ភពព្រហស្បតិ៍រំលេចក្នុងរូបភាពថ្មី ថតដោយតេឡេស្កូបអវកាស James Webb
(អាមេរិក)៖ តេឡេស្កូបអវកាស James Webb មិនត្រឹមតែមានសមត្ថភាព ក្នុងការផ្តិតយករូបភាពកាឡាក់ស៊ីឆ្ងាយៗ, ផ្កាយច្រើនជំពូក និងបរិស្ថានអវកាសដទៃៗទៀតប៉ុណ្ណោះទេ តែវាក៏អាចងាកមកសិក្សា បរិស្ថាននៅក្នុងប្រព័ន្ធព្រះអាទិត្យយើងបានផងដែរ។ អ្វីដែលជាទីចាប់អារម្មណ៍ មិនអាចត្រូវបានមើលរំលង នោះគឺភពព្រហស្បតិ៍ (Jupiter) ដែលកំពុងបង្កប់អាថ៌កំបាំងជាច្រើន រង់ចាំការបកអក្រាត។
តាមរយៈរូបភាពថ្មីដែលទើបត្រូវបានបញ្ចេញ កាលពីចុងខែកក្កដា កន្លងទៅថ្មីៗនេះ គេឃើញភពព្រហស្បតិ៍ ក្នុងទម្រង់ប្លែកមិនធ្លាប់មានពីមុនមក នោះគឺពណ៌ស-ខ្មៅ។ ប្រការនេះ គឺដោយសារតែ James Webb បានផ្តិតរូបភាពភពឧស្ម័នយក្សនេះ ជាមួយវត្តមានព្យុះយក្សក្រហម «Great Red Spot» ដែលមានអាយុកាលជាង ៣០០ឆ្នាំ និងស្រទាប់នានានៃបរិយាកាស-ឧស្ម័នភពនេះ ដោយប្រើប្រាស់កាមេរ៉ាចាប់រូបភាព ពន្លឺក្រហមអាំងហ្វ្រាជិត (NIRCam)។
ការផ្តិតរូបមួយសន្លឹកនេះ ត្រូវបានចំណាយពេល ១១នាទី និងប្រើប្រាស់តម្រងពណ៌ (filter) ដែលក្រុមអ្នកវិទ្យាសាស្ត្រហៅកាត់ថា F212N។ អ្វីដែលក្រុមអ្នកវិទ្យាសាស្ត្រ បានសិក្សាកន្លងពិតជាបង្ហាញថា ភពព្រហស្បតិ៍តែងតែបង្ហាញ លក្ខណៈលេចធ្លោជាងគេ ទោះបីជាត្រូវបានសម្លឹងមើលក្នុងទម្រង់បែបណាក៏ដោយ (ទាំងរូបភាពពណ៌ធម្មជាតិ និងរូបភាពជាទម្រង់ពន្លឺ Infrared)។
គួរបញ្ជាក់ថា រូបភាពថ្មីរបស់ភពព្រហស្បតិ៍ ថតដោយ James Webb នេះ នឹងអនុញ្ញាតឲ្យក្រុមអ្នកវិទ្យាសាស្ត្រ ធ្វើការសិក្សាស្វែងយល់បន្ថែមអំពី បរិយាកាស, បម្រែបម្រួលនៃស្រទាប់ឧស្ម័ន, បាតុភូតខ្យល់បោកបក់ និងពន្លឺ Aurora ដែលតែងកើតមានជារឿយៗ នៅតំបន់ប៉ូលភពព្រហស្បតិ៍នោះ។ មិនត្រឹមតែខ្លួនភពឧស្ម័នយក្សមួយនេះទេ James Webb ក៏នឹងសិក្សាអំពី បរិស្ថានដ៏អាថ៌កំបាំងដូចជា ខ្សែក្រវាត់ (rings) និងព្រះចន្ទតូច-ធំ នៅជុំវិញភពនេះផងដែរ។
បើតាមក្រុមអ្នកវិទ្យាសាស្ត្រនៅឯវិទ្យាស្ថានតេឡេស្កូបអវកាស (STSI) ស្ថិតនៅក្នុងរដ្ឋ Maryland សហរដ្ឋអាមេរិក ដែលជាអ្នកគ្រប់គ្រងដំណើរការរបស់ James Webb នោះ តេឡេស្កូបអវកាសនេះ នឹងត្រូវបញ្ជាឲ្យអង្កេតព្រះចន្ទភ្នំភ្លើង អាយអូ (Io) របស់ភពព្រហស្បតិ៍ ក៏ដូចជាអាចម៍ផ្កាយដ៏ធំមួយឈ្មោះ Hygeia និងសំណល់នៃបន្ទុះសូពើណូវ៉ា Cassiopeia A សម្រាប់ដើមខែសីហា ឆ្នាំ ២០២២ នេះ៕
ប្រែសម្រួល៖ Cambo Space / ឥន្ទ វុត្ថា (រក្សាសិទ្ធិ)
ប្រភព៖ SPACE (ថ្ងៃចន្ទ ទី០១ ខែសីហា ឆ្នាំ២០២២)