អង្គការ NASA អះអាងថា «ព្រះច័ន្ទទីតាននៃភពសៅរ៍ មានចរន្តខ្យល់ប៉ូល ដូចនឹងភពផែនដី!»
(អាមេរិក)៖ យោងទៅតាមទីភ្នាក់ងារអវកាសណាសា បានឲ្យដឹងនាថ្ងៃអង្គារទី ២១ ខែកុម្ភៈ ឆ្នាំ២០១៧នេះថា ភពផែនដី និងព្រះច័ន្ទទីតានរបស់ភពសៅរ៍ មានស្រទាប់បរិយាកាសក្រាស់ ថ្មក្រោមដី និងប្រព័ន្ធតិចតូនិចស្ទើរតែដូចគ្នាផងដែរ។ នេះបើតាមការដកស្រង់ពីវែបសាយ Space។ ដោយឡែក បច្ចុប្បន្នក្រុមអ្នកស្រាវជ្រាវបានរកឃើញថា វាមានចរន្តខ្យល់ប៉ូលដូចគ្នាដែលអាចរុញច្រានពពួកឧស្ម័នផ្សេងៗ ចេញពីបរិយាកាសរបស់វាទៅកាន់លំហអាកាសទៀតផង។
ព្រះច័ន្ទដ៏ធំបំផុតរបស់ភពសៅរ៍ឈ្មោះទីតាន ត្រូវបានស្គាល់ជាលើកដំបូងថាជាភពមួយដែលអាចមានចរន្តខ្យល់ប៉ូលយ៉ាងពិសេស។ ជាមួយគ្នានេះដែរ យានរុករកកាសានីរបស់ទីភ្នាក់ងារអវកាសណាសា ដែលបានសិក្សាអំពីភពសៅរ៍កាលពីឆ្នាំ ២០០៤ បានរកឃើញភស្តុតាងមួយនៃចរន្តខ្យល់ ដែលបានឆ្លងកាត់បរិយាកាសរបស់ព្រះច័ន្ទទីតាន និង កន្ទុយដែនម៉ាញ៉េទិចរបស់វា។
ជាក់ស្តែងភស្តុតាងនេះត្រូវបានរកឃើញនៅក្នុងទំរង់អេឡិចត្រុង ២៤.១វ៉ុលនៃថាមពលជាក់លាក់មួយ ដែលក្រុមអ្នកស្រាវជ្រាវបានដឹងថា វាជាទំនាក់ទំនងរវាងភាគល្អិតតូចៗ និងពន្លឺ។ ទោះបីជាព្រះច័ន្ទទីតានមានចំងាយឆ្ងាយពីព្រះអាទិត្យ តែស្រទាប់បរិយាកាសរបស់វានៅតែទទួលពន្លឺពីព្រះអាទិត្យ ដែលហេតុនាំឲ្យវាអាចបំលែងថាមលនានា នៅក្នុងបរិយាកាសបាន។
គួរបញ្ជាក់ដែរថានៅលើភពផែនដី ក៏មានឥទ្ធិពលនៃភាគល្អិតតូចៗនៅក្នុងស្រទាប់បរិយាកាសដូចគ្នា ដោយវាតែងតែមានទំនាក់ទំនង ជាមួយនឹងដែនម៉ាញេទិចរបស់ផែនដី។ នៅក្នុងប្រព័ន្ធព្រះអាទិត្យនេះ មានទីឋានតែ០៤ប៉ុណ្ណោះដែលភាពផ្ទៃដីស្រោបដោយបរិយាកាស នោះទី១ ផែនដី, ទី២ ភពសុក្រ, ទី៣ ភពអង្គារ, និងទី៤ គឺព្រះច័ន្ទទីតានហ្នឹងតែម្តង៕
