មានគេបំផុសថា «វាជាសំណង់អេលៀន» តែអ្នកវិទ្យាសាស្ត្រថាមិនមែនទេ, ប៉ុន្តែតើវាជាអ្វី? (មានវីដេអូ)
(អាមេរិក)៖ ត្រឹមជារូបតាម Google Earth ប៉ុណ្ណោះ បានធ្វើឲ្យមនុស្សមួយចំនួន ជាពិសេសវែបសាយដែលតែងតាមដាន ព័ត៌មានអំពីមនុស្សក្រៅភព និងវត្ថុហោះហើរមិនស្គាល់អត្តសញ្ញាណ (UFO) បានបង្ហាញមន្ទិលសង្ស័យ និងអះអាងថា វាជាសំណង់របស់ពួកអេលៀន (Alien) ពីបុរាណ។ យ៉ាងណាក៏ដោយ ក្រុមអ្នកវិទ្យាសាស្ត្រផ្លូវការ បានចេញមុខអះអាងថា វាត្រឹមតែជាស្រទាប់ដីពើងឡើង ដែលមានរាងរង្វង់មូលតែប៉ុណ្ណោះ, មិនមែនជាសំណង់របស់ពួក Alien អ្វីនោះឡើយ។
រូបភាព Google Earth ខាងលើនេះ គឺស្ថិតនៅក្នុងដែនមហាសមុទ្រប៉ាស៊ីហ្វិកភាគខាងកើត ក្បែរនឹងឆ្នេរសមុទ្រប្រទេសប៉េរូ។ ក្រោយពីមានការចាប់អារម្មណ៍យ៉ាងផុសផុល អំពីរូបភាពនេះ, លោក Scott Waring ដែលជាម្ចាស់វែបសាយល្បីឈ្មោះខាងតាមដាន Alien នោះគឺ UFOsightingsdaily.com និងប្រភពស្រដៀងគ្នាមួយចំនួនទៀតបានចុះផ្សាយថា មានការជឿជាក់ ១០០% ថាដាននៅក្នុងរូបភាពនេះ គឺជាភស្តុតាងបញ្ជាក់អំពីវត្តមាន Alien ពីបុរាណ។
លោក Scott Waring ក៏ជាបុគ្គលដដែល ដែលធ្លាប់បានបំផុសថា រូបភាពមួយសន្លឹកនៅលើផ្ទៃភពអង្គារ ដែលត្រូវបានថតដោយយានរបស់អង្គការ NASA និងឃើញមានដុំថ្មស្រដៀងសត្វស្វានៅលើភពអង្គារនោះ គឺជាសត្វស្វាដែលបានស្លាប់ នៅក្នុងការប្រយុទ្ធគ្នាមួយលើភពក្រហមនោះ កាលពីរយៈពេល ១លានឆ្នាំមុន, ប៉ុន្តែតាមការពិតទៅ វាត្រឹមតែជាបាតុភូតធម្មជាតិ ដែលបានកើតឡើងលើភពអង្គារប៉ុណ្ណោះ។
ដោយឡែក, សម្រាប់រូបភាពពី Google Earth ថ្មីនេះវិញ គឺស្ថិតនៅក្បែរខ្សែបន្ទាត់ Nazca Lines របស់ប្រទេសប៉េរូ ដែលជាតំបន់ត្រូវបានកសាងឡើងដោយជនជាតិដើម Nazca កាលពី ២,០០០ឆ្នាំមុន។ តំបន់នេះហើយ គឺជាចំណុចក្តៅនៃការបង្កើតពាក្យចចាមអារ៉ាមឡើង ដោយខ្លះបានពោលដោយបំផុសបំផុលថា ពួក Alien ដែលបានមកដល់ភពផែនដីពីបុរាណ បានជួយជនជាតិ Nazca កសាងតំបន់នេះឡើង។
* តើការពិតគឺជាអ្វី?
បើតាមក្រុមអ្នកវិទ្យាសាស្ត្រ, តំបន់រាងមូលពើងឡើងដូចក្នុងរូបភាពពី Google Earth ខាងលើនេះមានមុខកាត់ ៦.៨គីឡូម៉ែត្រ ហើយវានៅតែអាចឲ្យគេមើលឃើញពីឆ្នេរសមុទ្រ នៃទីក្រុងលីម៉ារបស់ប៉េរូ បើទោះបីជាស្ថិតនៅក្នុងរយៈចម្ងាយ ៥៦៦គីឡូម៉ែត្រពីគ្នាក្តី។ ក្រុមអ្នកវិទ្យាសាស្ត្របានសន្និដ្ឋានថា វាទំនងជាបាតុភូតពំនើងដីបាតសមុទ្រ ឬដូចជាទីទួល ឬភ្នំបាតសមុទ្រផ្សេងៗទៀតប៉ុណ្ណោះ គ្រាន់តែលក្ខណៈពិសេសរបស់វា គឺមានរាងមូលប្លែកពីគេហ្នឹងឯង។
បន្ថែមពីនេះ, បើតាមក្រុមអ្នកជំនាញខាងផែនទីរបស់ Google បានបកស្រាយថា ផែនទីរបស់ពួកគេបានកើតចេញពី ការយកទិន្ន័យតំបន់ផ្សេងៗគ្នាមកផ្គុំចូលគ្នា, ដូច្នេះតំបន់ខ្លះនៅពេលទិន្នន័យរូបភាព ត្រូវបានដាក់ផ្សាភ្ជាប់គ្នាឲ្យចេញជាផែនទីតែមួយ វាអាចបង្កើតចេញជារូបរាងចម្លែកៗ ខុសពីទម្រង់ដើមជាក់ស្តែងខ្លះៗ ដូចអ្វីដែលធ្លាប់បានកើតមានរួចមកហើយ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ Space.com (ថ្ងៃសុក្រ ទី២៥ ខែមីនា ឆ្នាំ២០២២)
