មានការសង្ស័យថា «អាចម៍៍ផ្កាយ Oumuamua ជាយានអេលៀន មកពីភពផ្សេង» ពេលនេះតារាវិទូកំពុង.
(អាមេរិក)៖ អាចម៍ផ្កាយ ឬវត្ថុអវកាសឈ្មោះ Oumuamua ដែលក្រុមអ្នកវិទ្យាសាស្ត្រធ្វើការតាមដានយ៉ាងសកម្មកាលពីពីរខែមុន នៅពេលដែលដឹងថា «វាជាវត្ថុអវកាសដំបូងមិនធ្លាប់មានដែលមកពីប្រព័ន្ធព្រះអាទិត្យផ្សេង» ហើយធ្វើដំណើរមកឆ្វែលប្រព័ន្ធព្រះអាទិត្យរបស់យើង ដ៏ចម្លែកបំផុតនោះ ឥឡូវនេះក្រុមតារាវិទូមួយចំនួន បានបំផុសគំនិតថា វាជាយានរបស់អេលៀន (Aliens Spaceship) ដែលបានអណ្តែតស្រាវជ្រាវតំបន់របស់យើង។ នេះបើតាមការចេញផ្សាយដោយ សារព័ត៌មានអវកាស Space នាល្ងាចថ្ងៃអាទិត្យ ទី១៧ ខែធ្នូ ឆ្នាំ២០១៧។
ទោះបីជាមានការផ្ទុះពាក្យចចាមអារ៉ាម ដែលបានធ្វើឲ្យមនុស្សមួយចំនួនមានការជឿជាក់ក៏ដោយ ក៏ការស្រាវជ្រាវ និងអង្កេតកន្លងមកយ៉ាងប្រយ័ត្នប្រយែង ពីសំណាក់តេឡេស្កូបធំៗនៅលើផែនដីដូចតេឡេស្កូបនៅ West Virginia សហរដ្ឋអាមេរិកនោះ លទ្ធផលចេញមក គឺទទេតែម្តង។ ទោះបីជាបែបនេះក្តី ក្រុមអ្នករុករកទិន្នន័យ និងអង្កេតទៅលើរឿងនេះ នៅតែចង់បន្តសាច់រឿងរបស់ខ្លួន ហើយលោក Andrew Siemion នាយកនៃទីភ្នាក់ងារស្រាវជ្រាវរកជីវិតអេលៀន របស់មជ្ឈមណ្ឌលស្រាវជ្រាវ SETI ក្នុងរដ្ឋកាលីហ្វរញ៉ា គឺជាអ្នកសកម្មក្នុងការដឹកនាំកិច្ចការទាំងឡាយបន្តទៀត។
Oumuamua គឺជាអាចម៍ផ្កាយមកពីក្រៅប្រព័ន្ធព្រះអាទិត្យ ដែលបង្កការរំជើបរំជួលខ្លាំង ព្រោះគ្រប់ផ្នែកទាំងអស់ នៃអ្នកស្រាវជ្រាវទីអវកាស និងជីវិតអេលៀន មិនដែលបានជួបរឿងរ៉ាវដ៏អស្ចារ្យនេះឡើយ ក្នុងរយៈពេលរាប់ទសវត្សរ៍ ឬក៏ចាប់តាំងពីយើងចាប់ផ្តើមធ្វើការសិក្សាស្រាវជ្រាវ រកពិភពផ្សេងដែលនឹងអាចមានជីវិត ដូចផែនដីយើងដែរនោះ។
សម្រាប់ការអះអាងដែលថា Oumuamua ជាយានរបស់អេលៀននោះ គឺជាគំនិតដ៏មានតម្លៃមួយ ទោះបីជាមនុស្សមួយចំនួនមានការរិះគន់ថា ការគិតខាងលើនេះហួសហេតុពេកក៏ដោយ ប៉ុន្តែការសិក្សាស្រាវជ្រាវដោយសហគមន៍ នៃតារាសាស្ត្រ និងវិទ្យាសាស្ត្រនានា នៅតែប្រឹងប្រែងធ្វើការឲ្យអស់លទ្ធភាព ដើម្បីស្រង់យកទិន្នន័យដែលអាចទៅរួចណាមួយ ចេញពីវត្ថុដ៏ចម្លែកនោះ ដូចជាវិទ្យាស្ថាន SETI នៅលើភ្នំមួយ នៃរដ្ឋកាលីហ្វរញ៉ា ដែលកំពុងប្រើប្រាស់តេឡេស្កូប Allen ដើម្បីទាញយកទិន្នន័យពី Oumuamua ដូច្នេះឯង។
សមាជិកក្រុម SETI បានបង្ហើបថា តាមការរយៈការប្រើប្រាស់ឧបករណ៍ចានផ្កាយរណប Green Bank មុខកាត់ ១០០ម៉ែត្រ ដោយចំណាយពេលជះរលកសញ្ញាទៅលើ Oumuamua ចំនួន ០៦ម៉ោង ដោយទទួលបានទិន្នន័យ ៩០ terabytes ក្នុងរយៈពេល ០២ម៉ោង ពីអាចម៍ផ្កាយដែលមានប្រវែង ៤០០ម៉ែត្រនោះ។
គួរបញ្ជាក់ថា ទោះបីជាគេទទួលបានទិន្នន័យមួយចំនួនហើយពី Oumuamua ក៏ដោយ ក៏គេត្រូវការពេលវេលាបន្ថែមទៀត ដើម្បីធ្វើការវិភាគទៅលើទិន្នន័យទាំងអស់ ដែលទទួលបានដោយប្រយ័ត្នប្រយែងបំផុត។ ចុះបងប្អូនវិញគិតថា វត្ថុអវកាសមកពីប្រព័ន្ធផ្កាយផ្សេងដែលមិនធ្លាប់មាន ប្រវែងរហូតដល់ជិត កន្លះគីឡូម៉ែត្រ ខាងលើនេះ គ្រាន់តែជាដុំថ្មអវកាសធម្មតា ឬ? តើវាអាចជាអ្វីផ្សេងក្រៅពីនេះ ឬទេ? ចម្លើយ គឺមានតែចាំការបកស្រាយរបស់ ក្រុមអ្នកវិទ្យាសាស្ត្រ ដែលសង្ឃឹមថា នឹងចេញលទ្ធផលក្នុងពេលឆាប់ៗ…៕
