ប្លែកភ្នែក! តេឡេស្កូបអវកាស James Webb ថតបានពន្លឺ Aurora លើប៉ូលភពព្រហស្បតិ៍ (VIDEO)
(អាមេរិក)៖ តេឡេស្កូបអវកាស James Webb ដែលកំពុងគ្រប់គ្រងដោយអង្គការ NASA (អាមេរិក), ESA (អឺរ៉ុប) និង CSA (កាណាដា) ទើបតែបានបញ្ចេញរូបថតថ្មីៗបន្ថែមទៀត អំពីភពព្រហស្បតិ៍ (Jupiter) ដ៏ធំអស្ចារ្យប្រចាំប្រព័ន្ធព្រះអាទិត្យយើង។
រូបភាពថ្មីៗ ២សន្លឹកនេះ គឺត្រូវបានថតដោយ ឧបករណ៍កាមេរ៉ាផ្តិតយក ពន្លឺក្រហមអាំងហ្វ្រាជិត (NIRCam instrument) តាំងតែពីចុងខែកក្កដា ឆ្នាំ ២០២២ មកម្ល៉េះ ប៉ុន្តែទើបតែត្រូវបានបញ្ចេញជាសាធារណៈ នៅថ្ងៃទី២២ ខែសីហានេះ។ ក្រុមអ្នកវិទ្យាសាស្ត្រនឹងអាចស្វែងយល់ អំពីបរិស្ថានផ្ទៃក្នុងបន្ថែមទៀត នៃភពព្រហស្បតិ៍ តាមរយៈរូបភាពថ្មីទាំងនេះ។
រូបភាពថ្មីៗនេះ អាចឲ្យយើងឃើញពន្លឺក្រហមអាំងហ្វ្រា (Infrared Light) បញ្ចេញដោយបរិស្ថានដ៏កញ្ជ្រោលជុំវិញតួខ្លួននៃភពព្រហស្បតិ៍ (ភ្នែកមនុស្ស និងកាមេរ៉ាធម្មតាមិនអាចមើលឃើញ) ហើយអ្វីដែលពិសេសបំផុតនោះគឺពន្លឺ អូរ៉ូរ៉ា (Aurora) ដែលស្ថិតនៅប៉ូលខាងជើង និងខាងត្បូងភពព្រហស្បតិ៍នោះតែម្តង។
បន្ថែមពីលើពន្លឺ Aurora នោះ យើងក៏អាចមើលឃើញវត្តមានព្យុះយក្សក្រហម Great Red Spot និងភាពខ្មួលខ្មាញ់នៃស្រទាប់លើ ដែលបង្ហាញអំពីបរិយាកាសដ៏ពុះកញ្ជ្រោល នៃភពឧស្ម័នយក្ស Jupiter មួយនេះ។ តែយ៉ាងណា ព្រះចន្ទយក្សទាំង ៤ នៃភពព្រហស្បតិ៍ មិនបានបង្ហាញវត្តមានក្នុងរូបភាពថ្មីៗនេះឡើយ ដោយយើងឃើញមានតែព្រះចន្ទតូចៗ ដូចជា Amalthea និង Adrastea ក៏ដូចជាស្រមោលនៃខ្សែក្រវាត់ (Rings) ជុំវិញភពព្រហស្បតិ៍ប៉ុណ្ណោះ៕
ប្រែសម្រួល៖ ឥន្ទ វុត្ថា (រក្សាសិទ្ធិដោយ Cambo Space)
ប្រភព៖ NASA/ESA/CSA (ថ្ងៃចន្ទ ទី២២ ខែសីហា ឆ្នាំ២០២២)
