ភពចម្លែកមួយប៉ុនភពព្រហស្បតិ៍យើង ជះឧស្ម័នអេល្យូមដ៏ធំចេញពីខ្លួនវា ដែលស្ថិតនៅចម្ងាយ ១៦៣ឆ្នាំពន្លឺពីផែនដី
(អេស៉្បាញ)៖ ក្រុមអ្នកវិទ្យាសាស្រ្តបានប្រើប្រាស់ ប្រព័ន្ធតេឡេស្កូបនៅលើផែនដីផ្ទាល់ រកឃើញដាននៃឧស្ម័នអេល្យូមដ៏ធំ ដែលបញ្ចេញពីភពមួយមានទំហំប្រហាក់ប្រហែលនឹងភពព្រហស្បតិ៍ (Jupiter) ដែលស្ថិតនៅចម្ងាយ ១៦៣ឆ្នាំពន្លឺពីយើង (មួយឆ្នាំពន្លឺ = ៩.៤៦១ពាន់ពាន់លានគីឡូម៉ែត្រ)។ នេះបើតាមការដកស្រង់ការផ្សាយចេញពីវែបសាយ Space នៅរសៀលថ្ងៃសុក្រ ទី០៧ ខែធ្នូ ឆ្នាំ២០១៨។
ចាប់ពីអ្នកវិទ្យាសាស្រ្តបានរកឃើញភព នៅជុំវិញផ្កាយដទៃជាលើកដំបូង ហើយរបកគំហើញគួរឲ្យចាប់អារម្មណ៍នៃពួកវា ភាគច្រើនបានមកពីឧបករណ៍ដែលធ្វើប្រតិបត្តិការក្នុងទីអវកាស ដូចជាកែវយឺតអវកាស Kepler និង Hubble របស់អង្គការ NASA ជាដើម។ សម្រាប់ភពដែលអាចបញ្ចេញឧស្ម័នអេល្យ៉ូម ចេញពីខ្លួនវា គឺជារឿងចម្លែកដែលតម្រូវឲ្យអ្នកវិទ្យាសាស្ត្រធ្វើការអង្កេត និងស្វែងយល់ជាបន្តទៀត។
សរុបមកទល់ពេលនេះ កែវយឺត Kepler បានរកឃើញភពអេលៀនជាង ២,០០០ភព ខណៈការអង្កេតរបស់ Hubble បានជួយក្រុមអ្នកវិទ្យាសាស្រ្តក្នុងការកំណត់លក្ខណៈបរិយាកាសនៃភពនៅប្រព័ន្ធព្រះអាទិត្យផ្សេងៗទាំងនោះ។ ប៉ុន្តែរបាយការណ៍សិក្សាស្រាវជ្រាវចំនួន ០២ ដែលទើបចុះផ្សាយនាពេលថ្មីៗកន្លងទៅនេះ បានរកឃើញចលនាឧស្ម័នអេល្យូមខាងលើ ពីភពរបស់យើងផ្ទាល់តែម្តង។
គួរជម្រាបថា អ្នកវិទ្យាសាស្រ្តពីរក្រុមបានប្រើប្រាស់ប្រព័ន្ធតេឡេស្កូបទំហំមុខកាត់ ៣.៥ម៉ែត្រ ដែលមានទីតាំងនៅប្រទេសអេស៉្បាញ ដោយតេឡេស្កូបនេះមានឧបករណ៍ដ៏មានអនុភាពឈ្មោះថា CARMENES។ ចំណែកភពខាងលើត្រូវគេដាក់ឈ្មោះឲ្យថា WASP-69b៕
