វិភាគលើ «ចំណុចធំៗទាំង ០៤ នេះ» លោកអ្នកនឹងអាចស្មានបានថា មានអេលៀន ឬ UFO ពិតមែន ឬអត់.
(ភ្នំពេញ)៖ ឥឡូវនេះយើងនិយាយពី អេលៀន និង ថាសហោះ (UFO) ដែលបានក្លាយជាចម្ងល់របស់មនុស្ស រាប់ទសវត្សរ៍មកហើយ ប៉ុន្តែសារព័ត៌មាន Cambo Space ធ្លាប់បានបញ្ជាក់ប្រាប់បងប្អូន ម្តងរួចទៅហើយថា អ្នកវិទ្យាសាស្ត្រអន្តរជាតិ ជាពិសេសអង្គារ NASA មិនដែលអះអាងថា ខ្លួនបានរកឃើញមនុស្ស ឬជីវិតក្រៅភព និងថាសហោះអ្វីនោះឡើយ ដោយអ្វីៗទាំងនេះ NASA ក៏កំពុងតែស្វែងរកដូចគ្នា។
ដូច្នេះតើអ្វីទៅជាការពិត? តើនេះជាការលាក់បាំងរបស់ NASA ដើម្បីសន្តិសុខពិភពលោក ដូចការលើកឡើង ដោយពាក្យចចាមអារ៉ាមមួយចំនួនឬ? តើមនុស្សពិតជាធ្លាប់បានជួបអេលៀន និងថាសហោះចុះមកផែនដី មែនឬទេ? សំនួរទាំងអស់នេះ បើសួរទៅអ្នកវិទ្យាសាស្ត្រអន្តរជាតិពួកគេក៏នឹងឆ្លើយចម្លើយជាផ្លូវការដូចគ្នាថា មិនធ្លាប់មាននោះទេ ហើយយើងក៏កំពុងព្យាយាមស្វែងរកសញ្ញាពីពួកគេដូចគ្នា។
ដើម្បីឲ្យបងប្អូនមានលទ្ធភាពវិភាគ និងសន្មត់ការយល់ឃើញដោយខ្លួនឯងនោះ Cambo Space មានបីចំនុចធំៗ សម្រាប់បងធ្វើការពិចារណា ហើយវានឹងជាគន្លឹះសំខាន់មួយ សម្រាប់បងប្អូនធ្វើការតាមដានព័ត៌មាន នៃការស្រាវជ្រាវរកជីវិតក្រៅភពនេះជាបន្តទៀតផងដែរ៖
១. បើមានអ្នកអះអាងអំពីអេលៀន ឬថាសហោះមានពិតមែន តើអេលៀន និងថាសហោះទាំងនោះ មានប្រភពមកពី? យើងដឹងហើយថា ផ្កាយដែលនៅជិតយើងបំផុតនោះ គឺប្រព័ន្ធ Alpha Centauri ដែលមានចម្ងាយ ៤.៤ឆ្នាំពន្លឺពីយើង (១ឆ្នាំពន្លឺ = ៩.៤៦១ពាន់ពាន់លានគីឡូម៉ែត្រ)។ អេលៀនពិតជាខ្លាំងក្លាជាងមនុស្សពិតមែនហើយ ដែលអាចជិះថាសហោះមកដល់ភពផែនដី ដោយប្រើល្បឿនពន្លឺ ឬជិតស្មើនឹងល្បឿនពន្លឺ…។
បន្ថែមពីនេះទៀត ភពទាំងអស់ និងព្រះច័ន្ទនានាក្នុងប្រព័ន្ធព្រះអាទិត្យយើង គឺគ្មានអុកស៊ីសែន និងបរិស្ថាន ដែលអាចទ្រទ្រង់ជីវិតនោះឡើយ ហេតុដូច្នេះអេលៀនពិតជាមិនអាចមានប្រភពមកពីភព និងព្រះច័ន្ទទាំងនោះឡើយ។
២. ចុះរូបភាពអេលៀន និងថាសហោះនោះបានមកពីណា? សំនួរនេះពិតជាពិបាកឲ្យស្វែងរកចម្លើយដែលអាចទទួលយកបានណាស់។ នៅក្នុងករណីដែលអ្នកជឿថា វាជារឿងកុហក់ នោះចម្លើយរបស់អ្នកប្រាកដជាអះអាងថា មនុស្សអាចគិតអំពីភាពច្នៃប្រឌិតពីអ្វីៗ ដែលគ្មានរូបរាងជាក់លាក់ ដូចជាច្នៃបង្កើតយន្តហោះ រូបត្លុកបិសាច ឬច្នៃម៉ូដអ្វីៗផ្សេង ដូច្នេះការច្នៃជារូបរាងអេលៀន ពុំមែនជារឿងអ្វីចម្លែកដែលមនុស្សមិនអាចធ្វើបាននោះទេ។
ប៉ុន្តែសម្រាប់បងប្អូនដែលនៅតែជឿទុកចិត្តលើរឿងបនេះវិញ ប្រាកជាគិតថា នេះជារូបភាពពិត ហើយបើសិនជាគ្មានអេលៀន ឬថាសហោះមែន តើរូបភាពទាំងនោះបានមកពីណា? តើនៅសុខៗមនុស្សទៅបង្កើតរូបចម្លែកទាំងនោះធ្វើអ្វី? នេះជាចម្ងល់ ប៉ុន្តែចំណុចទី ៣ បន្ទាប់នឹងក្លាយជាពន្លឺមួយ សម្រាប់លោកអ្នកពិចារណាម្តងទៀត។
៣. ក្រុមអ្នកស្រាវជ្រាវ និងព្យាយាមបកស្រាយការពិតមួយ ធ្លាប់បានអះអាងតាំងតែពីប៉ុន្មានទសវត្សរ៍មុននេះថា ថាសហោះ ឬរូបភាពអេលៀន ត្រូវបានអាមេរិកជាអ្នកបង្កើតឡើង ដើម្បីទាក់ទាញសហភាពសូវៀត នៅសម័យកាលសង្គ្រាមត្រជាក់ ដែលកំពុងងប់ងល់ខ្លាំង នឹងវិស័យអវកាស ឲ្យចំណាយធនធានរាប់ពាន់លានដុល្លារ ដើម្បីស្រាវជ្រាវលើអ្វីដែលខ្លួនភូតកុហក់នោះ ដូច្នេះការបកស្រាយនេះ ពួកគេចង់បញ្ជាក់ថា អេលៀន និងថាសហោះ គឺជារឿងកហុក។
៤. គ្រាន់តែកាឡាក់ស៊ីមាលគីវ៉េ មួយប៉ុណ្ណោះ មានភព និងផ្កាយរាប់ពាន់លានទៅហើយ តើអាចទេដែលមានតែផែនដីមួយមានជីវិត…។ សម្រាប់ចម្លើយរបស់ខ្ញុំផ្ទាល់ ខ្ញុំជឿថាមាន ប៉ុន្តែមិនដឹងថា ពួកគេជាមនុស្សស្រដៀងយើង ឬអាចជាសត្វព្រៃ និងជាជីវិតរស់នៅក្នុងទឹក ឬក៏អាចគ្រាន់តែព្រៃភ្នំមិនទាន់មាន ជីវិតសត្វលោកផងក៏មិនដឹង។ ម្យ៉ាងវិញទៀត យើងក៏មិនដឹងថា ពួកគេស្ថិតនៅជ្រុងណាមួយ នៃកាឡាក់ស៊ីនេះដែរ។
គួរបញ្ជាក់ថា ទោះបីជាចំណុចខាងលើនេះ ធ្វើឲ្យបងប្អូនកាន់តែឈឺក្បាលក្តី ប៉ុន្តែព័ត៌មានដែលយើងទើបចេញផ្សាយនាពេលថ្មីៗនេះគឺថា មន្ទីរបញ្ចកោណអាមេរិក នៃក្រសួងការពារជាតិអាមេរិក ធ្លាប់បំពេញបេសកកម្មសម្ងាត់ស្វែងរកថាសហោះ ឬអេលៀន រយៈពេល ០៥ឆ្នាំ ដែលបានបញ្ចប់កាលពីឆ្នាំ២០១២ នោះ គឺអាមេរិកខ្លួនឯងជាអ្នកទទួលស្គាល់ថា ខ្លួនក៏មានការសង្ស័យចំពោះវត្តមានថាសហោះនោះដែរ ហើយការសង្ស័យនោះ វាអាចឲ្យយើងទាញន័យជារួមថា ថាសហោះ ឬវត្ថុសង្ស័យថា ជាថាសហោះ ពិតជាបង្ហាញវត្តមានដ៏អាថ៌កំបាំង ដែលនាំមហាអំណាចនេះ ចង់ដឹងឲ្យបានថា ពួកវាជាអ្វី…។ ចុះបងប្អូនវិញ តើគិតយ៉ាងណាដែរ? សូមបញ្ចេញមតិយោបល់ ឲ្យយើងខ្ញុំដឹងផង៕
