ទីបំផុតអ្នកវិទ្យាសាស្ត្រអូស្ត្រាលី «រកឈ្មោះដាក់ឲ្យអំបូរសត្វដាយណូស័រប្រភេទថ្មីបានហើយ» តែពិបាកអានបន្តិច…
(ស៊ីដនី)៖ អំបូរសត្វដាយណូស័រប្រភេទថ្មីមួយ ត្រូវបានឃើញរក និងដាក់ឈ្មោះដោយក្រុមអ្នកសា្រវជ្រាវអូស្ត្រាលី បន្ទាប់ពីការរកឃើញសំណល់ហ្វូស៊ីលរបស់វា អស់រយៈពេលជាមួយទសវត្សរ៍មកនេះ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅល្ងាចថ្ងៃសុក្រ ទី២០ ខែកក្កដា ឆ្នាំ២០១៨។
ជុំវិញរបកគំហើញនេះដែរ អ្នកស្រាវជ្រាវនៃសាកលវិទ្យាល័យ James Cook University ក្នុងប្រទេសអូស្ត្រាលីលោក Jelle Wiersma បានបញ្ជាក់ថា ដាយណូស័រខាងលើគឺមានឈ្មោះ អាខៃណាសេផាឡឺស ចនសូនី (Akainacephalus johnsoni) និងជាអម្បូរដាយណូស័រស៊ីរុក្ខជាតិជាអាហារ។
ដាយណូស័រនេះមានប្រវែងបណ្ដោយ ០៥ម៉ែត្រ និងមានជើងបួន ព្រមទាំងមានបន្លាពេញខ្លួនពីលើក្បាលរហូតដល់កន្ទុយ ដែលជាប្រភេទអំបូរគ្រួសារ
ដាយណូស័រ Ankylosaurid មានជីវិតរស់នៅលើផែនដីច្រើនជាង ៧៥លានឆ្នាំមុន។ វាពិតជាមានប្រយោជន៍សម្រាប់ក្រុមអ្នកវិទ្យាសាស្ត្រ ធ្វើការវិភាគបន្ថែមអំពីស្ថានភាពជីវិតនាសម័យកាលណោះ និងប្រៀបធៀបជាមួយបច្ចុប្បន្ន រួមទាំងផ្នែកបរិស្ថាន។
គួរបញ្ជាក់ថា សំណល់ហ្វូសស៊ីល Akainacephalus johnsoni ត្រូវបានគេរកឃើញនៅក្នុងរដ្ឋ Utah សហរដ្ឋអាមេរិកកាលពីជាង ១០ឆ្នាំមុន។ សម្រាប់ឈ្មោះរបស់វាពេលនេះ គឺយកតាមអត្ថន័យរបស់ភាសាក្រិក ដែលចង់សំដៅទៅលើភាពមានកុយ ឬបន្លានៅលើក្បាល ដូចជាលក្ខណៈរបស់ Akainacephalus johnsoni នោះឯង៕
