ក្រុមការងារ New Horizons ត្រៀមអង្កេតអាចម៍ផ្កាយ 2014 MU69 ដែលនឹងជះស្រមោលលើផែនដីនៅឆ្នាំ២០១៩…
(អាមេរិក)៖ ក្រុមការងារនៃបេសកកម្ម New Horizons របស់អង្គការ NASA កំពុងត្រៀមខ្លួនសម្រាប់ការតាមដានលើកចុងក្រោយពីផែនដី ទៅលើថ្មអវកាសមួយមានឈ្មោះថា 2014 MU69 ដែលយាន New Horizons នឹងហោះទៅឆ្វែលនៅដើមឆ្នាំ២០១៩។ នេះបើតាមការដកស្រង់ការផ្សាយចេញពីវែបសាយ Space.com នៅព្រឹកថ្ងៃសុក្រ ទី០៣ ខែសីហា ឆ្នាំ២០១៨។
នាថ្ងៃសៅរ៍ចុងសប្តាហ៍នេះ ដុំថ្មអវកាស 2014 MU69 នឹងធ្វើដំណើរឆ្លងកាត់នៅពីខាងមុខ ឬកំបាំង (Occult) ផ្កាយដ៏ឆ្ងាយមួយ ដែលឱកាសនេះនឹងធ្វើឲ្យវាជះស្រមោលព្រាលៗមកលើតំបន់ចំនួនពីរលើផែនដី គឺនៅសេណេហ្គាល់ និងកូឡុំប៊ី ជាទីដែលក្រុមការងារ New Horizons នឹងត្រៀមខ្លួនរង់ចាំជាមួយកែវយឺតរបស់ពួកគេ។
គោលបំណងនៃការធ្វើបែបនេះ គឺដើម្បីសិក្សាស្វែងយល់ឲ្យបានច្រើនតាមតែអាចធ្វើបាន អំពី 2014 MU69 ឬអាចហៅឈ្មោះមួយទៀតថា Ultima Thule ដែល New Horizons នឹងហោះឆ្វែលទៅកៀកនៅថ្ងៃទី០១ ខែមករា ឆ្នាំ២០១៩។ បាតុភូត Occultation នៅប៉ុន្មានថ្ងៃខាងមុខនេះ នឹងផ្តល់តំរុយខ្លះៗជុំវិញអ្វីដែលអាចត្រូវរំពឹងទុកពីថ្មអវកាស Ultima Thule ហើយជួយអ្នកវិទ្យាសាស្រ្តកែសម្រួលគម្រោងហោះ Flyby របស់ពួកគេ។
ដោយឡែក វាពុំមែនជាលើកទីមួយឡើយ ដែលក្រុម New Horizons បានធ្វើការតាមដានស្រមោលរបស់ Ultima Thule។ កាលពីឆ្នាំទៅមិញ ក្រុមអ្នកវិទ្យាសាស្រ្ត បានធ្វើដំណើរទៅកាន់អាហ្សង់ទីន និងអាហ្រ្វិកខាងត្បូង ដើម្បីសង្កេតបាតុភូត Occultation ហើយនាពេលនោះ ទិន្នន័យដែលក្រុមការងារនៅអាហ្សង់ទីនប្រមូលបាន បានផ្តល់ប្រយោជន៍ជាច្រើនក្នុងកំណត់រយៈចម្ងាយនៃគម្រោងហោះ Flyby នៅចម្ងាយ៣,៥០០គីឡូម៉ែត្រ។
គួរជម្រាបថា ការសង្កេតកាលពីឆ្នាំ២០១៧ ក៏បានបង្ហាញតំរុយដែរថា Ultima Thule តាមពិតប្រហែលអាចជាដុំថ្មពីរធ្វើគោចរក្នុងគន្លងជាមួយគ្នា ហើយវាថែមទាំងអាចមានព្រះច័ន្ទទៀតផង។ បើតាមការបញ្ជាក់ពីក្រុមការងារ New Horizon ពុំមានគម្រោងសង្កេតបាតុភូត Occultation ណាផ្សេងត្រូវបានគ្រោងឡើងហួសពីគម្រោងនាចុងសប្តាហ៍នេះឡើយ៕
