HOT NEWS: តេឡេស្កូប James Webb ឆ្លុះមើលភព WASP-39b ជាថ្មី និងបញ្ជាក់សមាសធាតុផ្សំក្នុងបរិយាកាស!

0 283

(បរទេស)៖ តេឡេស្កូបអវកាស James Webb ទើបតែបានឆ្លុះមើលបរិយាកាសភព WASP-39b ជាថ្មី និងបង្ហាញភាពលម្អិតមិនធ្លាប់មានពីមុនមក នោះគឺម៉ូលេគុលក្នុងបរិយាកាស និងសមាសធាតុគីមីផ្សំសំខាន់ៗ ដែលភពមានរហស្សនាមថា Hot Saturn មួយនេះមាន។

អ្វីដែល James Webb បានឆ្លុះមើលឃើញក្នុងបរិយាកាសភព WASP-39b ជាថ្មី និងបន្ថែមទៀតនោះមានដូចជា ទឹក (water), ស៊ុលផួ ឌីអុកស៊ីត (sulfur dioxide), កាបូន ម៉ូណូអុកស៊ីត (carbon monoxide), សូដ្យូម (sodium) និង ប៉ូតាស្យូម (potassium) ក៏ដូចជាសញ្ញានៃវត្តមានពពកផងដែរ។

វិសាលគមពណ៌នៃពន្លឺក្នុងបរិយាកាសភព WASP-39b (រូបភាពពី NASA/ESA/CSA)

ខាងលើនេះ គឺជាការគូសបញ្ជាក់បន្ថែម និងកាន់តែច្បាស់លាស់ជាងមុនទៀត អំពីសមត្ថភាពរបស់ James Webb មុននឹងតេឡេស្កូបអវកាសតម្លៃជិត ១០ពាន់លានដុល្លារអាមេរិកមួយនេះ ឈានទៅឆ្លុះមើលភពចម្បងៗ នៅក្នុងប្រព័ន្ធផ្សេងៗទៀត ក្នុងនោះដូចជា TRAPPIST-1 ជាដើម។

គួររំលឹកថា កាលពីខែសីហា ឆ្នាំ២០២២ តេឡេស្កូបអវកាស James Webb ក៏បានឆ្លុះរកឃើញកាបូនឌីអុកស៊ីត (CO2) នៅក្នុងបរិយាកាសភព WASP-39b នោះផងដែរ និងត្រូវបានចាត់ទុកថា ជាការរកឃើញវត្តមាន CO2 ដំបូងបំផុតមិនធ្លាប់មាន នៅក្នុងបរិយាកាសភពនៅប្រព័ន្ធផ្កាយដទៃ

HOT NEWS: តេឡេស្កូប James Webb ឆ្លុះមើលភព WASP-39b ជាថ្មី និងបញ្ជាក់សមាសធាតុនៃបរិយាកាស!
ភព WASP-39b ក្នុងការវិភាគ (រូបភាពពី NASA/ESA/CSA)

សម្រាប់តេឡេស្កូបអវកាស James Webb វិញ គឺមានបំពាក់នូវឧបករណ៍ពិសេស សម្រាប់ឆ្លុះមើលវិសាលគមពណ៌នៃពន្លឺ នៅក្នុងបរិយាកាសរបស់ភពមួយ នៅពេលបរិយាកាសភពនោះប៉ះត្រូវនឹងពន្លឺផ្កាយរបស់វា។ ពណ៌នៃពន្លឺដែលត្រូវបានបំប្លែងចេញនៅក្នុងបរិយាកាសភពទាំងនោះ អាចប្រាប់ឲ្យយើងដឹងថា វាជាសមាសធាតុអ្វី។

គួរបញ្ជាក់ថា ភព WASP-39b មានចម្ងាយខ្ទង់ ៧០០ឆ្នាំពន្លឺពីភពផែនដី (១ឆ្នាំពន្លឺ = ៩.៤៦ទ្រីលានគីឡូម៉ែត្រ) និងគោចរជុំវិញផ្កាយ WASP-39 ដែលស្ថិតនៅក្នុងតារានិករ វើហ្គោ (Virgo constellation)។ មូលហេតុដែលភពនេះត្រូវបានដាក់រហស្សនាមថា Hot Saturn ក៏ព្រោះតែវាមានទំហំប្រហាក់ប្រហែលនឹងភពសៅរ៍ តែវាស្ថិតនៅកៀកផ្កាយវា ជាងចម្ងាយរវាងភពពុធ (Mercury) និង ព្រះអាទិត្យយើងទៅទៀត៕

ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA (ថ្ងៃអង្គារ ទី២២ ខែវិច្ឆិកា ឆ្នាំ២០២២)

Leave A Reply

Your email address will not be published.