រុស្ស៊ីផ្តល់សិទ្ធិប៉ាតង់ក្នុងការអភិវឌ្ឍន៍ «ទំនាញសិប្បនិមិត្ត» សម្រាប់ប្រើលើស្ថានីយអវកាសថ្មី

(បរទេស)៖ ក្រុមហ៊ុនផលិតរ៉ុក្កែតរដ្ឋរុស្ស៊ីដ៏ធំមួយមានឈ្មោះថា Energia ត្រូវបានរដ្ឋាភិបាលទីក្រុងម៉ូស្គូ ផ្តល់សិទ្ធិប៉ាតង់ក្នុងការអភិវឌ្ឍន៍ យានអវកាសបង្កើតទំនាញសិប្បនិមិត្ត (artificial gravity) ក្នុងការឲ្យអវកាសយានិក ស្នាក់នៅដើម្បីបំពេញកិច្ចការងាររយៈពេលយូរ និងមានអារម្មណ៍ថា ពួកគេកំពុងស្ថិតនៅលើផែនដីដែរ…។

ពិតណាស់ គ្រាន់តែស្រមៃទិដ្ឋភាពខាងលើនេះ លោកអ្នកក៏អាចនឹកគិតដល់ខ្សែភាពយន្តហូលីវូដ ល្បីៗជាច្រើនពាក់ព័ន្ធនឹងទីអវកាសមិនខាន ដែលទាំងនោះបង្ហាញពីការស្ថិតនៅលើយានអវកាស ដែលមានទំនាញដូចជានៅលើផែនដី ហើយវានឹងក្លាយជារបត់ថ្មីមួយទៀត ដែលទីអវកាសកាន់តែក្លាយជាទីតាំងប្រកួតប្រជែងគ្នា រវាងប្រទេសមហាអំណាចធំៗពិតៗ។

យោងតាមការផ្សាយរបស់សារព័ត៌មានរុស្ស៊ី TASS កាលពីថ្ងៃទី២៣ ខែធ្នូ ឆ្នាំ២០២៥ បានឲ្យដឹងថា យានអវកាសស្ថិតក្នុងគម្រោងអភិវឌ្ឍន៍របស់ក្រុមហ៊ុន Energia ខាងលើនេះ នឹងប្រៀបបីដូចជាសញ្ញាលេខបូក (+) មួយមានកាំប្រវែង ៤០ម៉ែត្រ (ស្មើនឹងអង្កត់ផ្ចិត ៨០ម៉ែត្រ) ដែលអាចធ្វើចលនាវង្វិលដើម្បីបង្កើតចេញនូវទំនាញសិប្បនិមិត្តមួយ មានកម្លាំងប្រមាណ 0.5g ឬ ៥០% នៃកម្លាំងទំនាញផែនដីរបស់យើង។

សារព័ត៌មានដដែលបានបន្តថា នៅក្នុងប៉ាតង់នោះក៏បានបង្ហាញពីរចនាសម្ព័ន្ធរបស់ ស្ថានីយអវកាសថ្មីរបស់រុស្ស៊ី ដែលប្រៀបបីដូចជាសញ្ញាលេខបូកវិលនៅទីអវកាស ហើយវានឹងក្លាយជាកន្លែងស្នាក់នៅផង និងស្រាវជ្រាវផងរបស់អវកាសយានិក ដោយមានបន្ទប់សំខាន់ៗបានបំពាក់បន្តគ្នា និងប្រកបដោយភាពបត់បែនខ្ពស់។ បន្ថែមពីនេះ វានឹងត្រូវការការបាញ់បង្ហោះគ្រឿងបរិក្ខាចេញពីផែនដី ទៅកាន់ទីអវកាសជាបន្តបន្ទាប់ ទើបអាចផ្គុំចេញជាស្ថានីយអវកាសនោះបាន (មិនខុសពីការដំឡើងស្ថានីយអវកាសបច្ចុប្បន្ន ដែលបានចាប់ផ្តើមដំបូងកាលពីទសវត្សរ៍ ១៩៩០ នោះឡើយ)។

យ៉ាងណាក៏ដោយ គុណវិបត្តិក៏ត្រូវបានលើកឡើងផងដែរ នៅក្នុងឯកសាររបស់ក្រុមហ៊ុន Energia ដោយក្នុងនោះគេបានសង្កត់ធ្ងន់ថា ការចូលចតទៅកាន់ស្ថានីយអវកាស ដែលមានទំនាញសិប្បនិមិត្តដោយសារតែវិលខ្លួនឯងជាប្រចាំបែបនេះ នឹងតម្រូវឲ្យយានអវកាសឡើងពីផែនដី ដែលចូលទៅចតជាប់ស្ថានីយនោះ ត្រូវបង្កើតការរង្វិលឲ្យស្របនឹងល្បឿនរបស់ស្ថានីយដែរ។ ដូច្នេះដំណោះស្រាយបន្ថែមត្រូវតែមាន ដើម្បីរក្សាសុវត្ថិភាពសម្រាប់យាននានា ដែលត្រូវបានបញ្ជូនឡើងពីផែនដីទៅ។

គួរបញ្ជាក់ថា ក្រុមអ្នកជំនាញអង្គការ NASA ក៏ធ្លាប់បង្កើតគំនិតអំពីស្ថានីយអវកាស ដែលអាចបង្កើតទំនាញសិប្បនិមិត្តផងដែរមានឈ្មោះថា Nautilus-X ផងដែរ តែមិនទាន់មានការបញ្ជាក់ថា នឹងចេញជារូបរាងនៅពេលនោះទេ…។ ហើយសម្រាប់ក្រុមហ៊ុន Energia របស់រុស្ស៊ីវិញក៏ដូចគ្នាដែរ ប៉ុន្តែអ្វីដែលសំខាន់នៅពេលនេះ គឺក្រុមហ៊ុនមួយនេះបានទទួលសិទ្ធិប៉ាតង់ជាផ្លូវការពីរដ្ឋាភិបាលរុស្ស៊ី ពាក់ព័ន្ធនឹងការច្នៃយានអវកាសបង្កើតទំនាញសិប្បនិមិត្តរបស់ខ្លួន តែត្រង់ថា វានឹងអាចលេចចេញជារូបរាង ឬមាននរណាចង់គាំទ្រក្នុងការបង្កើតនោះ គឺមិនទាន់មានតំរុយទេ៕

ប្រែសម្រួល៖ Cambo Space (ឥន្ទ វត្ថា)
ប្រភព៖ SPACE via TASS (ថ្ងៃទី២៣ ខែធ្នូ ឆ្នាំ២០២៥)