ជាកាឡាក់ស៊ីតែមួយ ហេតុអ្វីរូបភាព២សន្លឹកនេះ មានពណ៌ខុសគ្នា? (យល់ដឹង)
(បរទេស)៖ គ្រប់គ្នាពិតជាធ្លាប់បានជួបប្រទះទិដ្ឋភាពនេះញឹកញាប់មកហើយ ដោយពេលខ្លះមិនមែនជាលក្ខណៈ ២ទម្រង់បែបនេះឡើយ តែអាចឡើងដល់ ៣ទម្រង់ផងក៏មាន សម្រាប់ការផ្តិតរូបភាពវត្ថុអវកាសនានា ដោយតេឡេស្កូបទាំងនៅលើដី និងនៅទីអវកាស។
«សម្រាប់រូបភាពក្នុងទម្រង់ពណ៌ផ្កាឈូកនៅខាងឆ្វេង» គឺកើតចេញពីការបូកបញ្ចូលគ្នាតែម្តង រវាងទិន្នន័យជាទម្រង់ពន្លឺក្រហមអាំងហ្វ្រា (Infrared Light) ពីតេឡេស្កូបអវកាស James Webb និងទិន្នន័យជាកាំរស្មីអ៊ិច (X-ray) ពីតេឡេស្កូបអវកាស Chandra X-ray Observatory របស់អង្គការ NASA។
ខណៈរូបភាពនានាបានមកពី James Webb តែងផ្តោតសំខាន់លើតំបន់កកើតផ្កាយនោះ ការឆ្លុះមើលដោយកាំរស្មីអ៊ិចរបស់ Chandra ឯណេះវិញនាំយើងឲ្យឃើញបណ្តុំឧស្ម័នប្រកបដោយកម្តៅក្តៅខ្លាំង (superheated gas), តំបន់នានាដែលមានផ្កាយបានផ្ទុះ (individual exploded stars), ប្រហោងខ្មៅ (Black Holes) និងអ្វីៗជាច្រើនទៀត។
«សម្រាប់រូបភាពដែលរាងងងឹតផ្នែកនៅខាងស្តាំ» គឺជាការឆ្លុះមើលដោយ ឧបករណ៍ផ្តិតយកពន្លឺក្រហមអាំងហ្វ្រាកម្រិតមធ្យម (MIRI) របស់ James Webb។ នៅក្នុងទម្រង់នៃពន្លឺ Infrared កម្រិតមធ្យម «កាឡាក់ស៊ីកង់រទេះ» ឬ Cartwheel Galaxy (ចម្ងាយប្រហែល ៥០០លានឆ្នាំពន្លឺពីផែនដី) ត្រូវបានគេមើលឃើញក្នុងទិដ្ឋភាពជាលក្ខណៈ «កង់ៗ» ដែលពោរពេញដោយធូលី ហើយវាប្រៀបបីដូចជាគ្រោងឆ្អឹងរបស់កាឡាក់ស៊ីនោះយ៉ាងដូច្នេះឯង។
ហេតុអ្វីបានជារូបភាពទាំង ២ មានទម្រង់ពណ៌ផ្សេងគ្នាបែបនេះ?
ចម្លើយ៖ ចំពោះទិន្នន័យ ឬបើនិយាយឲ្យចំគឺ «រូបភាព» ដែលតេឡេស្កូបនានាផ្តិតបានគឺ «គ្មានពណ៌» នោះទេ ឬអាចថាត្រឹមជា «រូបភាពស-ខ្មៅ» ប៉ុណ្ណោះ។ បន្ទាប់មកទើបពណ៌នានាត្រូវបានចាក់បំពេញ ទៅតាមលក្ខខណ្ឌបច្ចេកទេស ឬកូដរបស់ពណ៌ដែលត្រូវបានកំណត់តាមរយៈវិសាលគមពណ៌នៃពន្លឺ (visible spectrum)។
យើងអាចសម្លឹងមើលពណ៌ដើម្បីបកប្រែថា តើប្រវែងរលកនៃពន្លឺនោះវែង ឬមួយក៏ខ្លីបាន ដោយស្រមោលពណ៌ខៀវត្រូវបានកំណត់ថាជាប្រវែងរលកខ្លីជាង (shorter wavelengths) និងស្រមោលក្រហមត្រូវបានកំណត់ថា ជារលកវែងជាង (longer wavelengths)។ ពណ៌នានាក៏ត្រូវបានគេប្រើ ដើម្បីរំលេចអត្ថន័យផ្នែកវិទ្យាសាស្ត្រចំពោះរូបភាពទាំងឡាយផងដែរ ដូចជាយើងអាចដឹងអំពីសមាសធាតុគីមីចម្បងៗ ដែលកាឡាក់ស៊ីណាមួយមាន តាមរយៈពណ៌នានាដែលវាបញ្ចេញ៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ NASA/ESA/CSA
