ពិតជាមិនធម្មតា! កែវយឺតអវកាស NASA ថតបានបន្ទុះសូពើណូវ៉ា កាលពី១៧០លានឆ្នាំមុន!
(អាមេរិក)៖ កែវយឺតអវកាសនៃទីភ្នាក់ងារអវកាសអាមេរិក NASA បានឆ្លុះឃើញពន្លឺនៃបន្ទុះផ្កាយ ដែលបានកើតឡើងកាលពីប្រមាណជា ១៧០លានឆ្នាំមុន ពោលគឺតារាមួយដួងនេះស្ថិតនៅចម្ងាយ ១៧០លានឆ្នាំពន្លឺពីយើង។ នេះបើតាមការប្រកាសឲ្យដឹងពី NASA ដកស្រង់ខ្លឹមសារដោយវែបបសាយ Space នៅយប់ថ្ងៃសុក្រ ទី០៧ ខែធ្នូ ឆ្នាំ២០១៨។
នៅពេលផ្កាយធំមួយឈានដល់ទីបញ្ចប់នៃអាយុជីវិតរបស់វា ការផ្ទុះដ៏ភ្លឺចែងចាំង និងពោរពេញដោយថាមពល ដែលគេស្គាល់ថា «បាតុភូតបន្ទុះស៊ូភើណូវ៉ា» តែងកើតឡើង។ តាមរយៈការប្រើប្រាស់ Kepler ជាកែវយឺតអវកាស ដែលបច្ចុប្បន្នចូលនិវត្តន៍ទៅហើយនោះ ព្រមទាំងប្រព័ន្ធតេឡេស្កូបមួយចំនួនទៀតនៅលើផែនដី ក្រុមតារាវិទូបានរកឃើញសញ្ញានៃពន្លឺចែងចាំងរបស់បាតុភូតស៊ូភើណូវ៉ា ដែលគេដាក់ឈ្មោះឲ្យថា SN 2018oh កាលពីថ្ងៃទី០៤ ខែកុម្ភៈ ឆ្នាំ២០១៨។
SN 2018oh ស្ថិតនៅក្នុងកាឡាក់ស៊ីរាងគូទខ្យងមានឈ្មោះថា UGC 4780 នៅក្នុងកញ្ចុំផ្កាយ Cancer ហើយវាត្រូវអ្នកវិទ្យាសាស្រ្តចាត់ថ្នាក់ជាប្រភេទស៊ូភើណូវ៉ា Type Ia ដែលជាទូទៅជះពន្លឺខ្លាំងឡើងៗក្នុងអំឡុងពេល ០៣សប្តាហ៍មុនពន្លឺវាចុះខ្សោយទៅវិញ។
យ៉ាងណាមិញ បន្ទុះស៊ូភើណូវ៉ា ដែលប្រទះឃើញដោយ Kepler តែប៉ុន្មានថ្ងៃក្រោយការចាប់ផ្តើមផ្ទុះដំបូងនោះ មានការកើនឡើងពន្លឺក្នុងកម្រិត០៣ដងលឿនជាងស៊ូភើណូវ៉ាធម្មតា នៅក្នុងដំណាក់កាលដូចគ្នា មុនពេលឈានដល់ចំណុចភ្លឺខ្លាំងបំផុត។ ក្នុងនាមជាប្រភេទស៊ូភើណូវ៉ា Type Ia SN 2018oh គឺជាឧទាហរណ៍ចម្បងជាងគេមួយ នៃប្រភេទស៊ូភើណូវ៉ា ដែលអ្នកតារាសាស្រ្តអាចប្រើប្រាស់ដើម្បីសិក្សាលើថាមពលងងឹត (Dark Energy) និងការពង្រីកខ្លួននៃចក្រវាឡ។
គួរជម្រាបថា ទោះបីជាអស់ឥន្ទនៈហើយចូលនិវត្តន៍ជាផ្លូវការកាលពីថ្ងៃទី៣០ ខែតុលា ក៏ដោយក្តៅ ក្នុងអំឡុងពេលធ្វើប្រតិបត្តិការរាប់ឆ្នាំរបស់វា កែវយឺតអវកាស Kepler បានប្រទះឃើញបេក្ខភាពជាបន្ទុះស៊ូភើណូវ៉ាជាង ៤០ ដែលនឹងត្រូវសិក្សាស្រាវជ្រាវជាបន្តបន្ទាប់នាថ្ងៃអនាគត៕
