ហេតុអ្វីពពួកសត្វជំនាន់ដាយណូស័រ មានទំហំធំៗជាងជំនាន់បច្ចុប្បន្ន? ស្វែងយល់ការប្រៀបធៀបទំហំ…
(ភ្នំពេញ)៖ កាលពីជំនាន់ដាយណូស័រ គឺ ២៥០លាន ដល់ ៦៥លានឆ្នាំមុន ពពួកសត្វមានជីវិតនៅលើភពផែនដី ទាំងលើអាកាស លើគោក និងក្នុងទឹក គឺមានទំហំធំៗជាងពេលបច្ចុប្បន្ននេះខ្លាំង ដោយក្នុងសម័យនោះ សត្វធំជាងគេលើគោក គឺដាយណូស័រ (Titanosaur), លើអាកាសគឺ Pterosaur, និង ក្នុងទឹកគឺ Shastasaurus។
ចំពោះមូលហេតុចម្បងបំផុតមួយ ដែលបានធ្វើឲ្យពពួកសត្វទាំងនោះ មានទំហំធំៗជាងពពួកសត្វនាពេលបច្ចុប្បន្ននេះ គឺដោយសារតែកាលណោះ ភពផែនដីពោពេញដោយអុកស៊ីសែន ក្នុងកំហាប់ដ៏ខ្ពស់ជាងពេលបច្ចុប្បន្ន ដែលអុកស៊ីសែនទាំងនោះ បង្កើតឡើងយ៉ាងគំហុកចេញពីមហាសមុទ្រ ដើមឈើធំៗ និងត្រពាំងបឹងបួរ ពាសពេញផ្ទៃផែនដី ហើយអត្រានៃការស្រូបយកអុកស៊ីសែនដោយភាវៈរស់នានា ក៏មានចំនួនច្រើនលើសពេលបច្ចុប្បន្ននេះខ្លាំងផែនដី។
ខាងក្រោមនេះ គឺចំណុចវិសេសនៃសត្វធំៗទាំងបី ប្រចាំលើផែនដី កាលពីអំឡុងពពួកដាយណូស័រ ជាអ្នកគ្រប់គ្រងភពនេះ៖
១. ក្រុមដាយណូស័រលើគោក ប្រភេទ Titanosaur៖ សត្វប្រភេទនេះត្រូវបានរកឃើញគ្រោងឆ្អឹងក្រោយគេបង្អស់ នៅប្រទេសអាហ្សង់ទីន ដែលវាមានប្រវែងរហូតដល់ទៅដល់ជិត ៣៧ម៉ែត្រ និងទម្ងន់ប្រហែល ១០០តោនឯណោះ។ ទីតាណូស័រ ជាប្រភេទដាយណូស័រស៊ីរុក្ខជាតិជាអាហារ និងកម្ពស់ខ្ពស់ជាង ពពួកសត្វស៊ីសាច់ជាអាហារទៅទៀត នាសម័យកាលណោះ។
/argentinosaurus-5903aa6f3df78c54565a4c38.jpg)
២. ក្រុមដាយណូស័រលើអាកាសប្រភេទ Pterosaur៖ វាជាបិសាចលើអាកាស ដែលមានប្រវែង ឬកម្ពស់ខ្ពស់បំផុតរហូតដល់ទៅ ០៩ម៉ែត្រ និងទម្ងន់អតិបរមា ២៥០គីឡូក្រាម។ បក្សីលើអាកាសនេះ គឺស៊ីសាច់ជាអាហារ ខណៈដែលបក្សីធំបំផុតបច្ចុប្បន្ន គឺមានប្រវែង ឬកម្ពស់សន្ធឹងតែ ៣.៥ម៉ែត្រ និងទម្ងន់ប្រមាណ ១២គីឡូក្រាមប៉ុណ្ណោះជាមធ្យម។
៣. ក្រុមដាយណូស័រក្នុងទឹក គឺ Shastasaurus៖ មហាយក្សក្នុងទឹកនេះ គឺពិតជាមហិមាណាស់ សម្រាប់សមត្ថភាព និងទំហំដ៏ធំអស្ចារ្យរបស់វា។ វាមានរូបរាងស្រដៀងនឹងត្រីដូលហ្វីន នាពេលបច្ចុប្បន្ននេះដែរ។ បើនិយាយពីទំហំវិញនោះ គឺវាមានប្រវែងរហូតដល់ទៅ ២០ម៉ែត្រឯណោះ ដែលវត្តមានរបស់វាលើផែនដីគឺ កាលពីអំឡុង ២០០លានឆ្នាំមុន។
ចំណុចបន្ថែម៖ ផែនដីមានបរិយាកាសក្រាស និងសំបូរដោយអុកស៊ីសែនខ្លាំង កាលពីអំឡុងរាប់រយលានឆ្នាំមុន ប៉ុន្តែចាប់តាំងពីការរលំរលាយនៃជីវិតស្ទើរទាំងស្រុង កាលពី ៦៥លានឆ្នាំមុន ក្រោយអាចម៍ផ្កាយបុកផែនដីនោះ ទើបសណ្ឋានដី និងបរិយាកាសមានការផ្លាស់ប្តូរទ្រង់ទ្រាយធំ និងបានប៉ះពាល់ដល់ទំហំរូបរាង នៃជីវិតសត្វលោកផ្សេងៗ មកទល់នឹងបច្ចុប្បន្ន៕ ប្រភព៖ វែបសាយ Listverse
