NASA កំពុងអភិវឌ្ឍន៍បច្ចេកវិទ្យាដ៏ខ្លាំងក្លា ទុកបាញ់កម្ទេចអាចម៍ផ្កាយ ដើម្បីបញ្ចៀសការរលំរលាយ ដូចជំនាន់ដាយណូស័រ
(អាមេរិក)៖ ស្តាប់ទៅប្រហែលជាដូចភាពយន្តប្រឌិតបែបវិទ្យាសាស្រ្ត ប៉ុន្តែភ្នាក់ងារអវកាស ណាសាបានបង្ហាញនៅក្នុងសន្និសីទនៅមជ្ឈមណ្ឌលហោះហើរអវកាស Goddard ថាក្រុមអ្នកវិទ្យាសាស្រ្តកំពុងតែស្រាវជ្រាវរកវិធីសាស្ត្រថ្មីៗ ដែលអាចការពារភពផែនចេញពីការបំផ្លិចបំផ្លាញដោយពពួកអាចម៍ផ្កាយកំណាច ដោយគំនិតនេះមានបំណងអភិវឌ្ឍន៍ បច្ចេកវិទ្យាបេសកកម្មលំហអាកាស ឲ្យមានភាពប្រសើរឡើងជាងមុន។ នេះបើយោងតាមប្រភពព័ត៌មានវិទ្យាសាស្រ្ត Science Daily ចេញផ្សាយនៅព្រឹកថ្ងៃអង្គារ ទី១៣ ខែធ្នូ ឆ្នាំ ២០១៦។
លោក Jason Kessler ដែលជានាយកគ្រប់គ្រងគំរោងរបស់ភ្នាក់ងារអវកាសណាសា និយាយថា «អាចម៍ផ្កាយនៅក្នុងប្រព័ន្ធព្រះអាទិត្យត្រូវបានកំណត់ ហើយបើតាមដឹងនោះពួកវាមួយចំនួន បាននិងកំពុងរំកិលកាន់តែខិតមកជិតភពផែនដីហើយ»។
ជាមួយគ្នានេះដែរក្រុមអ្នកវិទ្យាសាស្រ្តបាននិយាយថា «ពួកយើងបានរកឃើញអាចម៍ផ្កាយមួយដែលមានប្រវែង ១០គីឡូម៉ែត្រដែលបានធ្លាក់នៅជំនាន់សត្វដាយណូស័ ដោយបានសម្រាប់ជីវិតនៅភពផែនដីអស់ប្រមាណ ៩៥ភាគរយ។ ជាក់ស្តែងក៏នៅមានអាចម៍ផ្កាយមួយទៀតមានប្រវែង ៣០គីឡូម៉ែត្រដោយមិនទាន់ត្រូវបានគេសិក្សានៅឡើយទេ»។
ជាក់ស្តែងក្រុមអ្នកវិទ្យាសាស្រ្តណាសា កំពុងតែបង្កើតបេសកកម្មប្តូរទិសដៅអាចម៍ផ្កាយដែលនឹងឲ្យក្រុមអ្នកវិទ្យាសាស្រ្តបំពេញបេសកកម្មនៅលំហអាកាសក្នុងប្រតិបត្តិការផ្សេងៗគ្នា។ មិនតែប៉ុណ្ណោះសព្វថ្ងៃ បច្ចេកវិទ្យាដ៏ទំនើបនេះកំពុងតែត្រូវបានគេបង្កើត ដើម្បីបញ្ជៀសអាចម៍ផ្កាយពីភពផែនដី។
គួរបញ្ជាក់ដែរថាបេសកកម្មនេះនឹងត្រូវធ្វើឡើងនៅក្នុងលំហអាកាស ដោយមានទំនាក់ទំនងរវាងមនុស្ស និងគ្រឿងយន្ត។ ម្យ៉ាងវិញទៀតនៅមានអាចម៍ផ្កាយ ៩៨ភាគរយទៀតមិនទាន់ត្រូវបានគេរកឃើញនៅឡើយទេ។ សម្រាប់ភពផែនដីយើង គឺធ្លាប់បានរងគ្រោះដោយអាចម៍ផ្កាយធំបំផុត ដែលមានប្រវែងព័ទ្ធជុំវិញ ១០គីឡូម៉ែត្រកាលពី ៦៥លានឆ្នាំមុន ដែលបានធ្វើឲ្យពពួកដាយណូស័រផុតពូជទាំងស្រុង៕
