តើនៅចំកណ្តាលនៃកាឡាក់ស៊ី Milky Way មានអ្វី? តើមានចម្ងាយប៉ុន្មាន Km ពីផែនដី?
(ភ្នំពេញ)៖ កាលពី០២លានឆ្នាំមុន ប្រហោងខ្មៅដ៏សែនធំមហិមាបំផុត នៅចំកណ្តាលបេះដូងនៃកាឡាក់ស៊ី របស់យើង ធ្លាប់មានឥទ្ធិពលខ្លាំងក្លាលើសពីសព្វថ្ងៃនេះដល់ទៅ ១០០លានដងឯណោះ។ អស់រយៈពេលជាច្រើនឆ្នាំមកហើយ ក្រុមតារាវិទូមានក្តីងឿងឆ្ងល់ជាពន់ពេក ថាតើហេតុអ្វីដែលបាន «ភ្នំភ្លើង» ប្រចាំកាឡាក់ស៊ី Milky Way មួយនេះ មានសភាពធម្មតាដូចពេលបច្ចុប្បន្ន (មិនសូវខ្លាំងដូច ០២លានឆ្នាំមុន)។
រយៈចម្ងាយរវាងប្រព័ន្ធព្រះអាទិត្យ និងតំបន់ Galactic Center ដែលជាទីជម្រករបស់ប្រហោងខ្មៅដ៏ធំមហាសាលមួយឈ្មោះ Sagittarius A* គឺមិនមានភាពទៀងទាត់នោះឡើយ។ យ៉ាងណាមិញ ការប៉ាន់ស្មានចាប់តាំងពីឆ្នាំ២០០០មក នៅបន្តក្នុងចន្លោះពី ២៤,០០០ និង ២៨,០០០ឆ្នាំពន្លឺ (១ឆ្នាំពន្លឺ = ៩.៤៦១ពាន់ពាន់លានគីឡូម៉ែត្រ) ដែលបងប្អូនអាចគណនាបាន។
ចំណុចកណ្តាលនៃកាឡាក់ស៊ី Milky Way គឺមានពន្លឺភ្លឺខ្លាំងបំផុត ប៉ុន្តែពន្លឺទាំងនោះ មិនមែនចេញពីដុំភ្លើងព្រះអាទិត្យ ដូចជាផែនដីយើងទទួលបាននោះឡើយ គឺវាជាចេញពីពពកធូលីដ៏ក្រាស់ក្រែល ដែលឆាបឆេះបញ្ចេញកម្តៅ នៅជុំវិញប្រហោងខ្មៅដ៏ធំមហិមានោះ។ វាជាចលនានៃធម្មជាតិសុទ្ធសាធ ដែលសូម្បីអ្នកវិទ្យាសាស្ត្រ ក៏មិនទាន់អាចធ្វើការបកស្រាយលម្អិតអំពីវា ប្រកបដោយភស្តុតាងដែលអាចទទួលបាន ១០០%នោះដែរ។
គួរបញ្ជាក់ថា រូបភាពអំពីប្រហោងខ្មៅភាគច្រើន គឺបានមកពីការកែច្នៃ និងសន្និដ្ឋាន ដោយយោងទៅលើទិន្នន័យពិត ទទួលបានពីតេឡេស្កូប និងកែវយឺតអវកាសប៉ុណ្ណោះ ដោយសារតែវានៅឆ្ងាយពីភពផែនដីយើងខ្លាំងពេក ដូច្នេះតារាវិទ្យូបានត្រឹមតែចាប់រូបភាពព្រាលៗពីប្រហោងខ្មៅនោះតែប៉ុណ្ណោះ។
លក្ខណៈវិសេសបន្ថែម៖ ប្រហោងខ្មៅនៅកណ្តាលកាឡាក់ស៊ីយើង មានឈ្មោះ Sagittarius A* មានទម្ងន់ធ្ងន់ជាងព្រះអាទិត្យយើងជា ០៤លានដង ប៉ុន្តែទំហំវាវិញ គឺធំជាងព្រះអាទិត្យយើងតែ ៦,០០០ដងប៉ុណ្ណោះ។ សម្រាប់ប្រហោងខ្មៅដែលនៅជិតផែនដីយើងបំផុតវិញ គឺ V616 Monocerotis មានចម្ងាយ ៣,០០០ឆ្នាំពន្លឺ និងទំហំ ១៣ដងនៃព្រះអាទិត្យរបស់យើង៕
ប្រភព៖ វែបសាយ IFL Science
