មិនធម្មតា! មន្ត្រីអាមេរិកជិះយន្តហោះចូលទស្សនាក្នុងព្យុះហឺរីខិន Erin តែម្តង! (មានវីដេអូ)

(បរទេស)៖ ព្យុះហឺរីខិន អ៊ែរីន (Erin) បានក្លាយជាប្រធានបទក្តៅគគុកសម្រាប់សហរដ្ឋអាមេរិក បន្ទាប់ពីវាបានកកើតឡើងកាលពីថ្ងៃទី១១ ខែសីហា ឆ្នាំ២០២៥ ហើយរំកិលឆ្លងកាត់មហាសមុទ្រអាត្លង់ទិក សម្តៅមកកាន់តំបន់ឆ្នេរភាគខាងកើតសហរដ្ឋអាមេរិក តែក្នុងរយៈពេលប៉ុន្មានថ្ងៃប៉ុណ្ណោះ។ Erin បានបង្កើនឥទ្ធិពលដល់កម្រិតជាព្យុះហឺរីខិននេះ កាលពីថ្ងៃទី១៥ ខែសីហា ដោយឆ្លងកាត់សមុទ្រ ឡេសសឺ អ៊ែនធីលលីស (Lesser Antilles) និងបន្ទាប់មកក៏កើនឥទ្ធិពលដល់ហឺរីខិនកម្រិតទី ៥ ជាមួយនឹងល្បឿនខ្យល់ខ្លាំងបំផុត ២៦០km ក្នុង១ម៉ោង។

ពិតណាស់! ត្រឹមការអានអត្ថបទអាចនឹងមិនធ្វើឲ្យអ្នកព្រឺព្រួចនោះទេ ហេតុដូច្នេះទើបយន្តហោះពិសេសដឹកក្រុមមន្ត្រីនៃរដ្ឋបាលមហាសមុទ្រ និងបរិយាកាសជាតិ (NOAA) នៃសហរដ្ឋអាមេរិក បានហោះទំលុះចូលទៅកាន់បេះដូងរបស់ព្យុះកំណាច Erin តែម្តង បូករួមទាំងរូបភាពដែលត្រូវបានថតពីផ្កាយរណប Geostationary Operational Environmental Satellite (GOES-19) ផងដែរ។ សម្រាប់យន្តហោះពិសេសវិញ គឺជារបស់កងទ័ពអាកាសអាមេរិកដែលមានឈ្មោះថា Weather Reconnaissance Squadron ទី ៥៣ ឬមានរហស្សនាមថា «អ្នកប្រមាញ់ព្យុះហឺរីខិន» (WC-130J)។

សម្រាប់ទិដ្ឋភាពព្យុះហឺរីខិន Erin ដែលត្រូវបានផ្តិតដោយផ្កាយរណប GOES-19 គឺនៅពេលដែលវាលោតចូលដល់កម្រិតទី ៤​ នៃកម្លាំងបោកបក់ទៅហើយ ខណៈកំពុងឆ្ពោះទៅរកភាគខាងកើតនៃសមុទ្រ Caribbean។ យើងអាចឃើញដំណើរពង្រីកឥទ្ធិពលរបស់ Erin ចាប់តាំងពីការនៅត្រឹមជាបណ្តុំពពកកួច រហូតក្លាយទៅព្យុះពេញរូបរាង ដោយយើងឃើញភ្នែករបស់វាព្រមទាំងរចនាសម្ព័ន្ធច្បាស់លាស់ដែលបញ្ជាក់ថាវាគឺជាហឺរីខិនកំណាច។

យោងតាមការសង្កេតដោយផ្កាយរណប GOES-19 ការពង្រីកឥទ្ធិពលរបស់ Erin ពីកម្រិតទី៤ ឡើងទៅដល់កម្រិតទី៥ បានប្រើប្រាស់ពេលតែ ២៤ម៉ោងប៉ុណ្ណោះ ហើយហើយបិសាចមួយនេះបានធ្វើឲ្យបណ្តាដែនកោះនៅក្បែរវាដូចជា Puerto Rico ជាដើម រងឥទ្ធិពលខ្យល់បោកបក់យ៉ាងសន្ធប់។ យើងក៏អាចមើលឃើញ Erin ដោយផ្ទាល់តាមរយៈកែវភ្នែកបុរស និងស្ត្រីក៏ក្លាហាន ដែលស្ថិតនៅលើយន្តហោះយោធា WC-130J ផងដែរ។ ការហោះចូលនេះ គឺដើម្បីស្រង់យកទិន្នន័យពិតៗ ព្រមទាំងជាបទពិសោធន៍ជាក់ស្តែង នៃការវិភាគព្រឹត្តិការណ៍នៅនឹងកន្លែងផ្ទាល់តែម្តង។

សម្រាប់អ្នកដែលមិនទាន់យល់ចំពោះទិដ្ឋភាពនេះ នោះគឺប្រៀបបីដូចជាយើងកំពុងស្ថិតក្នុងកែវភ្នែករបស់ព្យុះហឺរីខិន Erin យ៉ាងដូច្នោះឯង ដោយចាប់ផ្តើមពីការមើលឃើញផ្ទៃពណ៌ខៀវនៅចំកណ្តាល ដែលមានពពកកួចព័ទ្ធជុំវិញ ហើយត្រង់នេះជាចំណុចស្ងប់ស្ងាត់របស់ព្យុះ (ទើបយន្តហោះអាចរក្សាលំនឹងបាន)។ បន្ទាប់មកទៀតទើបយន្តហោះ WC-130J ធ្វើការហោះទៅជាយព្យុះ ឬជញ្ជាំងនៃភ្នែក ដែលជាទីតាំងដ៏កោលាហលបំផុតនៃព្យុះនេះ ព្រោះមានខ្យល់បោកបក់ខ្លាំង និងភ្លៀងធ្លាក់យ៉ាងសន្ធប់នៅព័ទ្ធជុំវិញកែវភ្នែកដ៏ស្ងប់ស្ងាត់របស់ Erin។ អ្នកអាចឃើញការប្រែប្រួលពីភាពស្ងប់ស្ងាត់ទៅជាភាពកោលាហល តែក្នុងពេលប៉ុន្មាននាទីប៉ុណ្ណោះ។

គួរបញ្ជាក់តាមសារព័ត៌មាន Yahoo News នៅថ្ងៃទី១៩ ខែសីហា ឆ្នាំ២០២៥ ឲ្យដឹងថា ព្យុះហឺរីខិន Erin បានថមថយឥទ្ធិពលរបស់វាមកកាន់កម្រិតទី ៣ វិញហើយ ខណៈកំពុងរំកិលទៅកាន់តែជិតតំបន់ឆ្នេរភាគខាងកើត សហរដ្ឋអាមេរិក កាលពីព្រឹកថ្ងៃទី១៩ ខែសីហា (ម៉ោងនៅរដ្ឋធានីវ៉ាស៊ីនតោន)។ បើតាម NOAA ព្យុះហឺរីខិន Erin នឹងឆ្លងកាត់ប្រទេសដីកោះ Bahamas នៅថ្ងៃទី១៩ និង ២០ ខែសីហា រួចហើយវានឹងបន្តរំកិលទៅតំបន់ឆ្នេរភាគខាងកើតសហរដ្ឋអាមេរិក និងដែនសមុទ្រ Bermuda នៅថ្ងៃទី២០ និង២១ ខែសីហា (ពេលវេលានៅភាគខាងកើតសហរដ្ឋអាមេរិក)៕

ប្រែសម្រួល៖ Cambo Space (ឥន្ទ វត្ថា), ប្រភព៖ SPACE / Yahoo News via NOAA (ថ្ងៃអង្គារ ទី១៩ ខែសីហា ឆ្នាំ២០២៥)