NASA បញ្ចេញរូបថតថ្មីមួយទៀតរបស់ James Webb ដែលបង្ហាញពីបាតុភូត ស្ទើរមិនគួរឲ្យជឿ
(អាមេរិក)៖ នៅដើមខែសីហា ឆ្នាំ២០២២ នេះ ក្រុមការងារគ្រប់គ្រងតេឡេស្កូបអវកាស James Webb របស់អង្គការ NASA និងដៃគូពាក់ព័ន្ធ បានបញ្ចេញរូបភាពដ៏អស្ចារ្យថ្មីៗ ជាបន្តបន្ទាប់ទៀត ក្នុងនោះនៅថ្ងៃទី ៣ ខែសីហា (ពេលវេលានៅអាមេរិក) រូបមួយសន្លឹកបង្ហាញពីបាតុភូតដ៏អស្ចារ្យ ត្រូវបានពន្លែងចេញមក ដោយវាត្រូវបានផ្តិតយកពីត្រង់តំបន់តារានិករ Cetus។
វាគឺជាទិដ្ឋភាពនៃកាឡាក់ស៊ី ២ បុកបញ្ចូលគ្នា និងត្រូវបានហៅឈ្មោះជារួមថា IC 1623 ឬ VV 114 ស្ថិតនៅចម្ងាយ ២៧៥ លានឆ្នាំពន្លឺពីភពផែនដី (១ឆ្នាំពន្លឺ = ៩.៤៦ទ្រីលានគីឡូម៉ែត្រ)។ អ្វីដែលគួរឲ្យចាប់អារម្មណ៍ និងស្ទើរមិនគួរឲ្យជឿនោះ គឺកាឡាក់ស៊ីទាំង ២ ដែលកំពុងស្ថិតក្នុងដំណើរបុកបញ្ចូលគ្នា (merging) បានពាក់កណ្តាលទៅហើយនោះ ហាក់ដូចជាគ្មានប្រហោងខ្មៅយក្ស នៅចំកណ្តាលពួកវានោះឡើយ។
ក្រុមអ្នកជំនាញអង្គការ NASA បានអះអាងថា ការសម្លឹងមើលរូបភាពថ្មីនេះ គឺមានប្រយោជន៍ដល់ការសិក្សាអំពីការប្រែប្រួល និងវិវឌ្ឍទម្រង់នៃកាឡាក់ស៊ីថ្មី ក្រោយកាឡាក់ស៊ី ២ រួមបញ្ចូលគ្នា។ ជាទូទៅមុននឹងកាឡាក់ស៊ី ២ ឬច្រើនជាងនេះរួមបញ្ចូលគ្នា ពួកវាតែងតែរំកិលមកជិតគ្នាសិន រួចទើបគោចរជុំវិញគ្នា និងបន្ទាប់មកទៀត គឺធ្វើការរួមបញ្ចូលគ្នាតែម្តង។ នេះបើតាមការពន្យល់ដោយ ក្រុមអ្នកជំនាញនៃសាកលវិទ្យាល័យ California សហរដ្ឋអាមេរិក។
គួរបញ្ជាក់ថា រាល់កាឡាក់ស៊ីធំៗទាំងអស់ តែងតែមានប្រហោងខ្មៅមហាយក្ស (Supermassive Black Hole) នៅចំកណ្តាលពួកវា ហើយក្រុមអ្នកវិទ្យាសាស្ត្រក៏រំពឹងថា នៅពេលកាឡាក់ស៊ីទាំងនោះរួមបញ្ចូលគ្នា ប្រហោងខ្មៅយក្សទាំងនោះ ក៏នឹងបញ្ចេញសកម្មភាពយ៉ាងកញ្ជ្រោលផងដែរ តាមរយៈការលេបយកឧស្ម័ននៅជុំវិញ និងបញ្ចេញធាតុវិទ្យុសកម្មក្នុងចំនួនដ៏ច្រើនមហិមា ចេញពីខ្លួនពួកវា។
ប៉ុន្តែនៅពេលដែលក្រុមអ្នកជំនាញ ធ្វើតាមការត្រួតពិនិត្យទៅលើដំណើររបស់ កាឡាក់ស៊ីពីរកំពុងរួមបញ្ចូលគ្នាឈ្មោះ IC 1623 ថតដោយ James Webb ខាងលើនេះ ពួកគេមិនបានមើលឃើញសញ្ញា នៃប្រហោងខ្មៅសកម្មនានានោះឡើយ។ ក្រុមអ្នកជំនាញ NASA មិនអាចធ្វើការសន្មត់អ្វី ចំពោះបាតុភូតចម្លែកបែបនោះទេ ដោយពួកគេអះអាងថា ត្រូវការពេលវេលាបន្ថែមទៀត ដើម្បីត្រួតពិនិត្យឲ្យកាន់តែលម្អិតខ្លាំងជាងនេះ៕
ប្រែសម្រួល៖ Cambo Space / ឥន្ទ វុត្ថា (រក្សាសិទ្ធិ)
ប្រភព៖ New Scientist (ថ្ងៃព្រហស្បតិ៍ ទី០៤ ខែសីហា ឆ្នាំ២០២២)