តើឥន្ធនៈ Antimatter ក្នុងរឿង Avatar អាចកើតមានពិតមែន ឬទេ? ហើយបើកើតមានមែន តើយើងនឹងទៅប្រព័ន្ធព្រះអាទិត្យផ្សេង ឬ?
(ភ្នំពេញ)៖ ឥន្ធនៈ Antimatter គឺជាប្រធានបទខ្យល់មួយ ក្នុងពិភពវិទ្យាសាស្ត្រ ជាពិសេស គឺនៅពេលដែលខ្សែភាពយន្ត Avatar ត្រូវបានផលិតឡើងកាលពីប៉ុន្មានឆ្នាំមុន ដែលនាំឲ្យមនុស្សភាគច្រើនយល់ថា ថ្ងៃមួយពួកគេនឹងអាចឃើញ ថាមពលឥន្ធនៈប្រភេទនេះ កើតមានឡើងពិតប្រាកដ ហើយមនុស្សនឹងអាចមានលទ្ធភាពប្រើប្រាស់វា បញ្ជាយានទៅកាន់ប្រព័ន្ធព្រះអាទិត្យដែលនៅជិតៗយើង ដូចជា Alpha Centauri ជាដើម ដោយប្រើពេលមិនដល់មួយទសវត្សរ៍។
ចុះតើវាអាចកើតមានបានដែរទេ ចំពោះឥន្ធនៈ Antimatter ដែលមួយគីឡូក្រាមនៃវា អាចបញ្ជូនយានពីផែនដី ទៅដល់ភពព្រហស្បតិ៍ងាយដូចបកចេកនោះ? បើផលិតវាបាន តើមនុស្សអាចទុកវាសម្រាប់តែប្រើនៅក្នុងបេសសកម្មអវកាស ឬក៏អាចយកធ្វើជាប្រយោជន៍សម្រាប់ភពផែនដី ខណៈដែលធនធានថាមពលនានា ចាប់ផ្តើលចុះខ្សោយ? ទាំងនេះសុទ្ធតែជាសំនួរ ដែលប្រកបដោយទស្សនៈវិស័យដ៏វែងឆ្ងាយ ប៉ុន្តែទោះបីជាថាមពលនោះមានប្រយោជន៍ដល់កម្រិតណាក៏ដោយ បើមនុស្សប្រើវាក្នុងផ្លូវខុស វាមិនខុសពីការបង្កមហន្តរាយ ដែលធំធេងជាងការទម្លាក់គ្រាប់បែកនុយក្លេអ៊ែរ នោះឡើយ។
សម្រាប់និយមន័យនៃថាមពល Antimatter នៅក្នុងរូបវិទ្យាសម័យទំនើបនេះ គឺសំដៅទៅរូបធាតុផ្សំនៃ antiparticle (ភាគល្អិតតូចជាងអាតូម ដែលមានលក្ខណៈផ្ទុយទៅនឹងអគ្គិសនី ឬម៉ាញេទិច)។ ភាគលម្អិតនៃ antiparticle គឺមានវិមាត្រ ដូចគ្នាទៅនឹងអេឡិចត្រុង ប៉ុន្តែស្ថិតនៅក្នុងបន្ទុកស្មើ និងផ្ទុយគ្នា។ បងប្អូនប្រាកដជាមិនសូវយល់នោះទេ ចំពោះចំណុចនេះ ប៉ុន្តែដើម្បីឲ្យងាយយល់ យើងអាចសរុបបានថា antimatter ជាថាមពលផ្សំឡើងពេលភាគល្អិត anitparticle ដែលតូចជាអាតូម នៃថាមនុយក្លេអ៊ែរទៅទៀត ដែលវាពិតជាផ្ទុកនូវសន្ទុះថាមពលខ្លាំងក្លា ជាងថាមពលនានាទាំងអស់ រួមទាំងថាមអាតូមិក (មានបរិមាណតិច ប៉ុន្តែបញ្ចេញថាមពលខ្លាំង)។
ថាមពលឥន្ធនៈ Antimatter ពិតណាស់ថា នឹងបង្កើតឡើងដើម្បីគោលដៅសិក្សាវិស័យអវកាសជាចម្បង ព្រោះថាយាននីមួយៗ ឬរ៉ុក្កែតដែលត្រូវបានបាញ់បង្ហោះទៅទីអវកាស វាត្រូវបានប្រើត្រឹមឥន្ធនៈហ្វីស៊ីលប៉ុណ្ណោះ ដែលតម្រូវឲ្យយើងដឹកវាក្នុងចំនួនដ៏ច្រើន ប៉ុន្តែអាចត្រឹមបំពេញបេសកកម្មក្នុងចំងាយខ្លីប៉ុណ្ណោះ។ ប៉ុន្តែសម្រាប់ Antimatter ដែលអ្នកវិទ្យាសាស្ត្រមួយចំនួន ធ្លាប់គ្រវីក្បាលថា មិនអាចកើតមានឡើងទៅរួចនោះ គឺត្រូវការក្នុងចំនួនសមរម្យ តែអាចដឹកនាំ យានណាមួយទៅកាន់តែឆ្ងាយ… ឧទាហរណ៍យានអវកាសជិះទៅប្រព័ន្ធផ្កាយ Alpha Centauri ដែលស្ថិតនៅ ៤.៤ឆ្នាំពន្លឺពីផែនដី ត្រូវចំណាយពេលតែ ៥ឆ្នាំប៉ុណ្ណោះ ដោយប្រើល្បឿនពន្លឺដើម្បីធ្វើដំណើរទៅ។
សរុបសេចក្តីមក សូមបងប្អូនកុំមានសង្ឃឹមពេកអី ដូចជាសារព័ត៌មាននានាធ្លាប់បានចេញហើយថា បញ្ហាចម្បងនៃការសិក្សាទីអវកាស គឺមិនមែនមកពីពេលវេលា និងបច្ចេកវិទ្យាជាចម្បងនោះឡើយ ប៉ុន្តែវាអាស្រ័យលើធនធាន ដែលរដ្ឋនីមួយៗប្រគល់ជាលក្ខណៈសប្បុរស ឲ្យអង្គការអវកាសរបស់ពួកគេ ជាពិសេសគឺ NASA របស់អាមេរិក និង ESA របស់អឺរ៉ុបជាដើម ដែលត្រូវអង្គុយចំហមាត់ រង់ចាំថវិកាជាតិប្រចាំឆ្នាំធ្លាក់មកយ៉ាងលំបាក។ វាមានន័យថា មនុស្សមានសមត្ថភាពឥតដែនកំណត់នោះឡើយ ប៉ុន្តែថវិកាវិញគឺមានដែនកំណត់ច្បាស់លាស់ណាស់។
សម្រាប់សំនួរដែលសួរថា តើ Anitmatter នឹងត្រូវប្រើដើម្បីបេសកកម្មអ្វីនោះ យើងខ្ញុំអាចឆ្លើយបានដោយខ្លីថា វត្ថុដែលកម្រ គឺជាវត្ថុដែលមានតម្លៃ ដូច្នេះវានឹងត្រូវទុកប្រើក្នុងពេលចាំបំផុតប៉ុណ្ណោះ។ ហេតុដូច្នេះ បើវានឹងត្រូវបង្កើតឡើង ដើម្បីបេសកកម្មអវកាសនោះ គឺវាប្រាកដណាស់ថា Antinmatter នឹងត្រូវប្រើដើម្បីបាញ់បញ្ជូនយានទៅទីឆ្ងាយៗ ដោយកាត់បន្ថយពេលវេលាបានច្រើនលើសលុប និងដើម្បីបង្កើតសង្ឃឹមក្នុងការបន្តសាយភាយអរិយធម៌របស់មនុស្ស ទៅកាន់ទីកន្លែងផ្សេងទៀត នៅពេលដែលផែនដី កាន់តែណែនណាន់តាន់តាប់ និងអាចរលំរលាយនៅថ្ងៃណាមួយ៕
