តើអ្នកគាំទ្រចិន ឬអាមេរិកទៅភពអង្គារ? «ទស្សនាទឹកដីចិនស្រដៀងនឹងភពព្រះអង្គារបំផុត» ដែលចិនប្រើប្រាស់ដើម្បីពិសោធន៍ និងត្រៀមធ្វើបេសកកម្មជាក់ស្តែង!
(ប៉េកាំង)៖ ខាងក្រោមនេះ គឺជារូបភាពស្តែងឲ្យឃើញពី មូលដ្ឋានសិប្បនិម្មិតស្រដៀងនឹងភពព្រះអង្គារ (Mars) នាពេលអនាគតរបស់ចិន នៅតំបន់ Hongya (Red Cliff) នៃតំបន់ស្វយ័ត Haixi Mongolian និង Tibetan ក្នុងខេត្ត Qinghai ភាគពាយ័ព្យប្រទេសចិន។
គេរំពឹងថា ថវិកាប្រមាណ ៤០០លានយ័ន ស្មើនឹង ៦១លានដុល្លារ នឹងត្រូវបណ្តាក់ទុនវិនិយោគ ទៅក្នុងមូលដ្ឋានស្រាវជ្រាវវិទ្យាសាស្រ្តភពអង្គារ ក៏ដូចជាទីតាំងអេកូទេសចរណ៍ខាងលើ។ តំបន់ដែលពោពេញដោយថ្មក្រហមនេះ ត្រូវបានអ្នករាល់គ្នាស្គាល់ថា ជាកន្លែងស្រដៀងទៅនឹងភពព្រះអង្គារជាងគេបង្អស់ នៅលើភពផែនដី ដោយសារតែលក្ខណៈធម្មជាតិ, ទេសភាព, និងអាកាសធាតុ គឺមានសភាពប្រហាក់ប្រហែលទៅនឹងភពក្រហម ក្នុងប្រព័ន្ធព្រះអាទិត្យរបស់យើង។
គួរបញ្ជាក់ថា មូលដ្ឋានខាងលើ នឹងចែកចេញជាពីរតំបន់ រួមមាន «សហគមន៍ភពអង្គារ» និង «ទីតាំងបោះតង់ភពអង្គារ» ដែលនឹងតភ្ជាប់គ្នាដោយផ្លូវមួយខ្សែ ក៏ប៉ុន្តែមើលពុំឃើញគ្នាពីម្ខាងទៅម្ខាងនោះឡើយ។ ប្រទេសចិនកំពុងតែជំរុញគំរោងជាច្រើន ក្នុងនោះគំរោងធំៗរួមមាន តេឡេស្កូបយក្សសម្រាប់ឆ្លុះមើលជីវិតភពផ្សេងដែលកំពុងដំណើរការ, ការស្រាវជ្រាវឋានព្រះច័ន្ទ ដែលកំពុងដំណើរការ, ការត្រៀមបង្កើតស្ថានីយ៍អវកាសដោយខ្លួនឯងនៅឆ្នាំ២០២០ និងការត្រៀមទៅភពព្រះអង្គារដើម្បីស្រាវជ្រាវជាដើម៕
