អស្ចារ្យទេ? បានតែដឹង តែគ្មានថ្ងៃទៅបាន! «មានភ្លៀងគ្រាប់ពេជ្រនៅ ភពណិបទូន និង ភពអ៊ុយរ៉ាណូស»
(វិទ្យាសាស្រ្ត)៖ ស្តាប់ទៅវាពិតជាមិនគួរឲ្យជឿសោះថា ភពជិតខាងគ្នាគឺ ភពណិបទូន និងភពអ៊ុយរ៉ាណូស អាចផ្ទុកវត្ថុដ៏មានតម្លៃមហាសាលច្រើនជាងភពផែនដីនោះ។ ដោយសារតែពួកវាផ្ទុកទៅដោយវត្ថុមានតម្លៃយ៉ាងច្រើនលើសលុបបែបនេះហើយ ទើបពួកវាត្រូវបានអ្នកវិទ្យាសាស្រ្តមើលឃើញ មានគ្រាប់ពេជ្រជាច្រើនធ្លាក់ដូចជាតំណក់ទឹកភ្លៀងពីបរិយាកាសនៃភពទាំងពីរ។ នេះបើយោងតាមប្រភពព័ត៌មានវិទ្យាសាស្រ្ត Science Daily ចេញផ្សាយនៅព្រឹកថ្ងៃពុធ ទី១៨ ខែមករា ឆ្នាំ២០១៧។
ជាក់ស្តែង ភពណិបទូន និងភពអ៊ុយរ៉ាណូស ផ្ទុកទៅដោយសារធាតុមេតានច្រើនលើសលុបដែលក្រុមអ្នកវិទ្យាសាស្រ្តបានបង្ហាញឲ្យឃើញថា សារធាតុមេតានទាំងអស់នោះអាចក្លាយទៅជាគ្រាប់ពេជ្រ ព្រមទាំងសរីរាង្គសុំាញុំាជាច្រើនទៀត។ ការសិក្សាបង្ហាញឲ្យឃើញទៀតថា ការបំលែងពីសារធាតុមេតានទៅជាគ្រាប់ពេជ្រកើតឡើងបានលុះត្រាតែ សម្ពាធសីតុណ្ហភាពនៅក្នុងបរិយាកាសមានកំរិតខ្ពស់។
គួរបញ្ជាក់ថា ភពណិបទូន និងអ៊ុយរ៉ាណូស គឺជាភពដែលស្ថិតនៅចុងគេនៃប្រព័ន្ធព្រះអាទិត្យយើង ហើយវាមានទំហំប្រហាក់ប្រហែលគ្នា សារធាតុផ្សំស្ទើរដូចគ្នាទាំងស្រុង និងមានពណ៌ផ្ទៃមេឃដ៏ស្រស់ស្អាតថែមទៀតផង។ ក្រុមអ្នកវិទ្យាសាស្ត្របានបញ្ជូនយានរុករក ជាលើកដំបូងទៅថតរូបភាពនៃភពទាំងពីរបានកាលពីអំឡុងទសវត្សរ៍ឆ្នាំ ១៩៨០៕
