ទាល់ភ្នែកជាក់ស្តែងតែម្តង។

សម្រាប់បេសកកម្ម Artemis 1 ទីភ្នាក់ងារអវកាស NASA នឹងបញ្ជូនយានគ្មានមនុស្សជិះ ឲ្យទៅធ្វើដំណើរសាកល្បងជុំវិញព្រះចន្ទ រួចត្រឡប់មកផែនដីវិញ។ បេសកកម្មនោះត្រូវបានគេរំពឹងថា នឹងធ្វើឡើងនៅខែកុម្ភៈ ឆ្នាំ២០២២។ សម្រាប់គម្រោងបេសកកម្មបន្ទាប់គឺ Artemis 2 យានមានផ្ទុកអវកាសយានិកចំនួនម្នាក់ នឹងធ្វើដំណើរទៅក្រឡឹងជុំវិញព្រះចន្ទ នៅឆ្នាំ២០៣៣។ ក្រោយមកបេសកកម្ម Artemis 3 នឹងជាការបញ្ជូនក្រុមអវកាសយានិក ឲ្យទៅចុះចតលើផ្ទៃព្រះចន្ទ នៅតំបន់ប៉ូលខាងត្បូងរបស់វា។

ទោះជាយ៉ាងណាក្តី កាលបរិច្ឆេទទាំងអស់នេះ អាចមានការប្រែប្រួលជាបន្តបន្ទាប់ទៀត ដោយយោងទៅតាមស្ថានភាពជាក់ស្តែង នៃដំណើរការអភិវឌ្ឍ និងថវិកា៕

ប្រែសម្រួល៖ Cambo Space
ប្រភព៖ Space.com (ថ្ងៃសៅរ៍ ទី៣០ ខែតុលា ឆ្នាំ២០២១)