ភាគច្រើនមិនដឹងរឿងនេះទេ! តាមពិតយានរបស់រុស្ស៊ីធ្លាប់ចុះចត និងថតរូបភាពពិតៗលើ «ភពសុក្រ»! (មានរូបភាព)
(អវកាស)៖ យានអវកាសស៊េរី Venera របស់រុស្ស៊ី (កាលណោះជាសហភាពសូវៀត) ត្រូវបានបាញ់បង្ហោះ និងទទួលបរាជ័យជាច្រើនលើក ប៉ុន្តែមានតែយាន Venera 13 ប៉ុណ្ណោះដែលបានទទួលជោគជ័យក្នុងបេសកកម្មនៅលើផ្ទៃភពសុក្រ ដែលយើងតែងហៅថាផ្កាយព្រឹក ឬផ្កាយចោរ គឺការផ្តិតយករូបភាពជាពណ៌ធម្មជាតិបញ្ជូនមកកាន់ភពផែនដីវិញ ក្រោយពីវាបានចុះចតនៅភពដ៏មហាសែនក្តៅនោះកាលពីថ្ងៃទី០១ ខែមីនា ឆ្នាំ១៩៨២។ នេះបើតាមការដកស្រង់ការផ្សាយរបស់សារព័ត៌មាន Space។
យានខាងលើនេះត្រូវបានក្រុមអ្នកវិទ្យាសាស្ត្រសហភាពសូវៀត អភិវឌ្ឍន៍ឡើងដើម្បីអាចស៊ូទ្រាំនឹងបរិយាកាសដ៏ក្តៅរបស់ភពសុក្រ ប៉ុន្តែវាអាចទ្រាំទ្របានតែ ៣០នាទីប៉ុណ្ណោះ បន្ទាប់ពីនោះយាននឹងខូចលែងដំណើរការបានទៀតហើយ។ រូបភាពដែលទទួលបានគឺការបើកផ្លូវមួយឲ្យក្រុមអ្នកវិទ្យាសាស្ត្របានដឹងកាន់តែច្បាស់ថា ភពសុក្រមិនមែនជាកន្លែងសម្រាប់ស្រាវជ្រាវ ឬក៏មូលដ្ឋានរបស់មនុស្សនៅថ្ងៃអនាគត ដូចភពអង្គារ និងព្រះច័ន្ទរបស់យើងនោះឡើយ។
លក្ខណៈមួយចំនួននៃភពសុក្រមានដូចជា៖ មានទំហំស្ទើរប៉ុនភពផែនដី, មានសីតុណ្ហភាពមធ្យមជាង ៤៤០អង្សាសេ, មានពពកគ្របដណ្តប់ជាប់ជានិច្ច (មិនដែលស្គាល់ពន្លឺថ្ងៃ), មានចម្ងាយជិតព្រះអាទិត្យ ជាងផែនដី និងគោចរជុំវិញព្រះអាទិត្យលឿនជាងផែនដី ប៉ុន្តែវិលជុំវិញខ្លួនឯងមហាយឺត, និងមានពន្លឺភ្លឺខ្លាំងជាងគេនៅពេលយប់លំដាប់ទីពីរបន្ទាប់ពីពន្លឺព្រះច័ន្ទ នៅលើផ្ទៃមេឃរបស់ផែនដីយើង៕
សូមទស្សនារូបភាពពិតរបស់ភពសុក្រ ដែលត្រូវបានថតដោយយានរុករក Venera 13 ខាងក្រោមនេះ៖
