រកឃើញ «រន្ធអាថ៌កំបាំង» នៅបាតសមុទ្រអាត្លង់ទិក ដែលមិនទាន់មានការបកស្រាយ
(បរទេស)៖ ក្រុមអ្នកស្រាវជ្រាវបានរកឃើញ «រន្ធអាថ៌កំបាំង» ដែលតម្រៀបគ្នាជាជួរយ៉ាងលំដាប់លំដោយបំផុត ស្ថិតនៅបាតសមុទ្រដែលមានជម្រៅ ២.៦ គីឡូម៉ែត្រ ហើយទិដ្ឋភាពមួយនោះ ក៏មិនទាន់មានការបកស្រាយថា ជាអ្វី ឬបណ្តាលមកអ្វីឲ្យប្រាកដនោះដែរ។
បាតុភូតនៅបាតសមុទ្រខាងលើនេះ ត្រូវបានរកឃើញដោយយានមុជទឹក នៃក្រុមនាវាស្រាវជ្រាវ Okeanos Explorer របស់រដ្ឋបាលអាកាសធាតុ និងមហាសមុទ្រជាតិ (NOAA) នៃសហរដ្ឋអាមេរិក ខណៈដែលពួកគេកំពុងស្រាវជ្រាវតំបន់ Mid-Atlantic Ridge នៅក្នុងមហាសមុទ្រអាត្លង់ទិច ជាតំបន់ដែលភាគច្រើន មិនធ្លាប់ត្រូវបានមនុស្សស្រាវជ្រាវ ហើយក៏សំបូរទៅដោយជួរភ្នំបាតសមុទ្រផងដែរ។
បើតាមការពិនិត្យមើលភាពជាក់ស្តែង រន្ធជាច្រើនក្នុងរូបភាពមួយនេះ គឺតម្រៀបគ្នាជាបន្ទាត់យ៉ាងត្រង់ល្អ ជាមួយនឹងគម្លាតស្មើៗគ្នា ដែលមានរាងទួលបន្តិច នៅតាមមាត់រន្ធទាំងនោះ។ នេះមិនមែនជាលើកទី ១ ទេ ដែលបាតុភូតបែបនេះត្រូវបានរកឃើញ ដោយកាលពីឆ្នាំ ២០០៤ ក្រុមអ្នកវិទ្យាសាស្ត្រមកពីកងទ័ពជើងទឹកអាមេរិក ក៏បានរកឃើញរន្ធស្រដៀងគ្នានេះផងដែរ នៅបាតសមុទ្រ។
ក្រុមអ្នកស្រាវជ្រាវរបស់ NOAA បានសរសេរការបកស្រាយជាបឋមមួយ បង្ហោះលើបណ្តាញសង្គម Facebook ថា «វត្តមាននៃរន្ធប្រភេទៗនេះ ក៏ត្រូវបានគេរាយការណ៍ពីមុនមកដែរ ប៉ុន្តែប្រភពដើមរបស់ពួកវា គឺនៅតែស្ថិតក្នុងអាថ៌កំបាំង…។ ខណៈដែលពួកវាមើលទៅ គឺអាចត្រូវបានមនុស្សបង្កើតឡើងទាំងស្រុងនោះ ចំណុចដែលមានដីទួលៗជុំវិញមាត់រន្ធ គឺហាក់បីដូចជារន្ធទាំងនោះ ត្រូវបានជីកដោយ … អ្វីមួយ»។
គួរបញ្ជាក់ថា NOAA បង្ហោះរូបរន្ធជាច្រើនខាងលើនេះ មតិរបស់សាធារណជនលើ Facebook បានបង្ហាញពីការគិតរៀងៗខ្លួន ទៅដល់ដើមហេតុមួយចំនួន ដែលអាចបង្កទិដ្ឋភាពបែបនេះឡើង ក្នុងនោះមានដូចជា ការប្រេះស្រទាប់បាតសមុទ្រ ដែលបង្កឡើងដោយឧស្ម័នផុសចេញ, គ្រឿងយន្តរបស់មនុស្ស ដែលជីករកកំនប់, សត្វក្នុងសមុទ្រ, អេលៀន (Alien) និងការចល័តនៃសត្វផ្កាយសមុទ្រ (starfish) ជាដើម។
តែយ៉ាងណា ពាក្យខ្លះត្រឹមជាសន្និដ្ឋានបែបកំប្លែង ដែលគ្មានន័យបែបវិទ្យាសាស្ត្រប៉ុណ្ណោះ។ អាថ៌កំបាំងមិនទាន់ត្រូវបានបកស្រាយ មួយនេះ បានធ្វើឲ្យគេនឹកឃើញដល់តំបន់ស្រដៀងគ្នាមួយ ដែលក្រុមអ្នកស្រាវជ្រាវបាតសមុទ្របានរកឃើញ នៅលើកំពូលភ្នំនៅបាតសមុទ្រមួយក្បែរកោះ Hawaii កាលពីខែឧសភា ឆ្នាំ២០២២ ដែលកាលណោះត្រូវបានគេសន្និដ្ឋានថា បានកកើតឡើងតាមរយៈ បម្រែបម្រួលនៃភ្នំភ្លើងបាតសមុទ្រ។
សម្រាប់បាតុភូតនៅតំបន់ Mid-Atlantic Ridge នោះនឹងត្រូវការឲ្យក្រុមអ្នកស្រាវជ្រាវ បន្តធ្វើការតាមដានរហូតដល់ខែកញ្ញា ឆ្នាំ ២០២២ ដែលជាផ្នែកមួយនៃកម្មវិធី Voyage to the Ridge 2022 expedition, ជាការប្តេជ្ញាធ្វើការស្រាវជ្រាវ និងគូសវាសផែនទី អំពីតំបន់នោះ… ហើយប្រសិនបើក្រុមអ្នកស្រាវជ្រាវជួបសំណាង ពួកគេអាចចាប់បានអ្នកបង្កឲ្យមានរន្ធទាំងនេះឡើង ដោយចៃដន្យផងក៏ថាបាន៕
ប្រែសម្រួល៖ Cambo Space / ឥន្ទ វុត្ថា (រក្សាសិទ្ធិ)
ប្រភព៖ SPACE (ថ្ងៃអង្គារ ទី០២ ខែសីហា ឆ្នាំ២០២២)