តើអ្នកដឹងទេ រូបថតដំបូងបំផុតនៃ «សូរ្យគ្រាសពេញលេញ» ថតនៅថ្ងៃខែឆ្នាំណា?
(បរទេស)៖ កាលពីថ្ងៃទី ២៨ ខែ កក្កដា ឆ្នាំ ១៨៥១ រូបភាពដំបូងបំផុតនៃ «បាតុភូតសូរ្យគ្រាសពេញលេញ» ឬ «Total Solar Eclipse» ត្រូវបានថតដោយអ្នកជំនាញថតរូបពីបុរាណ គឺលោក Johann Julius Friedrich Berkowski ជាជនជាតិរបស់អតីតដែនដី Prussia ដែលត្រូវបានបង្កើតចេញជា ចក្រភពអាល្លឺម៉ង់ (German Empire) កាលពីឆ្នាំ ១៨៧១។
ចំពោះក្រុមអ្នកជំនាញថតរូបពីបុរាណ មិនមែនត្រូវបានគេហៅថា Photographer ដូចបច្ចុប្បន្ននេះទេ តែពួកគេត្រូវបានដាក់រហស្សនាមថា Daguerreotypist ព្រោះតែដំណើរការថតរូបកាលពីសម័យមុន មានភាពស្មុគស្មាញ និងលំបាក ឆ្ងាយជាងសម័យនេះ ហើយទទួលបានត្រឹមតែជារូបភាពស-ខ្មៅប៉ុណ្ណោះ។
នៅក្នុងដំណើរការនៃការផ្តិតរូបភាពខាងលើនេះ លោក Berkowski បានប្រើប្រាស់តេឡេស្កូបតូចមួយ ដែលមានប្រវែង ៦ សង់ទីម៉ែត្រ ដោយប្រើប្រាស់ exposure រយៈពេល ៨៤វិនាទី គិតចាប់ពីពេលដែលព្រះចន្ទគោចរមកដល់ ចំណុចបាំងព្រះអាទិត្យជិតឈឹង លើផ្ទៃមេឃតែម្តង។
គួរបញ្ជាក់ថា នៅថ្ងៃទី ២៨ ខែ កក្កដា ឆ្នាំ ១៨៥១ នោះ គឺមិនមែនជាលើកទី ១ នោះឡើយដែលមនុស្សលោក បានព្យាយាមផ្តិតរូបភាពរបស់ «បាតុភូតសូរ្យគ្រាសពេញលេញ» ដោយមុននោះទៀត ក៏មានការព្យាយាមជាច្រើនលើកផងដែរ ប៉ុន្តែបានទទួលបរាជ័យ ព្រោះតែ Daguerreotypist មិនអាចគណនាឲ្យបានត្រឹមត្រូវនូវកម្រិត contrast រវាងស្រទាប់ ខូរ៉ូណា (corona) របស់ព្រះអាទិត្យ និងបន្ទះឌីសខ្មៅងងឹតនៃព្រះចន្ទបាន៕
ប្រែសម្រួល៖ Cambo Space / ឥន្ទ វុត្ថា (រក្សាសិទ្ធិ)
ប្រភព៖ SPACE