នេះជាទិដ្ឋភាពកាឡាក់ស៊ី Milky Way ដែលជាជម្រករបស់យើង និងបណ្តុំនៃពន្លឺដ៏ស្រស់ស្អាត (រូបភាពខាងក្នុង)
(ឈីលី)៖ ទិដ្ឋភាពដ៏រំភើបអស្ចារ្យនៃវត្តមានរបស់កាឡាក់ស៊ី Milky Way ដែលពោរពេញទៅដោយបណ្តុំពពកធូលី ក៏ដូចជាឧស្ម័នអវកាស រួមទាំងកញ្ចុំផ្កាយភ្លឺចែងចាំងរាប់ពាន់លានដួង បានបង្ហាញខ្លួនលើផ្ទៃមេឃនាពេលរាត្រី នៅពីលើមជ្ឈមណ្ឌលតាមដានលំហអវកាស ALMA ដែលស្ថិតនៅភាគខាងជើងប្រទេសឈីលី។ នេះបើតាមការដកស្រង់ការផ្សាយចេញពីវែបសាយ Space.com នៅរសៀលថ្ងៃអង្គារ ទី១៦ ខែតុលា ឆ្នាំ២០១៨។
ក្នុងរូបភាពនៃទិដ្ឋភាពខាងលើ ក៏មានវត្តមានពន្លឺពណ៌សព្រឿងៗម៉្យាង ដែលគេហៅថា Zodiacal Light ផងដែរ។ ពន្លឺ Zodiacal Light បានបង្ហាញខ្លួននៅពីខាងក្រោមចានអង់តែន DV-21 នៃមជ្ឈមណ្ឌល ALMA នៅក្នុងរូបភាពនោះ ហើយបាតុភូតពន្លឺនេះ កកើតឡើងចេញពីការរាយប៉ាយនៃពន្លឺព្រះអាទិត្យ ចាំទៅលើធូលីអវកាស។
គួរជម្រាបថា មជ្ឈមណ្ឌល ALMA ផ្សំឡើងពីចានអង់តែនសរុប ៦៦គ្រឿង នៅលើវាលខ្សាច់ Atacama នៃប្រទេសឈីលី ហើយវាគជាកែវយឺតដ៏មានអានុភាពបំផុតនៅលើផែនដី សម្រាប់ការសង្កេតទៅលើធូលី និងឧស្ម័នម៉ូលេគុលក្នុងចក្រវាឡ ហើយភពអេលៀន និងប្រព័ន្ធព្រះអាទិត្យក៏ស្ថិតនៅក្នុងមុខព្រួញ នៃការតាមដានរបស់វាផងដែរ។
ALMA ត្រូវបានរចនាឡើង ដើម្បីសិក្សាទៅលើ កញ្ចុំផ្កាយ ប្រព័ន្ធភព កាឡាក់ស៊ី ព្រមទាំងទម្រង់ជីវិត ដើម្បីជួយអ្នកវិទ្យាសាស្រ្តបកស្រាយសំណួរស៉ីជម្រៅមួយចំនួន ទាក់ទិននឹងដើមកំណើតរបស់ចក្រវាឡ។ ការជ្រើសរើសយកទីតាំងខាងលើនៅក្នុងប្រទេសឈីលីនោះ ក៏ព្រោះតែតំបន់នោះ មានអាកាសធាតុអំណោយ និងមេឃស្រឡះល្អបំផុតជាងទីណាៗលើភពផែនដី ដែលអាចឲ្យកែវយឺតបញ្ចេញសមត្ថភាពដ៏អស្ចារ្យ៕
