(អាមេរិក)៖ បន្ទាប់ពីចុះចតដោយជោគជ័យ យាន Insight របស់អង្គការ NASA បានផ្ញើរូបភាពស៊ែលហ្វី (Selfi) ដំបូងបំផុតរបស់វាពីភពអង្គារមក ឲ្យអ្នកនៅលើផែនដីបានឃើញ។ នេះបើតាមការដកស្រង់ការផ្សាយចេញពីវែបសាយ Daily Mail (Mail Online) នៅល្ងាចថ្ងៃពុធ ទី២៨ ខែវិច្ឆិកា ឆ្នាំ២០១៨។
ខណៈដែលទីបំផុត InSight ចុះទៅដល់ដីភពអង្គារ (Mars) ដោយបានសម្រេច ក្រោយការធ្វើដំណើរក្នុងទីអវកាសជិត ៧ខែនោះ អង្គការ NASA បានបញ្ចេញរូបភាពមួយភ្លែត ដែលយានថ្មីរបស់ខ្លួនថតបានពី Mars។ រូបភាពនេះបង្ហាញឲ្យអ្នកនៅលើផែនដីឃើញ មើលឃើញពីតួខ្លួនមួយផ្នែករបស់យាន InSight រួមជាមួយទិដ្ឋភាពនៃផ្ទៃដីរបស់ភពក្រហម ដែលអ្នកវិទ្យាសាស្រ្តជឿជាក់ថា ធ្លាប់មានលក្ខណៈស្រដៀងភពរបស់យើង។
រូបភាពមួយសន្លឹកនេះត្រូវបានបញ្ជូនមកផែនដីតាមរយៈ ផ្កាយរណបមួយគ្រឿងរបស់ NASA ដែលកំពុងគោចរជុំវិញភពអង្គារ ក្រោយពីវាទទួលបានរូបភាពពីយាន InSight នៅតំបន់ដែលយានតម្លៃ០១ពាន់លានដុល្លារនេះចុះចត ហៅថា Elysium Planitia ដែលស្ថិតនៅភាគខាងជើងនៃខ្សែបន្ទាត់អេក្វាទ័ររបស់ Mars និងជាកន្លែងប្រសើរមួយ ដោយសារតែភាពរាបស្មើពុំសូវមានថ្មរដិបរបុបនៅតំបន់នោះ។
ការបញ្ជូនរូបភាពនេះមានន័យថា ផ្ទាំងសូឡារបស់ InSight ត្រូវបានលាតបើកដោយជោគជ័យ ពោលគឺវាអាចស្រូបពន្លឺព្រះអាទិត្យ និងសាកថ្មរបស់វាជារៀងរាល់ថ្ងៃបាន។ តាមរយៈការប្រើប្រាស់ដៃរ៉ូបូតរបស់ InSight ដែលមានបំពាក់កាមេរ៉ា ក្រុមការងារបេសកកម្ម នឹងអាចថតរូបភាពជាច្រើនសន្លឹកថែមទៀតក្នុងពេលខាងមុខ។ ប្រការនេះនឹងជួយដល់ក្រុមវិស្វករវាយតម្លៃ លើកន្លែងដំឡើងឧបករណ៍ស្រាវជ្រាវវិទ្យាសាស្រ្តរបស់ InSight ដែលនឹងត្រូវចាប់ផ្តើមបញ្ជូនទិន្នន័យមកផែនដី ក្នុងរយៈពេលពីរទៅបីខែខាងមុខផងដែរ។
គួរជម្រាបថា បេសកកម្ម InSight គឺជាការចុះចតដោយជោគជ័យលើកទី ៨ របស់អង្គការ NASA នៅលើភពអង្គារ គិតចាប់តាំងពីបេសកកម្ម Viking កាលពីឆ្នាំ១៩៧៦មក និងជាជោគជ័យលើកទីមួយក្នុងអំឡុងពេល ០៦ឆ្នាំ កន្លងទៅនេះ៕
