តាមដានព្រឹត្តិការណ៍អន្តរជាតិសំខាន់ៗ ប្រចាំថ្ងៃអង្គារ ទី០៧ ខែមិថុនា ឆ្នាំ២០២២ (ចុចអាន)

(បរទេស)៖ ព្រឹត្តិការណ៍អន្តរជាតិសំខាន់ៗ ប្រចាំថ្ងៃអង្គារ ទី០៧ ខែមិថុនា ឆ្នាំ២០២២ មានដូចខាងក្រោមនេះ៖

• មានការប្រយុទ្ធបង្ហូរឈាមគ្នាយ៉ាងសាហាវបំផុតមួយតាមដងវិថី យោងតាមសេចក្តីរាការណ៍ពីទីក្រុង Severodonetsk ដែលជាទីក្រុងស្ថិតនៅភាគខាងកើតប្រទេសអ៊ុយក្រែន ដែលក្លាយជាសមរភូមិសំខាន់បំផុតមួយ ពីសង្គ្រាមឈ្លានពានរបស់រុស្ស៊ី។ ទោះបីជាមានកងកម្លាំងតិចតួច និងមានកាំភ្លើងតិចតួចក្តី ក៏លោកប្រធានាធិបតី Volodymyr Zelensky បានពោលថា «វីរបុរសរបស់យើង មិនបានបោះបង់តួនាទីខ្លួននោះឡើយ» ទន្ទឹមនឹងនេះ មានសេចក្តីរាយការណ៍មិនជាក់លាក់មួយ ស្តីពីការផ្ទុះជំងឺអាសន្នរោគក្នុងទីក្រុង Mariupol ដែលជាទីក្រុងកំពង់ផែ ដែលទាហានរុស្ស៊ីវាយប្រហារមុនចូលកាន់កាប់។
• ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ បានដើរចេញពីជំនួបប្រជុំរបស់ក្រុមប្រឹក្សាសន្តិសុខ បន្ទាប់ពីសហភាពអឺរ៉ុបបានចោទប្រកាន់រុស្ស៊ីថា ជាដើមហេតុបង្កឱ្យកើតមានវិបត្តិសន្តិសុខស្បៀងពិភពលោក។ លោក Charles Michel ប្រធានក្រុមប្រឹក្សាអឺរ៉ុបបានលើកឡើងថា វិមានក្រឹមឡាំងបាននិងកំពុងប្រើប្រាស់ ការផ្គត់ផ្គង់ស្បៀងអាហារជា «មីស៊ីលបំបាំងកាយបំផ្លាញប្រទេសកំពុងអភិវឌ្ឍន៍»។ លោក Vassily Nebenzia បេសកជនរបស់រុស្ស៊ីបានដើរចេញពីកិច្ចប្រជុំ ខណៈពេលលោក Michel បានកំពុងនិយាយចោទទៅកាន់លោថា បានផ្សព្វផ្សាយពាក្យភូតកុហកបោកប្រាស់។
• តម្លៃប្រាក់យ៉េនរបស់ជប៉ុនបានធ្លាក់ចុះ ក្នុងកម្រិតទាបខ្លាំងនារយៈកាល ២០ឆ្នាំកន្លងមកនេះ ដោយធ្លាក់ចុះចំនួន ១៣៣បន្ទាត់ បើធៀបទៅនឹងប្រាក់ដុល្លារនាថ្ងៃអង្គារនេះ។ ការលក់ចេញត្រូវបានជំរុញ ដោយការដំឡើងអាត្រាការប្រាក់ក្នុងសហរដ្ឋអាមេរិក។ ផ្ទុយនឹងប្រទេសជប៉ុន ដែលមើលទៅរំកិលទៅជិតសូន្យ ខណៈអតិផរណានៅមានកម្រិតទាប។ អ្នកវិនិយោគនានាក៏សម្តែងការព្រួយបារម្ភផងដែរថា ការកើនឡើងតម្លៃប្រេងនឹងហុចផលបង្កើនឱនភាព ចំពោះវិស័យពាណិជ្ជកម្មជប៉ុន។ ដោយជម្រើសប្រភេទរូបិយវត្ថុមានដែនកំណត់ ការធ្លាក់ចុះនៃតម្លៃប្រាក់យ៉េននេះ ប្រហែលជានឹងមិនអាចធ្លាក់ឈានដល់បាតនោះឡើយ។
• ប្រធានាធិបតីអ៊ុយក្រែនលោក Volodymyr Zelensky បាននិយាយថា «ភាពជាប់គាំងមិនមែនជាជម្រើសឡើយ» នៅក្នុងសង្គ្រាមប្រឆាំងតបតនឹងរុស្ស៊ី ព្រមទាំងអ៊ុយក្រែនដាច់ខាតត្រូវទាមទារ «ការគ្រប់គ្រងពេញលេញ» ឡើងវិញចំពោះទឹកដីរបស់ខ្លួនទាំងមូល។ លោកបានបន្ថែមថា អង្គការ NATO គួរតែនាំយកអ៊ុយក្រែនទៅចូលរួមជាមួយ បើទោះបីធ្លាប់យល់ឃើញថា អ៊ុយក្រែនមិនអាចក្លាយជាសមាជិកអង្គការយោធានេះក្តី។ រុស្ស៊ីបង្ហាញពីការប្រឆាំងយ៉ាងពេញទំហឹង ចំពោះការបញ្ជូលសមាជិកភាពអង្គការ NATO ពីអ៊ុយក្រែន។
• ធនាគារពិភពលោក (World Bank) បានបន្ថយទំហំព្យាករណ៍របស់ខ្លួន ជុំវិញកំណើនសេដ្ឋកិច្ចជាសាកលក្នុងឆ្នាំ២០២២ ក្នុងអត្រា ១.២% ពោលគឺពី ៤.១% មកត្រឹម ២.១% វិញ។ របាយការណ៍ស្តីពី «ទស្សនវិស័យសេដ្ឋកិច្ចសាកល» នៃធនាគារពិភពលោក បានព្រមានថា ពិភពលោកកំពុងឈានទៅរក «អត្រានៃកំណើនតិចតួចស្តួចស្តើង និងអតិផរណាហក់ឡើងខ្ពស់» បន្ទាប់ពីវិបត្តិសង្គ្រាមនៅអ៊ុយក្រែន បានបន្ថែមទៅលើវិបត្តិសេដ្ឋកិច្ចពិភពលោក ដែលបង្កដូចមហន្តរាយនៃជំងឺរាតត្បាតសាកលកូវីដ១៩ កន្លងទៅនោះ៕

ប្រភព៖ Reuters, New York Times, AP, Al Jazeera, The Kyiv Post, Asia Nikkei និង World Bank