ក្តីស្រមៃជិតក្លាយជាការពិត! «កែវយឺតអវកាសឆ្លុះភពអេលៀន James Webb នឹងត្រូវបាញ់បង្ហោះនៅឆ្នាំ២០១៨!»
(អាមេរិក)៖ ទីភ្នាក់ងារអវកាសអាមេរិក NASA បានធ្វើការដាក់តាំងបង្ហាញកែវយឺតអវកាស James Webb នៅក្នុងពិរពណ៌ដ៏ធំមួយដែលកំពុងប្រព្រឹត្តទៅនៅក្នុងទីក្រុង Austin នៃរដ្ឋតិចសាស់ ភាគខាងត្បូងសហរដ្ឋអាមេរិក។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនារសៀលថ្ងៃចន្ទ ទី១៣ ខែមីនា ឆ្នាំ២០១៧។
យោងតាមសេចក្តីប្រកាសព័ត៌មានរបស់ទីភ្នាក់ងារអវកាសខាងលើ អង្គការ NASA សហការជាមួយក្រុមហ៊ុន Northrop Grumman និងវិទ្យាស្ថានវិទ្យាសាស្រ្តនៃកែវយឺតអវកាស (STScl) កំពុងរៀបចំការដាក់តាំងបង្ហាញកែវយឺតអវកាស James Webb ដែលចាប់ផ្តើមពីថ្ងៃចន្ទរហូតដល់ថ្ងៃអាទិត្យសប្តាហ៍នេះ។ កែវយឺត James Webb មានលទ្ធភាពឆ្លុះរកមើលភពផ្សេង បានកាន់តែប្រសើរជាងមុនហើយក៏អាចឱ្យដឹងពីលក្ខណៈបន្ថែម នៃភពដែលត្រូវបានរកឃើញនោះផងដែរ។
មន្រ្តីនៃទីភ្នាក់ងារអវកាស NASA បានឲ្យដឹងដូច្នេះថា «កែវយឺតអវកាស James Webb គឺជាកម្មវិធីវិទ្យាសាស្រ្តលំដាប់កំពូលរបស់ NASA ដែលកំពុងស្ថិតក្នុងការអភិវឌ្ឍន ដែលនឹងអនុញ្ញាតឲ្យអ្នកវិទ្យាសាស្រ្តអាចតាមដាន ក៏ដូចជាឃ្លាំមើលបានកាន់តែឆ្ងាយទៅក្នុងចក្រវាឡ និងមើញឃើញនូវវត្ថុផ្សេងៗ ដែលផ្កាយរណបពីមុនៗមកពុំមានសមត្ថភាពដូច»។
គួរបញ្ជាក់ថាកែវយឺតអវកាស James Webb ដែលមានតម្លៃ៨.៨ពាន់លានដុល្លារ នឹងត្រូវបាញ់បង្ហោះនៅក្នុងឆ្នាំ២០១៨ ហើយនៅក្នុងការតាំងបង្ហាញខាងលើអ្នកចូលរួមទស្សនានឹងមានឱកាស ធ្វើការជជែកជាមួយក្រុមអ្នកវិទ្យាសាស្រ្តក៏ដូចជាក្រុមវិស្វករ ដែលនៅពីក្រោយបេសកកម្មដ៏សំខាន់នេះ និងវិទ្យាសាស្រ្តដែលវានឹងអនុវត្តន៍៕
