(សិង្ហបុរី)៖ នាចុងសប្តាហ៍នេះបាតុភូតតារាសាស្រ្ត ដ៏អស្ចារ្យមួយផ្សេងទៀត នឹងកើតមានឡើង ដែលនឹងធ្វើឲ្យអ្នកតាមដានទៅលើផ្ទៃមេឃ នឹងមានការរំភើបខុសពីធម្មតា ព្រោះវាជាព្រឹត្តិការណ៍កម្រប្រចាំសតវត្សរ៍នេះតែម្តង។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅរសៀលថ្ងៃចន្ទ ទី២៣ ខែកក្កដា ឆ្នាំ២០១៨។
បន្ទាប់ពីព្រឹត្តិការណ៍ជាប្រវត្តិសាស្រ្តនៃបាតុភូត Super Blue Moon កាលពីខែមករាដើមឆ្នាំ២០១៨កន្លងទៅនេះ អ្នកដែលចូលវិស័យតារាសាស្រ្តនៅទ្វីបអាស៊ីយើងកំពុងទន្ទឹងរង់ចាំទស្សនា «បាតុភូតច័ន្ទគ្រាស» ងងឹតទាំងស្រុងមួយ ដែលមានរយៈពេលយូរជាងគេបង្អស់ប្រចាំសតវត្សរ៍ទី ២១ នេះ។ ម៉្យាងវិញទៀត នៅពេលជាមួយគ្នានោះ ភពអង្គារ (Mars) ក៏នឹងរះឡើងនៅផ្ទៃមេឃកៀកនឹងព្រះច័ន្ទ ដែលងាយស្រួលក្នុងការមើលឃើញដោយភ្នែកទទេថែមទៀតផង (វាក៏អាស្រ័យលើលក្ខខណ្ឌអាកាសធាតុដែរ)។
បាតុភូតរាហ៊ូចាប់ច័ន្ទខាងលើនេះ នឹងចាប់ផ្តើមនាយប់រំលងអាធ្រាតឈានចូលថ្ងៃសៅរ៍ ទី២៨ ខែកក្កដា គឺចាប់ពីម៉ោង ០១៖៣០នាទីរំលងអធ្រាតទៅ ហើយវានឹងមានរយៈពេលជិតពីរម៉ោងពោលគឺ ០១ម៉ោង និង ៤៣នាទីរំលងអធ្រាត។ និយាយរួមទៅលោកខែ នឹងត្រូវលេបបាត់ពីផ្ទៃមេឃទាំងស្រុងពីម៉ោង ០២៖៣០នាទី ដល់ម៉ោង ០៤៖១៣នាទី រំលងអធ្រាតថ្ងៃដដែល។
រយៈពេលខាងលើនេះគឺត្រឹមតែ ០៤នាទី ដែលខ្លីជាងព្រឹត្តិការណ៍ច័ន្ទគ្រាស ដែលរយៈពេលយូរជាងគេបំផុត ដែលអាចកើតមានទៅរួចសម្រាប់បាតុភូតច័ន្ទគ្រាសងងឹតបាត់ទាំងស្រុងប៉ុណ្ណោះ ដែលមានរយៈពេល ០១ម៉ោង និង ៤៧នាទី។ ពេលចុងក្រោយបំផុត ដែលព្រឹត្តិការណ៍ច័ន្ទគ្រាសទាំងស្រុង បានកើតមានក្នុងរយៈពេលដ៏យូរបែបនេះ គឺតាំងពីថ្ងៃទី១៦ ខែកក្កដា ឆ្នាំ២០០០ មកម្ល៉េះជាមួយរយៈពេលសរុប០១ម៉ោងនិង៤៦នាទី។
គួរជម្រាបថា ដូចទៅនឹងបាតុភូត Super Blue Blood Moon ដែរព្រះច័ន្ទនៅថ្ងៃទី២៨ ខែកក្កដានេះ នឹងលេចឡើងដោយមានពណ៌ក្រហម ក្នុងអំឡុងពេលនៃបាតុភូតច័ន្ទគ្រាស ប៉ុន្តែវានឹងមានទំហំតូចជាងនាលើកនេះ។ បើតាមទីភ្នាក់ងារអវកាសអាមេរិក NASA បាតុភូតច័ន្ទគ្រាសនាថ្ងៃសៅរ៍ចុងសប្តាហ៍នេះ អាចត្រូវមើលឃើញពីតំបន់អាមេរិកខាងត្បូង អឺរ៉ុប អាហ្វ្រិក អូស្រ្តាលី និងអាស៊ី។
គួរបញ្ជាក់ថា ព្រឹត្តិការណ៍ច័ន្ទគ្រាសទាំងស្រុងដែលគេហៅថា Total Lunar Eclipse នឹងកើតមានម្តងទៀតនៅថ្ងៃទី២១ ខែមករា ឆ្នាំក្រោយ ប៉ុន្តែវាពុំអាចមើលឃើញពីតំបន់អាស៊ីឡើយ ហើយច័ន្ទគ្រាសនៅឆ្នាំក្រោយនេះ នឹងមានរយៈពេលត្រឹម ៦២នាទី ប៉ុណ្ណោះ។ សម្រាប់តំបន់អាស៊ីយើង នឹងត្រូវចាំរហូតទាល់តែថ្ងៃទី២៦ ខែឧសភា ឆ្នាំ២០២១ ទើបមានឱកាសអាចមើលឃើញទទួលបានទស្សនីយភាពបែបនេះម្តងទៀត៕
