ផ្កាយកំណាចចម្ងាយ ៣៥០ឆ្នាំពន្លឺពីផែនដី បានស៊ីកូនខ្លួនឯងម្តងមួយៗអស់ជាង ១០…
(អាមេរិក)៖ តារាមួយដួងដ៏សែនឆ្ងាយ ដែលស្រដៀងទៅនឹងព្រះអាទិត្យ ប្រហែលជាបានលេបត្របាក់យកភពក្មេងៗរបស់វាផ្ទាល់ ដែលមានទំហំប៉ុនៗផែនដីដល់ទៅចំនួន ១៥ភព ឬក៏អាចច្រើនជាងនេះ។ នេះបើតាមការដកស្រង់ដោយវែបសាយ Space.com នៅរសៀលថ្ងៃអង្គារ ទី២៤ ខែតុលា ឆ្នាំ២០១៧។
ក្រុមអ្នកស្រាវជ្រាវបានដាក់ឈ្មោះឲ្យផ្កាយខាងលើនេះថា ក្រូណូស (Kronos) ជាឈ្មោះរបស់អាទិទេពមួយអង្គ នៅក្នុងទេវកថាប្រទេសក្រិក ដែលលេបកូនៗរបស់ខ្លួនឯង ដោយសារតែភ័យខ្លាចថា ពួកគេនឹងដណ្តើមរាជ្យ។ តារា Kronos ជាកម្មសិទ្ធិរបស់ប្រព័ន្ធផ្កាយភ្លោះ Binary Star ឬក៏ Double-Star មួយប្រព័ន្ធ ដែលស្ថិតនៅចម្ងាយ ៣៥០ឆ្នាំពន្លឺពីផែនដី (១ឆ្នាំពន្លឺ = ៩.៤៦ទ្រីលានគីឡូម៉ែត្រ) ដោយដៃគូវាមួយទៀតមានឈ្មោះថា គ្រីយ៉ូស (Krios)។
Krios ជាផ្កាយធម្មតា និងស្ងប់ស្ងាត់ ដោយមានសារធាតុ លីចូម (lithium), ម៉ាញេស្យូម (magnesium) និង ដែក (iron) អណ្តែតក្នុងបរិយាកាសរបស់វា ប៉ុន្តែដៃគូរបស់វាមួយទៀត ដែលមានធម្មជាតិដ៏សាហាវព្រៃផ្សៃ គឺ Kronos មានលក្ខណៈខុសប្លែក។ ក្រុមតារាវិទូខ្លះ ក៏ធ្លាប់បានគិតផងដែរថា ពួកវាមិនមែនស្ថិតក្នុងប្រព័ន្ធ Binary Star។
គួរបញ្ជាក់ថា តាមរយៈការអង្កេតមើលយ៉ាងហ្មត់ចត់ ក្រុមតារាវិទូបានរកឃើញថា Kronos មានបរិមាណសារធាតុរ៉ែក្នុងកម្រិតដ៏ខ្ពស់ខុសពីធម្មតា ដែលទំនងជាមានន័យថា វាធ្លាប់បានលេបត្របាក់យកភពមានម៉ាស់ប្រហាក់ប្រហែលនឹងផែនដីយើងប្រហែលចំនួន ១២ ឬ អាចដល់ទៅ ១៥ ភពឯណោះនៅក្នុងជីវិតរបស់វា។
ផ្កាយទាំង ២ដួងខាងលើ ដែលមានឈ្មោះផ្លូវការ HD 240430 និង HD 240429 អាចមានអាយុកាលប្រមាណ ៤ពាន់លានឆ្នាំ ហើយពួកវាទំនងជាប្រភេទផ្កាយលឿង G-type ដែលស្រដៀងទៅនឹងព្រះអាទិត្យ តែមានវ័យក្មេងជាង។ ការសិក្សាបានបង្ហាញទៀតថា តារាទាំង ២ វិលជុំវិញមួយជុំជារៀងរាល់ ១០,០០០ឆ្នាំម្តង៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/News Scientist
