តោះ! តាមដាន «បាតុភូតដ៏អស្ចារ្យជាច្រើន នៅលើផ្ទៃមេឃ» ក្នុងខែកុម្ភៈនេះ! (សម្រាប់ផ្ទៃមេឃស្រឡះ)
(អវកាស)៖ ក្រុមអ្នកចូលចិត្តទស្សនាផ្ទៃមេឃទាំងអស់នៅចុងសប្តាហ៍នេះ នឹងទទួលបានចំណីចក្ខុដ៏ពិសេស និងប្លែកអារម្មណ៍ចំនួនពីរគឺ ច័ន្ទគ្រាសដែលមានស្រមោលស្ទង់ៗនៅវេលាម៉ោង ៥៖៣៤នាទីព្រឹកថ្ងៃសៅរ៍ ទី១១ ខែកុម្ភៈ (ពេលវេលានៅទីក្រុងភ្នំពេញ ប៉ុន្តែយើងមិនអាចមើលឃើញដល់វាបាត់ស្រមោលពេញ ១០០ភាគរយនោះទេ ក៏ព្រោះតែពេលព្រះច័ន្ទត្រូវស្រមោលលេបពេញតែម្តងនៅម៉ោង ៧៖៤៣នាទីព្រឹក) ហើយនិងផ្កាយដុះកន្ទុយពណ៌បៃតងដ៏ចម្លែក ដែលនឹងឡើងដល់កម្រិតអាចមើលឃើញច្បាស់បំផុតនៅថ្ងៃបន្ទាប់ (សម្រាប់អ្នកនៅបរទេសប៉ុណ្ណោះ)។ នេះបើតាមការដកស្រង់ប្រភពព័ត៌មានចេញពីគេហទំព័រវិទ្យាសាស្រ្ត Space.com នៅរសៀលថ្ងៃសុក្រ ទី១០ ខែកុម្ភៈ ឆ្នាំ២០១៧។
ជាដំបូងព្រះច័ន្ទពេញវង់ឬមួយក៏ «ព្រះចន្ទដូចព្រិល» ប្រចាំខែកុម្ភៈ នឹងធ្វើដំណើរឆ្លងកាត់តំបន់ចុងស្រមោលនៃផែនដី ដែលត្រូវបានគេហៅថា «Penumbra (ផ្នែកស្រមោលស្ទង់ៗ)»។ នៅអំឡុង «ច័ន្ទគ្រាសដូចព្រិលពេញវង់» ព្រះច័ន្ទនឹងត្រូវគ្របដណ្តប់ដោយស្រមោលពេញទាំងស្រុង ដែលធ្វើឲ្យការផ្លាស់ប្តូរងាយនឹងត្រូវមើលឃើញច្បាស់ ក៏ប៉ុន្តែវានឹងមិនមានភាពល្អខ្លាំងនោះឡើយដូចទៅនឹង «ច័ន្ទគ្រាសធម្មតា» នៅពេលដែលព្រះច័ន្ទធ្វើដំណើរឆ្លងកាត់ចូលទៅយ៉ាងជ្រៅក្នុងស្រមោលផែនដីដែលជាផ្នែកមានឈ្មោះថា «Umbra» ហើយប្រែពណ៌ទៅជារៀងក្រហមខ្លាំង។
ដោយឡែកចំពោះផ្កាយដុះកន្ទុយ Comet 45P ឬ Honda-Mrkos-Pajdusakova វិញនឹងអាចឲ្យយើងមើលឃើញដោយប្រើប្រាស់កែវយឺតបាន ក្នុងអំឡុងពេលព្រលឹមទាបភ្លឺនៅចន្លោះពីថ្ងៃសុក្ររហូតដល់ថ្ងៃអាទិត្យសប្តាហ៍នេះ (ម៉ោងនៅទីក្រុងញូយ៉ក) ក្នុងបណ្តុំផ្កាយហឺឃ្យូលីស (Hercules) ដែលស្ថិតផ្ទៃមេឃភាគខាងកើត។ នៅព្រឹកថ្ងៃសៅរ៍សប្តាហ៍នេះផ្កាយដុះកន្ទុយ Comet 45P នឹងធ្វើដំណើរឆ្លងកាត់កៀកនឹងផែនដីបំផុត នៅក្នុងចម្ងាយត្រឹមតែ១២លានគីឡូម៉ែត្រប៉ុណ្ណោះពីភពរបស់យើង។
គួរបញ្ជាក់ថាចន្ទគ្រាសដែលមានស្រមោលស្ទង់ៗខាងលើនេះ នឹងអាចត្រូវបានមើលឃើញស្ទើរតែនៅទូទាំងពិភពលោក លើកលែងតែកោះហាវៃ អូស្រ្តាលី នូវែលសេឡង់ និងបណ្តាប្រទេសមួយចំនួនទៀតនៅតាមបណ្តោយឆ្នេរសមុទ្រប៉ាស៊ិហ្វិក និងតំបន់ភាគខាងកើតអាស៊ី។ គួរឲ្យសោកស្តាយពេលវេលាដែលព្រះចន្ទចាប់ផ្តើមធ្វើដំណើរទៅកាន់ស្រមោលផែនដីគឺត្រូវនឹងម៉ោង៥៖៣២ព្រឹកថ្ងៃសៅរ៍ស្អែកនេះ ហើយនៅពេលដែលវាចូលជ្រៅពេញទាំងស្រុងនោះគឺម៉ោង៧៖៤៣នាទីព្រឹកបាត់ទៅហើយ ដោយយើងមិនអាចមើលឃើញទៀតឡើយ៕
