ហេតុអ្វីក៏ការស្រាវជ្រាវវិស័យអវកាស ប្រព្រឹត្តទៅយឺត និងកាន់តែលំបាកទៅៗ? ស្វែងយល់់មូលហេតុ…
(អវកាស)៖ ដូចដែល Cambo Space ធ្លាប់បកស្រាយប៉ុន្មានដងរួចមកហើយ ប៉ុន្តែដោយសារបងប្អូនមួយចំនួននៅតែងឿងឆ្ងល់ និងបងប្អូនខ្លះចង់បានការស្រាវជ្រាវលឿននោះ ទើបយើងខ្ញុំសូមធ្វើការបកស្រាយម្តងទៀត។ រឿងស្រាវជ្រាវនៅទីអវកាស គឺមិនមែនងាយស្រួលនោះឡើយ ដោយគំរោងនីមួយៗត្រូវការពេលរាប់ទស្សន៍ ឬរហូតដល់រាប់សតវត្សរ៍ផងដើម្បីសម្រេចបាន ប៉ុន្តែវាមិនមែនបានន័យថា មនុស្សគ្មានសមត្ថភាពគ្រប់គ្រាន់នោះឡើយ។
បើនិយាយអំពីខួរក្បាល និងការបង្កើតគំរោងគឺមនុស្សអាចអភិវឌ្ឍន៍ទៅបានដោយគ្មានដែនកំណត់ ហើយនិងគួរឲ្យភ្ញាក់ផ្អើលបំផុតថែមទៀត ប៉ុន្តែថាតើគំរោងរបស់ពួកគេទាំងនោះអាចសម្រេចទៅបានឬទេបើគ្មានរបស់ពីរនេះ គឺហិរញ្ញវត្ថុ និងការសហការគ្នា។ ដូចខាងក្រោមនេះ គឺជាមូលហេតុចម្បងចំនួនពីរ ដែលនាំឲ្យការស្រាវជ្រាវ និងបេសកកម្មអវកាសមានសភាពយឺត និងកាន់តែលំបាកទៅពីមួយជំនាន់ ទៅមួយជំនាន់៖
១. ហិរញ្ញវត្ថុ៖ គំរោងសិក្សានីនានារួមទាំងការបង្កើតយានអវកាសសិក្សាលើអ្វីមួយ ទាំងនៅលើផែនដី និងនៅក្នុងប្រព័ន្ធព្រះអាទិត្យ វាប្រាកដជាត្រូវការយ៉ាងហោចណាស់ខ្ទង់រាប់លានដុល្លារឡើងទៅ ហើយគេពុំអាចរកផលចំណេញអ្វីមកវិញក្រៅតែពីការដឹងព័ត៌មាន និងរបកគំហើញនៃវិទ្យាសាស្ត្រនោះឡើយ។ បើវាអាចសម្រេចលទ្ធផលតាមផែនដីនោះគឺមិនជាអ្វីទេ ប៉ុន្តែបើបរាជ័យវិញវាប្រៀបដូចជាយានអវកាសអឺរ៉ុបតម្លៃជាង ១ពាន់លានដុល្លារអាមេរិកដែលបានធ្លាក់ឆេះខ្ទេចពេលព្យាយាមចុះចតលើផ្ទៃភពអង្គារ កាលពីប៉ុន្មានខែមុនដូច្នោះឯង។
បន្ថែមពីនេះថវិកាដែលចាត់ទុកថាជាវិភាគទានរបស់រដ្ឋាភិបាលនេះ គឺមានដែនកំណត់ណាស់សម្រាប់គំរោងនីមួយៗ ដោយសារតែរដ្ឋាភិបាលជាច្រើនលើលោក រួមទាំងអាមេរិកចាប់ផ្តើមសន្សំសំចៃ និងគិតថាការស្រាវជ្រាវក្លាយជារឿងលែងសូវចាំបាច់។
អ្នកវិភាគ និងអ្នកវិទ្យាសាស្ត្រជាច្រើនធ្លាប់បានលើកឡើងថា ពួកគេអាចធ្វើអ្វីៗក៏បាន និងរហ័សទៀតផងប្រសិនបើមានថវិកាគ្រប់គ្រាន់ ដូចជាគំរោងបញ្ជូនយានទៅប្រព័ន្ធផ្កាយផ្សេង, ការបង្កើតនាវាអវកាសដែលអស្ចារ្យជាងស្ថានីយ៍អវកាស, ការបង្កើតទីក្រុងលើព្រះច័ន្ទ ឬលើភពព្រះអង្គារឲ្យឆាប់ជាងគំរោង, ឬការផលិតផលិតផលអស្ចារ្យផ្សេងៗទៀតជាដើម។
២. កិច្ចសហការ៖ អង្គការអវកាសនានាលើលោក នឹងធ្វើការសហការគ្នាដើម្បីផលប្រយោជន៍រួមដែលជាទិសដៅដូចគ្នាប៉ុណ្ណោះ ប៉ុន្តែប្រសិនបើគោលដៅខុសគ្នានោះភាគីនីមួយៗពិបាកនឹងត្រដាបត្រដួសធ្វើអ្វីតែឯកឯងណាស់ ហើយគំរោងដែលធ្វើបាននឹងសម្រេចដោយល្បឿនយឺត និងពិបាកទទួលជោគជ័យដូចការងាកមកសហការគ្នា ឧទាហរណ៍បើអឺរ៉ុបរួមសហការជាមួយអង្គការ NASA យ៉ាងល្អិតល្មួត នោះគំរោងទៅកាន់ភពអង្គារ នឹងកាន់តែលឿនជាងឆ្នាំ២០៣០។
សរុបសេចក្តីមកនាពេលបច្ចុប្បន្ន និងទៅថ្ងៃអនាគតការស្រាវជ្រាវនៅទីអវកាសកាន់តែមានភាពស្តួចស្តើងសម្រាប់បណ្តាប្រទេសដែលនឹងទទួលរងវិបត្តិនៃឱនភាពសេដ្ឋកិច្ច ហើយជំនួសមកវិញនូវបណ្តាប្រទេសសេដ្ឋកិច្ចរីកចំរើនថ្មីៗដូចជាឥណ្ឌា ចិន និងបណ្តាប្រទេសអ្នកមាននៅអារ៉ាប់មួយចំនួន ហើយវាក៏អាចជាការបើកទំព័រថ្មីនៃការសិក្សាស្រាវជ្រាវទីអវកាស ដែលខុសប្លែកពីបណ្តាទសវត្សរ៍មុនៗ ដែលគ្រប់គ្នាមានតែអង្គុយរង់ចាំមើលពីលទ្ធផលប៉ុណ្ណោះ៕
