តើស្រទាប់អូហ្សូននៃភពផែនដី ត្រូវធ្លុះធ្លាយបន្ថែមទៀត ដោយសារឧស្ម័នពុលចេញពីប្រទេសចិនឬ?
(ប៉េកាំង)៖ ប្រទេសចិនកំពុងស្ថិតក្រោមការសង្ស័យថា ជាអ្នកបង្កឲ្យមានការកើនឡើងយ៉ាងខ្លាំង នៃការបញ្ចេញឧស្ម័ន CFC-11 ដែលជះគ្រោះថ្នាក់ខ្ពសដល់ស្រទាប់ការពារអូហ្សូន។ នេះបើតាមការដកស្រង់ការផ្សាយចេញពីសារព័ត៌មាន BBC នៅល្ងាចថ្ងៃអង្គារ ទី១៧ ខែកក្កដា ឆ្នាំ២០១៨។
ទីភ្នាក់ងារស៊ើបអង្កេតបរិស្ថាន EIA មានមូលដ្ឋាននៅចក្រភពអង់គ្លេស បានរកឃើញថា មានការប្រើប្រាស់ឧស្ម័ន CFC-11 យ៉ាងទូលំទូលាយនៅក្នុងប្រទេសចិន ទោះបីជាឧស្ម័នគីមីនេះត្រូវបានហាមប្រាមទាំងស្រុង កាលពីឆ្នាំ២០១០ក៏ដោយក្តី។ អ្នកវិទ្យាសាស្រ្តមានការងឿងឆ្ងល់ជាខ្លាំង ចំពោះការកើនឡើងដោយអាថ៌កំបាំង នៃការបញ្ចេញឧស្ម័ននេះ។ របាយការណ៍របស់ EIA បានឲ្យដឹងថា ប្រភពចម្បងនោះគឺទាក់ទិននឹងវិស័យសំណង់គេហដ្ឋានរបស់ប្រទេសចិន។
គួរជម្រាបថា CFC-11 គឺជាភ្នាក់ងារដ៏មានប្រសិទ្ធភាពមួយ សម្រាប់ការយកទៅអភិវឌ្ឍន៍ចេញជាអ៊ីសូឡង់កាត់បន្ថយកម្តៅ ដែលប្រើប្រាស់នៅក្នុងផ្ទះសម្បែងនានា ដើម្បីកាត់បន្ថយការចំណាយលើថាមពល និងកាត់បន្ថយការបញ្ចេញឧស្ម័នកាបូនឌីអុកស៊ីត។ ក្រុមអ្នកស្រាវជ្រាវមកពី EIA បានទាក់ទងនឹងក្រុមហ៊ុនពាក់ព័ន្ធនៅតាមខេត្ត ១០ ខុសៗគ្នាក្នុងប្រទេសចិន បានរកឃើញថា ភាគច្រើនគឺមានការប្រើប្រាស់ឧស្ម័ន CFC-11 ប្រាកដមែន។
សម្រាប់មូលហេតុដែលឧស្ម័ន CFC-11 មានការពេញនិយមបែបនេះ គឺដោយសារតែវាមានគុណភាពខ្ពស់ និងមានតម្លៃធូរថ្លៃជាងជម្រើសផ្សេងទៀត។ អាជ្ញាធរក៏បានចេញការហាមឃាត់លើ CFC-11 ដែរ ប៉ុន្តែការអនុវត្តន៍ច្បាប់ គឺពុំមានប្រសិទ្ធភាពនោះឡើយ ជាពិសេសគឺខណៈដែលតម្រូវការសាងសង់លំនៅឋានកាន់តែកើនឡើង និងពិបាករកអ្វីផ្សេងមកជំនួស។
គួរបញ្ជាក់ផងដែរថា បញ្ហាខាងលើគឺជារឿងដ៏ធំមួយ ដោយសារតែបរិមាណនៃឧស្ម័ន CFC-11 ដែលកំពុងប្រើប្រាស់ ព្រមទាំងលទ្ធភាពរបស់វា ក្នុងការបង្កភាពរាំងស្ទះដល់ភាពប្រសើរឡើងវិញ ដែលកំពុងចាប់ផ្តើមឡើងនៅក្នុងស្រទាប់អូហ្សូន ហើយអង្គការគាំពារបរិស្ថានពិភពលោកជាច្រើន ក៏បានបន្តធ្វើការរិះគន់ និងអំពាវនាវឲ្យប្រទេសទាំងអស់ លុបបំបាត់ការប្រើប្រាស់សារធាតុគីមីប្រភេទនេះជាបន្ទាន់ផងដែរ៕
