NASA ប្រើប្រាស់ Hubble រកឃើញ «ភពចម្លែក» ថ្មីមួយទៀត, វាក្តៅយកតែមែនទែន!
(អាមេរិក)៖ តេឡេស្កូបអវកាស Hubble ដែលប្រតិបត្តិដោយអង្គការ NASA និង ESA ទើបតែបានរកឃើញភពចម្លែកថ្មីមួយទៀត ដែលមានកម្តៅក្តៅយកតែមែនទែន ហើយវាមិនខុសពីបទចម្រៀងជប់លៀង Calypso ដែលច្រៀងថា «Hot, Hot, Hot» នោះឡើយ។ នេះបើតាមការចេញផ្សាយដោយ កាសែត Nature នាថ្ងៃព្រហស្បតិ៍ ទី០៧ ខែមេសា ឆ្នាំ២០២២ នេះតែម្តង។
ភពដែលមានទំហំប្រហាក់ប្រហែលភពព្រហស្បតិ៍ខាងលើនេះ ត្រូវបានដាក់ឈ្មោះសម្គាល់ឲ្យថា WASP-178b ស្ថិតនៅចម្ងាយ ១,៣០០ឆ្នាំពន្លឺពីភពផែនដី ហើយកម្តៅនៅក្នុងបរិយាកាសរបស់វា គឺក្តៅគគុករហូតដល់ទៅជិត ១,៦៥០អង្សាសេ។ កម្តៅដ៏ខ្លាំងបែបនេះ អាចរំលាយលោហធាតុមួយចំនួនបាន ក្នុងនោះរួមទាំង ទីតាញ៉ូម (Titanium) ផងដែរ។
អ្នកស្រាវជ្រាវមួយរូបគឺលោក David Sing មកពីសាកលវិទ្យាល័យ Johns Hopkins សហរដ្ឋអាមេរិកបានលើកឡើងថា «យើងនៅមិនទាន់មានការយល់ដឹងដ៏ល្អ ចំពោះបរិស្ថាននៃភព WASP-178b នៅឡើយទេ។ នៅពេលយើងសម្លឹងមើលបរិយាកាសផែនដី គឺសុទ្ធសឹងតែជាអ្វីដែលយើងអាចគណនាបាន។ ប៉ុន្តែនៅពេលយើងសម្លឹងទៅរក exoplanets នានា យើងមិនទាន់មានថាមពលគ្រប់គ្រាន់ ដើម្បីវិភាគដឹងអំពីស្ថានភាព ដ៏ចម្លែកបំផុតទាំងអស់នោះឡើយ។ ទោះបីជាអ្នកយល់ដឹង អំពីគោលការណ៍គ្រឹះនៃគីមីវិទ្យា និងរូបវិទ្យា ក៏អ្នកនៅតែមិនដឹងអំពីរបៀបដែលត្រូវពន្យល់វា នៅក្នុងមធ្យោបាយដ៏ស្មុគស្មាញទាំងនោះដែរ»។
យ៉ាងណាក៏ដោយ បើតាមការសិក្សាទៅលើបរិស្ថាននៃប្រព័ន្ធផ្កាយពណ៌ស WASP-178 និងទីតាំងដែល WASP-178b ស្ថិតនៅ, ភពក្តៅគគុកមួយនេះ ស្ថិតនៅក្នុងគន្លងគោចរ locked orbit (គន្លងបិទ) ដែលមួយចំហៀងរបស់វា បែរទៅរកផ្កាយរបស់វារហូត (មានកម្តៅក្តៅគគុក) និងមួយចំហៀងទៀតងងឹតរហូត (យប់)។ ក្រុមអ្នកវិទ្យាសាស្ត្របានសន្និដ្ឋានថា នៅផ្នែកពេលយប់របស់ភព WASP-178b គឺអាចកើតមានបាតុភូតព្យុះហឺរីខិនមហាកំណាច (super-hurricane) ដែលមានលឿនខ្យល់បោកបក់ រហូតដល់ទៅជាង ៣,៣០០គីឡូម៉ែត្រក្នុងមួយម៉ោងឯណោះ។
គួរបញ្ជាក់ថា ទោះបីជាភពជំពូក super-hot Jupiters ខាងលើនេះ មិនអាចឲ្យជីវិតរស់នៅក្តី ក៏ការសិក្សាអំពីពួកវា បាននិងកំពុងផ្តល់ផលប្រយោជន៍ ឲ្យក្រុមអ្នកវិទ្យាសាស្ត្រធ្វើការសិក្សាកាន់់តែច្បាស់ អំពីបរិយាកាសនៃភពនានា ដែលមិនអំណោយផលដល់ការកកើតជីវិត និងប្រៀបធៀបពួកវាជាមួយភព ដែលមានឱកាសក្នុងការឲ្យជីវិតកកើតបាន ដោយយោងទៅលើការសិក្សាអំពីបរិស្ថាន ក្នុងបរិយាកាសភពទាំងនោះ៕
ប្រែសម្រួល៖ Cambo Space
ប្រភព៖ NASA/Nature Journal (ថ្ងៃព្រហស្បតិ៍ ទី០៧ ខែមេសា ឆ្នាំ២០២២)
