(៨/តុលា/១៩៩២)៖ យាន Pioneer 12 ទម្លាក់ខ្លួនចូលបរិយាកាសភពសុក្រ (Venus)
(បរទេស)៖ កាលពីថ្ងៃទី០៨ ខែតុលា ឆ្នាំ១៩៩២ (៣១ឆ្នាំមុន) យាន ផាយអូនៀ ១២ (Pioneer 12) របស់អង្គការ NASA នៃសហរដ្ឋអាមេរិក បានរំលាយខ្លួនឯងនៅក្នុងបរិយាកាសដ៏ក្រាស់របស់ ភពសុក្រ (Venus) ដែលជាភពស្ថិតនៅលេខរៀងទី ២ បន្ទាប់ពីព្រះអាទិត្យ។
យាន Pioneer 12 ឬដែលមានឈ្មោះមួយទៀតថា Pioneer Venus Orbiter បានចំណាយពេល ១៤ឆ្នាំ គោចរជុំវិញភពសុក្រ ដោយស្ថិតក្នុងគោលដៅសិក្សាអំពីបរិយាកាសភពនោះ។ យាននេះមានបំពាក់នូវឧបករណ៍ ដើម្បីសិក្សាអំពីរបៀបដែលស្រទាប់អ៊ីយ៉ុង (ionosphere) និងដែនម៉ាញេទិច (magnetic field) ធ្វើប្រតិកម្មជាមួយនឹងភាគល្អិត (charged particles) ដែលជះមកលើភពនេះតាមរយៈខ្យល់ព្រះអាទិត្យ (solar wind)។
យាន Pioneer 12 ក៏ធ្លាប់គោចរទៅអង្កេតផ្កាយដុះកន្ទុយ Halley នៅពេលដែលវត្ថុអវកាសនេះ គោចរកាត់ភពសុក្រផងដែរ។ នៅពេលដែលយាននេះអស់ឥន្ធនៈ កម្លាំងគោចររបស់វាជុំវិញភពសុក្រ ក៏ថយចុះបន្តិចម្តងៗ ហើយនៅទីបំផុតវាក៏ទម្លាក់ខ្លួន និងបុកបរិយាកាសភពសុក្រតែម្តង នៅថ្ងៃទី០៨ ខែតុលា ឆ្នាំ១៩៩២។
គួរបញ្ជាក់ថា Pioneer 12 ឬមានឈ្មោះមួយទៀតថា Pioneer Venus 1 គឺជាយានដំបូងរបស់ NASA ដែលត្រូវបានបញ្ជូនទៅសិក្សាបរិយាកាសភពសុក្រ និងត្រូវបានបាញ់បញ្ជូនចេញពីផែនដី កាលពីខែឧសភា ឆ្នាំ១៩៧៨ និងជ្រៀតចូលគន្លងគោចរជុំវិញភពសុក្របានសម្រេចនៅខែធ្នូ ឆ្នាំដដែល៕
ប្រែសម្រួល៖ Cambo Space (ឥន្ទ វុត្ថា)
ប្រភព៖ SPACE/NASA (ថ្ងៃអាទិត្យ ទី០៨ ខែតុលា ឆ្នាំ២០២៣)
