Ground Breaking! ទីបំផុតអង្គការ NASA រកឃើញហើយ តែមិនមែនជាអេលៀននោះទេនៅលើភពព្រះអង្គារ…
(បរទេស)៖ របកគំហើញថ្មីៗជាប្រវត្តិសាស្ត្របន្ថែមទៀតរបស់អង្គការ NASA នោះការរកឃើញកាបូនសរីរាង្គនៅលើភពព្រះអង្គារតែម្តង ហើយដែលលទ្ធផលដ៏គួរឲ្យភ្ញាក់ផ្អើលបំផុតនេះ អាចនឹង ជួយដល់ក្រុមអ្នកវិទ្យាសាស្ត្រក្នុងការតាមប្រមាញ់ជីវិតនៅលើភពមួយនេះ នៅពេលអនាគត។ នេះបើតាមចេញផ្សាយព័ត៌មាន National Geographic នៅព្រឹកថ្ងៃសុក្រ ទី០៨ ខែមិថុនា ឆ្នាំ២០១៨។
យោងតាមការសិក្សាថ្មីមួយ របស់ក្រុមអ្នកវិទ្យាសាស្រ្តណាសា ចុះផ្សាយនៅលើទស្សនាវដ្ដី Science នៅថ្ងៃព្រហស្បតិ៍សប្ដាហ៍នេះ ភពព្រះអង្គារ ត្រូវបានគេជឿជាក់ថា មានសមាសភាពកាបូនមូលដ្ឋាន ឬគេហៅថា «ម៉ូលេគុលសរីរាង្គ» ដែលជាសមាសធាតុដ៏សំខាន់សម្រាប់ជីវិត។ បន្ថែមពីលើនេះ ការសិក្សាដដែលក៏បានឱ្យដឹងដែរថា មានភស្ដុតាងជាច្រើនអាចបញ្ជាក់បានថា ជាម៉ូលេគុលសរីរាង្គធំៗនៅលើភពព្រះអង្គារ ហើយដែលនេះគឺជាការខិតខំប្រឹងប្រែងបន្តពីការរុករកនៃយាន Viking របស់ NASA ដែលបានចុះចតលើភពព្រះអង្គារ នៅអំឡុងទសវត្សរ៍ឆ្នាំ១៩៧០។
ចំណែកឯការធ្វើតេស្ដកាលពីលើកមុនៗ អាចអង្អុលបង្ហាញពីសារពាង្គកាយ ប៉ុន្តែវត្តមាន ក្លរីន (chlorine) បែរជាធ្វើឱ្យគេពិបាកក្នុងការបកស្រាយទៅវិញ។ ដោយឡែកជុំវិញរបកគំហើញនេះដែរ លោកស្រី ជែននីហ្វឺ អេហ្គែនប្រូដ (Jennifer Eigenbrode) ជាអ្នកវិទ្យាសាស្រ្តជីវៈ-គីមី នៃអង្គការ NASA បានលើក ឡើងយ៉ាងដូច្នេះថា «នៅពេលដែលអ្នកធ្វើការជាមួយនឹងអ្វីមួយ ប្រៀបដូចជាមនុស្សឆ្កួតនៅលើភពព្រះអង្គារ ជាមួយឧបករណ៍ដ៏ស្មុគស្មាញ ដែលត្រូវបញ្ជូនទៅកាន់ទីអវកាស នោះវាហាក់ដូចជាយើងកំពុងធ្វើអ្វីមួយ ដែលយើងជឿជាក់ជាមុនថា វាមិនអាចទៅរួច… ប៉ុន្តែខ្ញុំបានធ្វើការងារជាមួយក្រុមការងារដ៏អាស្ចារ្យ នៅលើភពព្រះអង្គារ ហើយយើងបានរកឃើញរបកគំហើញថ្មីជាច្រើន»។
គួរបញ្ជាក់ថា នេះមិនមែនជាលើកទីមួយឡើយ ដែលអង្គការ NASA ប្រកាសពីរបកគំហើញថ្មីៗ ពាក់ព័ន្ធនឹងជីវិតនៅលើភពព្រះអង្គារ ពោលគឺអង្គការមួយនេះក៏ធ្លាប់បានអះអាងផងដែរថា ខ្លួនបានរកឃើញស្លាកស្នាមប្រភពទឹក អមជាមួយម៉ូលេគុលសរីរាង្គដ៏ស្មុគស្មាញនៅលើភពមួយនេះ ដែលធ្លាប់កើតមានកាលពីជាង ៣.៥ពាន់លានឆ្នាំមុនផងដែរ។
ចំណុចបន្ថែម៖ កាលពីខែកញ្ញា ឆ្នាំ២០១៥ អង្គការ NASA បានចេញសេចក្តីប្រកាសដ៏ធំមួយ ដែលនាំឲ្យកក្រើកពិភពវិទ្យាសាស្ត្រ នោះគឺការរកឃើញវត្តមានទឹករាវ ហូរនៅលើផ្ទៃភពព្រះអង្គារក្នុងចំនួនតិចតួច ហើយវាពិតជាសញ្ញាមួយដ៏ប្រសើរថ្លៃថ្លា ក្នុងការអនុញ្ញាតឲ្យក្រុមអ្នកវិទ្យាសាស្ត្រអន្តរជាតិ បន្តប្រើយានតាមដានអំពីលក្ខណៈបន្ថែមនៃភពអង្គារ ដែលកាលពីរាប់រយរាប់ពាន់លានឆ្នាំមុន អាចធ្លាប់មានជីវិតរស់នៅ ឬក៏បរិយាកាសស្រដៀងនឹងភពផែនដីនេះ៕
